Джэджэхьэблэ врачебнэ амбулаторием терапевтыкIэ иIэ зыхъугъэр бэшIагъэп. Шъоумыз Луизэ федеральнэ программэу «Земский доктор» зыфиIорэмкIэ ащ кIуагъэ.

Специалист ныбжьыкIэр пэIудзыгъэ къоджэ псэупIэм Iоф щишIэныр къыхихыгъ ыкIи программэм къызэрэды­хэлъытагъэу ащ сомэ миллионрэ ны­къорэ къыратыгъ.

Луизэ илIакъокIэ Козэт щыщ, ау Адыгэкъалэ щэпсэу. Мыекъопэ къэралыгъо технологическэ университетым Iэзэн IофымкIэ ифакультет 2022-рэ илъэсым къыухи, Кубанскэ медицинэ университетым иординатурэ чIэхьагъ. А илъэс дэдэм ишэкIогъу мазэ врачебнэ амбулаторием Iухьагъ.

Врач сэнэхьатым урылэжьэныр мы­псынкIэми, ар къыхихыным лъапсэу фэхъугъэм тыщигъэгъозагъ IофышIэ ныбжьыкIэм.

— СицIыкIугъом къыщегъэжьагъэу врач сыхъуным сыкIэхъопсыщтыгъ. Ти­унагъокIи тилIакъокIи щысэтехыпIэ сфэ­хъу­нэу врач тиIэп, ау а сэнэхьатыр лъэшэу сыгу рехьы. Джыри нэмыкI Iоф­шIэн къыхэсхыщтгъагъэу сегупшысэшъурэп. СицIыкIугъом сшIыгъэ гухэлъыр щыIэныгъэм щыпхырысщыным сыпы­лъыгъ ыкIи ар къызэрэздэхъугъэм кIуачIэ хэсэгъуатэ, — къыIуагъ Луизэ.

Участковэ терапевт ныбжьыкIэр зыIут Джэджэхьэблэ врачебнэ амбулаторием Тэуехьаблэ, Городскоим, Къунчыкъохьаблэ ащыпсэухэрэми яфэIо-фашIэхэр егъэцакIэх, пстэумкIи нэбгырэ 1250-рэ фэдиз хэхьэ.

— Зы мафэм нэбгыри 10 фэдиз къытэуалIэу къыхэкIы, — къеIуатэ Луизэ. — Ау сымаджэу зиунэ тыкIон фаер нахьыбэу къыхэкIы. Мы мэфэ фабэхэм лъэшэу лъыдэкIуаем, гуузым, пэтхъу-Iутхъум ыгъэгумэкIыхэрэм япчъагъэ хэ­хъуагъ. Хэти зэрифэшъуашэу ищыкIэгъэ анализхэр, уплъэкIунхэр ясэгъэшIых, Iэзэгъу уцхэр къафисэтхыкIых.

IофшIэныр ебгъэжьэгъакIэ хъумэ, къиныгъохэм уарихьылIэу къыхэкIы, сымаджэхэр къыпщыгугъыхэу уадэжь къызыкIохэкIэ, ахэм ялажьэр тэрэзэу бгъэунэфын ыкIи зэрищыкIагъэм тетэу уяIэзэн фае. АщкIэ упчIэжьэгъоу врач ныбжьыкIэм иIэхэр илъэс пчъагъэ хъугъэу Iоф зышIэрэ иIофшIэгъухэу Къат Зурет Аскэр ыпхъур, ЯхъулIэ Риммэ Кимэ ыпхъур ары. ЗэрафэлъэкIэу зэкIэ къыгурагъаIо, джэуапынчъэу зыкIи къа­гъанэрэп.

ТигущыIэгъу къызэрэхигъэщыгъэмкIэ, IэпэIэсэныгъэшхо зыIэкIэлъ врачхэм рагъэджагъэх, ахэм шIэныгъэу къаратыгъэр джы иIофшIэнкIэ къышъхьапэ. Ау ащ укъыщыуцунэу щытэп, уврач хъумэ, ренэу уишIэныгъэхэм ахэбгъахъо­зэ улэжьэн фае, ащ тапэкIэ ренэу зэрэпылъыщтыр Луизэ къыIуагъ.

— Илъэсныкъом къыкIоцI Шъоумыз Луизэ иIофшIэн зэрифэшъуашэу зэрэзэхищэрэм ишыхьат цIыфхэм зыкъаригъэштэн зэрилъэкIыгъэр, — еIо Теуцожь район гупчэ сымэджэщым иврач шъхьа­Iэу Къат Зурет. — Ар сымаджэхэм IэпыIэгъу зэрафэхъурэм дакIоу жэбзэ дахэкIэ къеуалIэхэрэм апэгъокIы. Джащ фэдэ врач ныбжьыкIэхэр нахьыбэу тищыкIагъэх.

Луизэ зэрилъытэрэмкIэ, узым зыгу ыгъэцIыкIугъэ цIыфым гуфэбэныгъэ пэбгъохымэ, гумэкIыгъоу иIэр нахь псынкIэу щигъэзыещт. Врач ныбжьыкIэр ащ рыгъуазэзэ, къеолIэрэ пстэуми нэгушIоу, Iэдэбныгъэр къебэкIэу апэгъокIы, цыхьэ къызфаригъэшIыным пылъ. Ежьыри сымаджэхэм афэраз, афишIэрэр зэхашIыкIы, «ныбжьыкIэшъ, тицыхьэ телъэп» амыIоу, къедэIух. IэпыIэгъу зищыкIагъэу къеолIэрэ сымаджэм сыдигъуи ишIуагъэ ригъэкIыныр пшъэрылъ шъхьаIэу зыфигъэуцужьыгъ.