«Фермер-къоешI» зыфиIорэ хъызмэтшIапIэу Шэуджэн районым итым гъэхъэгъэшIухэр ешIых. Ар зэхэзыщэгъэхэ Елбэшэ Аслъанрэ ыкъоу Анзоррэ къуаджэу Пщычэу щэпсэух. ЯунагъокIэ аIыгъ былымэхъо фермэм «Адыгэ макъэр» бэмышIэу щыIагъ.

[caption id="attachment_137037" align="aligncenter" width="800"] А. Iэшъын.[/caption]

Ежьхэм ямылъкукIэ гъу­нэгъу хапIэр къащэфыжьи, апэрэ фермэр ащ тырашIыхьагъ. ЯпщыпIэ гуIэтыпI, щагушхор зэIу­хыгъ, ямэкъулъэ лъагэ, ушъагъэ, къакъырым бы­лымхэр чIэтых, техникэ зэфэшъхьафыбэ ящагу дэт.

Къэралыгъо IэпыIэгъоу фермерхэм агъотырэм ишIогъэшхо къызэрэкIорэр Елбэшэ Аслъан хегъэунэфыкIы. «Непэ лъэныкъо зэфэшъхьафхэмкIэ грантхэр, субсидиехэр фермерхэм къаратых, фэгъэ­кIотэнхэр къыдыхэлъытагъэхэу банкхэм ахъщэ чIы­фэхэр къаIахын амал яI. ХъызмэтшIапIэ къызэ­Iузыхы е иIэм хэзыгъахъо зышIоигъохэмкIэ ар IэпыIэгъушхоу зэрэщытыр къэралыгъо IэпыIэгъу къы­зэратыгъэхэм зэхэтэшIэ», — еIо фермерым.

ГущыIэм пае, АР-м мэкъу-мэщымкIэ и Министерствэ къызэритыгъэмкIэ, федеральнэ, респуб­ликэ бюджетхэм къатIупщыгъэ сомэ миллион 94,4-рэ грант IэпыIэгъоу «Агростартапым» мыгъэ къыфыхагъэкIыгъ. Ащ ишIуагъэкIэ фермер хъыз­мэтшIэпIэ 42-рэ респуб­ликэм щызэхащагъ. Джащ фэдэу гъэ къэс фермер­хэм, мэкъумэщ хъызмэтшIапIэхэм къэралыгъо IэпыIэгъоу арагъэкIырэм ишIуагъэкIэ ахэм зау­шъомбгъун алъэкIы, япчъа­гъэ хэхъо.

Былымхэм япчъагъэ хигъэхъон мурад иIэу Ан­зор хабзэм иIэпыIэгъу, ятэ фэдэу, кIэлъэIугъ ыкIи грантыр къырихыгъ. Ас­лъан илъэс пчъагъэ хъугъэу чIыгулэжьыным пылъ. Лэжьыгъэ бэгъуагъэ ­илъэс къэс Iуехыжьы, коцыр, ты­гъэгъазэр ахэм ащыщых. Техникэу зэрылэ­жьэщтхэм гъэ къэс хигъа­хъозэ, псэолъабэ ­ыугъоигъ. А охътэ дэдэм Анзор сы­мэджэщым юристэу Iоф щишIэщтыгъ нахь мышIэми, ятэ готэу дэлажьэщтыгъ. Анзор щыгугъыщтыгъ ялэжьыгъэ уасэ иIэу ащэн алъэкIыным ыкIи ащ дакIоу ябылымхэм арагъэшхырэ Iусыр ежьхэм къагъэкIын амал яIэным.

Унагъор зэхэгущыIэжьи, Анзор юрист сэнэхьатыр ыгъэтIылъыжьынышъ, бы­лым­хъуным ятэрэ ыкъорэ ыуж ихьанхэу зэдаштагъ.

2017-рэ илъэсым бизнес-план зэхагъэуцуагъ. Ащ ишIуагъэкIэ апэрэ грантэу сомэ миллиони 3 къафатIупщыгъэти, чэм 26-рэ къащэфыгъ, ащкIэ яIофшIэн аублагъ. НепэкIэ ахэм япчъагъэ 100-м нагъэсыгъ. Чэмхэр голштинскэ лъэпкъым щыщых, мафэм щэгъогогъо ащых, зым гурытымкIэ литрэ 32-рэ фэдиз къеты. Щэр гъэмафэм заводым раты, бжыхьэм къоешIыным фе­жьэжьыщтых. Къуаемрэ щатэмрэ къыдэзыгъэкIыщт цех ашIын гухэлъ яI. Ахэм анэмыкIэу шитф ахъу, ахэм япчъагъэ хагъэхъоным, шыгъэчъэшхэр зэрагъэгъотынхэм пылъых. Шыгъачъэхэм ахэлэжьэным кIэхъопсы.

«Мэкъумэщ былым­хъу­ным анахь фэIэзэ фер­мер» щытхъуцIэр 2017-рэ илъэсым «Дышъэ бжыхь» зыфиIорэ Урысые къэгъэ­лъэгъонэу Адыгеим щыкIуагъэм Елбашэхэм яхъыз­мэтшIапIэ къыщы­фагъэшъошагъ.

ЯтIонэрэ грантэу миллиони 9 хъурэр 2020-рэ илъэсым «Фермер-къое­шIым» къыратыгъ. Елбэшэ Анзор къызэриIуагъэмкIэ, тракторитIурэ мэкъур зэраугъоижьырэ Iэмэ-псы­мэхэмрэ къащэфыгъэх, фермакIэ чылэ гъунэм а ахъ­щэмкIэ щашIыгъ. Бжы­хьэм ащ кощыжьынхэу загъэхьазыры. Гектари 10 хъурэ чIыгум къакъыр тырашIыхьагъ, зэтырагъэ­псыхьагъ. ШкIэ цIыкIухэр зыщаIыгъыщтхэр, щэ зыщырагъэшъощтхэр, зыщагъэпщэрыщтхэр шъхьафэу ашIыгъэх. Щэр зычIэтыщт гъэучъыIэлъэ унэри хьазыр. Метрэ 600 фэдиз зикIыхьэгъэ мыжъо гъогури къакъырхэм якIуалIэу ашIыгъ. Гектар 20 зэрылъ хъупIэр егъэфедэ. ЧIыгу гектар 60-м люцернэрэ натрыфырэ къащагъэкIы чэмхэм апае.

Чэмахъор, чэмыщхэр зэрысыщт унэ зэхэтыр шъхьафэу зэтырагъэпсы­хьагъ. ЛэжьакIомэ псэукIэ тэрэз зэряIэн фаер Анзор хигъэунэфыкIыгъ. ЯIоф зиушъомбгъумэ, зыщылэ­жьэщтхэ чIыпIэхэр цIыфмэ аратын алъэкIыщт. Елбашэхэм яхъызмэтшIапIэ джыри нахь зырагъэу­шъомбгъун агу хэлъ, ащ пае къэралыгъо IэпыIэ­гъум къихьащт илъэсми кIэлъэIущтых.

ХъызмэтшIапIэм Iофы­шхо ыпэкIэ илъ: шэпхъа­кIэхэм адиштэу фермэр икъоу зэтырагъэпсыхьаныр, лэжьыгъэр Iуахыжьыныр, былымхэм кIымафэм арагъэшхыщтыр агъэхьазырыныр. Былым­хъуныр зэпыугъо зимыIэ IофшIэн.

Лъэпшъыкъо Фатим.