Урысые физкультурэ комплексэу «IофшIэным ыкIи зыкъэухъумэжьыным сафэхьазыр» зыфиIорэм ишъолъыр едзыгъо текIоныгъэр къы­щыдэзыхыгъэхэр Мыекъопэ къэлэ админи­страцием щагъэшIуагъэх

Шъугу къэдгъэкIыжьын, Адыгеим щызэхащэрэ зэнэкъокъум ящэнэрэ илъэс хъугъэу Мые­къуапэ икIэлэеджакIохэр анахь щылъэшых. Урысые физкультурэ комплексэу «IофшIэным ыкIи зыкъэухъумэжьыным сафэхьазыр» зыфиIорэм изэнэкъокъухэм муниципалитет пэпчъ кIэлэ­еджэкIуи 8 къыщигъэлъэгъуагъ. Ахэм зэкIэми хэшыпыкIын едзыгъом зыщаушэтыгъ ыкIи ащ щы­пхырыкIыгъэх.

Анжей Матосян, Ислъам ­Либзо, Арсений Третьяк-Бобровым, Виктор Илющенкэм, Арина Мехеда, Камилла Стребковам, Ирина Влаюсковам, Арина Новиковам Мыекъуапэ икомандэ къагъэлъэгъуагъ. Ахэр зыгъасэхэрэр Бзаго Рустам.

Унэе шIухьафтынхэм ыкIи зыгъэпсэфыпIэу «Артекым» кIонхэмкIэ путевкэхэм афэбэнагъэх Даниил Сосновскэмрэ Константин Михайловымрэ.

Зэнэкъокъум изэфэхьысыжьхэм къызэрагъэлъэгъуагъэмкIэ, Мые­къуапэ икомандэ очко 3088-рэ ригъэкъугъ ыкIи текIоныгъэр къы­дихыгъ. ЯтIонэрэ чIыпIэр афа­гъэшъошагъ Джэджэ районым илIыкIохэм, Шэуджэн районыр ящэнэрэ хъугъэ.

Республикэм икъэлэ шъхьаIэ икIэлэеджакIохэм хагъэунэфыкIырэ чIыпIи 6 къыдахыгъ. Мы муниципалитетыр къэзыгъэлъэгъогъэ пшъашъэхэр зэкIэми анахь лъэшыгъэх, кIалэхэм ятIонэрэ ыкIи ящэнэрэ чIыпIэхэр къафагъэшъошагъэх. Зэфэхьысыжьхэм адиштэу Мыекъуапэ икIэлэ­-еджэ­кIуи 5-м «Артекым» кIонхэм ифитыныгъэ къыдахыгъ. ЯплIэ­нэрэ чIыпIэр къыдэзыхыгъэ зы нэбгырэ ахэм ягъусэщт.

ГъэхъэгъэшIу зышIыгъэ ныбжьыкIэхэм къафэгушIуагъ ыкIи къалэжьыгъэ тынхэр аритыжьыгъэх Мыекъопэ къэлэ администрацием физическэ культурэмкIэ ыкIи спортымкIэ и Комитет итхьаматэу Дмитрий Щербаневым.

Ахэр медалых, дипломых, сертификатых, шIухьафтын лъапIэх.

Урысые фестивалым ифинал Iоныгъом и 26-м щегъэжьагъэу чъэпыогъум и 15-м нэс къалэу Ялтэ изыгъэпсэфыпIэ чIыпIэу «Артекым» щыкIощт.