Адыгеим и ЛIышъхьэу Къум­пIыл Мурат къэлэ гъэ­псыкIэ зиIэ поселкэу Яблоновскэм игъогухэр зэрэща­гъэцэкIэжьхэрэми зыщигъэ­гъозагъ.

Республикэм ипащэ урамэу Пролетарскэм изы Iахь зэрэзэтырагъэпсыхьэрэр зэригъэшIагъ. ГъогушIхэм ощхыпсыр зэры­лъэ­дэщт канализациер, лъэс гъо­гу­хэр мыщ щагъэпсых, осты­гъэхэр щагъэуцух.

«ПсэупIэм псынкIэу хэхъоны­гъэ ешIы, тэ пшъэрылъэу тиIэр ищыкIэгъэ инфраструктурэр ащ фызэхэтщэныр, Яблоновскэр нахь зэтегъэпсыхьагъэ тшIыныр ары. Социальнэ псэуалъэхэм транспорткIи, лъэсэуи узэранэ­сыщтым лъэшэу тынаIэ тетэгъэ­ты. Апэрэ чэзыоу ахэм яекIолIапIэхэр зыпкъ итэгъэуцох. Псэо­лъакIэхэми джащ фэдэ екIолIакI афытиIэр. ЧIыпIэхэр къызыщыхахырэ, псэолъэшIын IофшIэнхэм зыщапылъ лъэхъанми логистикэм тыдегупшысэ», — къы­Iуагъ Адыгеим и ЛIышъхьэ.

Лъэпкъ проектэу «ШэпхъэшIу­хэм адиштэрэ гъогу щынэгъончъэхэр» зыфиIорэм къыдыхэ­лъытагъэу поселкэу Яблоновскэм иурамхэу Щорсрэ Лермонтовымрэ ацIэхэр зыхьыхэрэр агъэцэкIэжьых, урамхэу Краснэмрэ Пролетарскэмрэ агъэкIэ­жьых, урамэу Новэм изэтегъэ­псыхьан аухыгъ.

АР-м и ЛIышъхьэ пшъэрылъ зэрафишIыгъэм тетэу поселкэу Яблоновскэм игъогухэм яшIын пае мылъку тедзэ республикэм гъогухэмкIэ и Фонд къыхигъэ­кIыгъ. К. Пчэнышъуаем ыцIэ зыхьырэ урамым къыщегъэжьагъэу Гагариным иурам нэсэу автомобиль гъогу ашIы, Валерий Заволянскэм ыцIэ зыхьырэ ура­мыр агъэпсы, Калининым, Лаухиным яурамхэр, Косми­ческэр агъэцэкIэжьых. Гагариным ­иурам игъэцэкIэжьын аухыгъ.

Адыгеим и ЛIышъхьэ джащ фэдэу поселкэу Инэм щагъэ­псырэ IэзапIэми къыщыуцугъ. Псауныгъэм икъэухъумэнкIэ пэу­блэ звенор джырэ шапхъэ­хэм адиштэу зэтегъэпсыхьэгъэ­ныр къыдэзылъытэрэ республи­кэ программэм диштэу квадрат метрэ мини 5,1-рэ хъурэ IэзэпIакIэ мы псэупIэм щагъэпсы. ПсэолъэшIынми, медицинэ учреждением чIэтыщт оборудованиеми сомэ миллион 380-рэ атефэщт. Зы сменэм нэбгырэ 450-рэ ащ щауплъэкIун алъэ­кIыщт.

КъумпIыл Мурат подрядчик­хэмрэ муниципалитетым ипащэрэ адэгущыIэ, псэолъэшIынымкIэ технологическэ шапхъэ­хэр зэкIэ къыдэлъытэгъэн зэ­рэфаем анаIэ тыраригъэдзагъ. Медицинэ учреждением изэтегъэпсыхьанкIэ, логистикэмкIэ, медоборудованием икъэщэфы­нкIэ пшъэрылъ гъэнэфагъэхэр рес­публикэм и ЛIышъхьэ афи­шIыгъэх.

«Хэгъэгум и Президентэу Владимир Путиным цIыфхэм ящыIэкIэ-псэукIэ зыкъедгъэIэтынэу пшъэрылъ къытфишIыгъ. Мы лъэныкъом тэ тишъыпкъэу тыщылъэкIуатэ, республикэм ипсэупIэ пэпчъ ищыкIэгъэ соци­альнэ инфраструктурэр тэ­гъэ­псы. Лъэпкъ проектхэм, къэ­ра­лыгъо программэхэм ама­лэу къытатырэм ишIуагъэкIэ кIэлэцIыкIу IыгъыпIэхэр, гурыт еджа­пIэхэр, спорт джэгупIэхэр, псау­ныгъэм икъэухъумэн фэгъэ­зэгъэ учреждениехэр, культурэм иунэхэр тэгъэпсых. Ахэм сэ сшъхьэкIэ сынаIэ атесэгъэты», — къыIуагъ КъумпIыл Мурат.

Адыгэ Республикэм и ЛIышъхьэ ипресс-къулыкъу