Хэгъэгур къыухъумэныр, мамыр цIыфхэр къэгъэгъунэ­гъэнхэр зипшъэрылъ шъхьаIэу къулыкъур зыхьырэмэ ащыщ П. Къэплъан.

[caption id="attachment_137032" align="aligncenter" width="800"] Сурэтыр: Унагъом ихъарзынэщ.[/caption]

Гурыт еджапIэм зычIэхьагъэм къыщыублагъэу Iэпкъ-лъэпкъ пытэ зиIэ кIэлэцIыкIоу Къэплъан щытыгъ, зэнэкъо­къухэм ренэу апэрэ чIыпIэхэр къащыдихыщтыгъ. Анахьэу Iэпшъэ бэнэнымкIэ секцием кIозэ ащ ишъэфхэм зафигъэсагъ. Спортым ишъыпкъэу пылъыгъ нахь мышIэми, иеджэн пэрыохъу фэхъугъэп, гурыт еджапIэр тфы закIэкIэ къыухыгъ. Медальхэр, щытхъу тхылъхэр мымакIэу къыфагъэшъошагъэх.

— Дзэм фэгъэхьыгъэ фильмхэм сяплъы зыхъукIэ, ренэу сыфэягъ дзэ къулыкъушIэу сыщытынэу, ау сянэ-сятэхэм а лъэхъаным ар ащ фэдизэу къырадзэщтыгъэп. Джащыгъум тесыубытэгъагъ хэушъхьафыкIыгъэ къулы­къум Iоф щысшIэнэу, — еIо Къэплъан.

Гурыт еджапIэр къызеухым Къэп­лъан Ростов къэралыгъо социальнэ университетым икъутамэу Ермэлхьаблэ дэтыгъэм чIэхьагъ. Илъэсрэ ащ щеджагъэу, академическэ отпуск къаIихи, дзэ къулыкъум кIуагъэ. Ащ щыIэзэ Пятигорскэ къэралыгъо социальнэ университетым иеджэн щыпидзэжьыгъ ыкIи 2020-рэ илъэсым къыухыгъ.

Къалэу Кисловодскэ и МВД илъэсныкъорэ къулыкъур щихьыгъэу ятэ ри­Iуагъ УФ-м идзэ къулыкъу зэзэгъыныгъэ ди­шIынэу зэрэфаер. Апэ ятэ къыфегъэшIугъэп, ау кIалэм зэрэтыриубытагъэр къызыгурэIом, унашъоу ышIыгъэм къе­зэгъыгъ. А лъэхъаным ятэ ышIагъэп икIалэ хэушъхьафыкIыгъэ дзэ подразделением хэхьагъэу, хэгъэгу кIоцI къулыкъумкIэ Министерствэм хэтэу къулыкъур ыхьынэу ары зэрэгугъагъэр. ИкIалэ унашъоу ышIыгъэр янэ къызишIагъэр мэзищ зытекIыр ары ныIэп.

Зэзэгъыныгъэм ыуж Къэплъан ищыIэныгъэ зэхъокIыгъ. «Краповый берет» зыфаIорэр щыгъын ылъэкIынэу ушэтынхэр ытыгъэх. ХэушъхьафыкIыгъэ дзэ подразделением къулыкъур щызыхьырэ пэпчъкIэ ащ мэхьанэшхо иIэу щыт. «Краповэ беретыр» зыщыгъынэу Iизын зэратыхэрэр анахь къулыкъушIэ чанхэу, ухьазырыныгъэ дэгъу зыIэкIэлъхэр ары. УIэшыгъэ бзэджашIэхэм апэуцужьыгъэныр, гъэры ашIыгъэхэр шъхьафит шIы­жьыгъэнхэр ыкIи ошIэ-дэмышIэ Iофхэм ахэлэжьэнхэр — джары хэушъхьафыкIыгъэ подразделением ипшъэрылъхэр. Къэплъан къызэриIорэмкIэ, ащ фэдэ кIочIэ дэгъухэр хэлъыным ренэу кIэхъо­псыщтыгъ. 2016-м, илъэс 21-рэ ыныбжьэу, зэкIэ ушэтынхэр ыкIугъэх ыкIи зыкIэхъопсыщтыгъэ «краповэ беретыр» щыгъын ылъэкIынэу Iизын къыратыгъ.

Темыр Кавказым ичIыпIэхэм хэбзэ рэхьатныгъэр къащыухъумэгъэнымкIэ Iофтхьэбзэ зэфэшъхьафхэм, 2018-рэ илъэсым мэзиплIым къыкIоцI Шам щыкIогъэ зэпэуцужьхэм Къэплъан ахэлэжьагъ ыкIи «Зэо зэпэуцужьхэм яветеран» зыфиIорэ тын лъапIэр къыфа­гъэшъошагъ.

Къэплъан хэушъхьафыкIыгъэ дзэ под­разделением хэтэу къулыкъур ехьы.

Мы мафэхэм ар хэушъхьафыкIыгъэ дзэ опе­рацием хэлажьэ. Ащ зэрилъытэрэмкIэ, гухэлъэу зыдиIыгъыгъэхэм афэкIогъэным амалэу иIэр зэрэфигъэIоры­шIагъэм дзэ къулыкъушIэ шъыпкъэ хъу­нымкIэ ишIуагъэ къекIыгъ.

Уихэгъэгу къулыкъур фэпхьыныр, къэухъумэгъэныр ыкIи шIу плъэгъуныр хэткIи пшъэрылъ лъапIэу щыт. Дзэ къулы­къушIэхэр тилъэхъан илIыхъужъых, ахэр мамырныгъэмрэ щынэгъончъа­гъэмрэ яухъумакIох.

КIАРЭ Фатим.