Ошъогу десантыдзэхэм я Мафэ непэ Мыекъуапэ щыхагъэунэфыкIыгъ. Ащ фэгъэхьыгъэ мэфэкI зэхахьэр ДзэкIолIхэм япсынэкIэчъ дэжь щыкIуагъ.

[caption id="attachment_137043" align="aligncenter" width="800"] Сурэтыр: А. Iэшъын.[/caption]

ЗэIукIэр къызэIуихыгъ Мыекъопэ къэлэ администрацием илIыкIоу Владимир Алтуниным. Ошъогу десантыдзэхэр зызэхащагъэхэр илъэс 93-рэ зэрэхъугъэмкIэ Мыекъуапэ иадминистрацие ипащэу Геннадий Метрофановым ыцIэкIэ зэхахьэм хэлажьэхэрэм ар къафэгу­шIуагъ. «Къэралыгъом псэемыблэжьэу къулыкъу фэзыхьыхэрэм десант зэ­къошныгъэр, дзэкIолI шъыпкъэныгъэр зы­фэдэр зышIэхэрэм мы мафэм зыкIыныгъэ къахелъхьэ, — къыIуагъ Вла­димир Алтуниным. — Десантникхэр лъыгъэчъэ зэо-зэпэуцу зэфэшъхьафхэм ахэлажьэхэзэ къэралыгъом игъунап­къэхэр къау­хъумэу пчъагъэрэ къыхэ­кIыгъ. Хэгъэгу зэошхом илъэхъан лIыгъэ ахэлъэу фашистхэм апэуцугъэх, я 80 — 90-рэ илъэсхэм «чIыпIэ плъырхэм» терроризмэм щапэшIуекIощтыгъэх».

Хыдзэ флотым иветеранхэм я Союз ипащэу Шэуджэн Роман зэхахьэм къыщыгущыIагъ. Десантыдзэхэр Урысыем ихэшыпыкIыгъэ дзэу зэрэщытхэм, хэу­шъхьафыкIыгъэ дзэ операцием хэтхэу тихэгъэгу къызэраухъумэрэм ягугъу къы­шIыгъ.

Афганистан ыкIи нэмыкI чIыпIэхэм ащыкIогъэ заохэм яветеранхэм я Союз ипащэу Николай Николенкэм десантыдзэхэм ахэтхэр ныбжьыкIэхэм ящысэтехыпIэ зэрэхъухэрэм, зэкъошныгъэм итамыгъэу зэрэщытхэм къакIигъэтхъыгъ.

ДзэкIолIхэм яунагъохэр, офицерхэм яшъхьэгъусэхэр, ясабыйхэр зэхахьэм хэлэжьагъэх. Зэо зэпэуцужь зэфэшъхьафхэм ахэкIодагъэхэм къекIолIагъэхэр зы такъикърэ афэшъыгъуагъэх. Къэ­гъагъ Iэрамхэр саугъэтым кIэралъхьагъэх.

Лъэпшъыкъо Фатим.