Адыгеим и ЛIышъхьэу КъумпIыл Мурат Тэхъутэмыкъое районым зэкIом, гурыт еджапIэхэм ягъэпсын зынэсыгъэр зэригъэ­шIагъ.

Ащ игъусагъэх АР-м псэо­лъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ игуа­дзэу Лафышъ Рэмэзан, Тэхъу­тэмыкъое районым ипащэу Шъэо Аскэр, псэупIэхэм япащэхэр.

Республикэм и ЛIышъхьэ апэ къыплъыхьагъэр къуаджэу ­АдыгеякIэм щагъэпсырэ гурыт еджапIэу нэбгырэ 1100-мэ ателъытагъэр ары. Сомэ миллиард 1,3-рэ зытефэщт псэуа­лъэр 2023-рэ илъэсым ыкIэхэм анэс ашIынэу рахъухьэ. Гурыт еджапIэм ищагу унитIу дэтыщт. Зыр — пэублэ классхэм, ятIо­нэрэр адрэ классхэм якIэлэ­еджакIохэм атегъэпсыхьэгъэщт. Актовэ зали, спортзалитIуи, тре­нажернэ зали, шхапIи, медпункти ащ хэтыщтых. КъумпIыл Мурат псэолъэшIын IофшIэнхэр зынэсыгъэхэм защигъэгъозагъ. Унэм изэтелъхьанкIэ IофшIэнхэм япроцент 90-р агъэцэкIагъ, коммуника­циехэр аращэлIагъэх, псэуа­лъэм шъхьаныгъупчъэ блыпкъхэр ха­гъэуцох. Щагури зэтырагъэ­псыхьэ. Нэбгыри 180-м ехъумэ псэолъэшIыпIэм Iоф щашIэ.

Адыгэ Республикэм и ЛIы­шъхьэ районым ипащэрэ подряднэ организацием идирек­циерэ адэгущыIэзэ, псэолъэшIын IофшIэнхэр дэгъоу зэхэщэгъэнхэм нахь лъэшэу анаIэ зэрэтырагъэтын, гъогу картэхэр зэрагъэцэкIэн фаер къыIуагъ.

«Шэпхъэ пстэуми адиштэрэ джырэ гурыт еджэпIэ зэтегъэ­псыхьагъ тэ тищыкIагъэр. Амал зэриIэкIэ Iоф пчъагъэ зэдэжъу­гъэцакI. Щагум изэтегъэпсыхьан, къэгъагъэхэмрэ чъыгхэмрэ ащ щыгъэтIысхьэгъэнхэм, логистикэм, гъэуцупIэхэм, общественнэ транспортым япхыгъэ Iофыгъохэр зэдызэшIошъу­хых. Республикэм исхэр Адыге­им щагъэпсырэ социальнэ псэуа­лъэм екIолIэнхэ алъэкIы­нэу щытын фае», — къыIуагъ КъумпIыл Мурат.

Нэбгырэ 1100-мэ ателъытэгъэ гурыт еджапIэ Яблоновскэм иурамэу Дорожнэм щагъэпсы. Мы илъэ­сым итыгъэгъэзэ мазэ ар атын фае. Графикым ыпэ итхэу непэ IофшIэнхэр агъэцакIэх. Республикэм и ЛIышъхьэ псэолъэшIыпIэр къызэпиплъыхьагъ, пшъэ­рылъхэри афишIыгъэх.

Нэбгырэ 1100-мэ ателъытэгъэ нэ­мыкI гурыт еджапIи Яблоновскэм иурамэу Заводскоим щагъэпсы. 2024-рэ илъэсым итыгъэгъазэ ащ ишIын аухынэу рахъухьэ. Мы мафэм АР-м и ЛIышъхьэ нэбгырэ 250-мэ ателъытэгъэ гурыт еджапIэр зыщагъэпсырэ Бжыхьэкъоежъми щыIагъ. Къатищэу зэтет унитIу мыщ къыщаIэтыгъах. Джыдэдэм унэ кIоцIхэм ягъэдэхэн ыуж итых, инженер коммуникациехэр аращалIэх. Гурыт еджапIэм кабинетхэр, мастерскойхэр, спорт, актовэ залхэр, тхылъеджапIэ, шхапIэ, медпункт хэтыщтых. Джащ фэдэу спорт джэгупIи, зыгъэпсэфыпIэ чIыпIи щагум дэтыщтых.

Псэуалъэм ишIын сомэ миллион 361,5-рэ фэдиз пэIухьащт. Гурыт еджапIэр чъэпыогъум атынэу рахъухьэ.

«КъоджэдэсхэмкIэ мы псэуалъэм мэхьанэшхо иI. Гурыт еджэпIэжъыр загъэпсыгъэр илъэси 100-м къехъугъ. Къуаджэм итеплъэ къыгъэдахэу псэуа­лъэр шIыгъэн фае. Ягуапэу кIэлэцIыкIухэр ащ кIонхэм, гъэсэныгъэ дэгъу щызэрагъэгъотыным пае ищыкIэгъэ амалхэр зехьэгъэнхэ фае. IофшIэнхэр дэгъоу зэхащэнхэм гъунэ лъытфыщт», — къыIуагъ Адыгеим и ЛIышъхьэ.

Гурыт еджэпIи 4 джыдэдэм Тэхъутэмыкъое районым щагъэпсы. Ахэм ащыщэу 3-р мыгъэ атын фае. 2023 — 2024-рэ илъэсхэм кIэлэеджэкIо чIыпIэкIэ мини 3,5-м ехъу муниципалитетым щызэхащэщт. Хэгъэгум и

Президент гурыт еджапIэхэр зы сменэм техьанхэу пшъэ­рылъ зэрафишIыгъэр гъэцэкIагъэ ­хъущт.

АР-м и ЛIышъхьэ ипресс-къулыкъу