2023-рэ илъэсым имэзихэу пыкIыгъэм изэфэхьысыжьхэм защытегущыIэгъэхэ зэхэсыгъо джырэблагъэ АР-м и Прокуратурэ щыкIуагъ. Ащ тхьамэтагъор щызэрихьагъ АР-м ипрокурорэу Игорь Шевченкэм. Iофтхьабзэм хэлэжьагъэх республикэм ипрокурор игуадзэхэр, прокуратурэм иаппарат ыкIи чIыпIэ прокуратурэхэм яIофышIэхэр.

Пэублэм республикэм ипрокурор игуадзэхэу Бэрэтэрэ Аслъанрэ Дмитрий Григорьевымрэ зыфэгъэзэгъэхэ лъэныкъохэмкIэ докладхэр къашIыгъэх. Ахэм къызэраIуагъэмкIэ, илъэсым имэзихэу пыкIыгъэм хабзэр ыкIи рэхьатныгъэр гъэпытэгъэнхэмкIэ, цIыфхэм яфитыныгъэхэр ыкIи яшъхьафитыныгъэ, джащ фэдэу обществэм ыкIи къэралыгъом яфедэхэр къэухъумэгъэнхэмкIэ Iофтхьэбзэ гъэнэфагъэхэр зэрахьагъэх. ЗэкIэмкIи хэбзэукъоныгъэ мини 7,6-м ехъу зэрахьагъэу агъэунэфыгъ, IэнатIэм Iут нэбгырэ 1563-мэ дисциплинарнэ, нэбгырэ 278-мэ административнэ пшъэдэкIыжьхэр арагъэхьыгъэх. Прокурор уплъэкIунхэм къакIэлъыкIоу уголовнэ Iоф 26-рэ къызэIуахыгъ.

Прокурорхэр Iофхэм захаплъэхэм республикэм ипредприятиехэм ыкIи иорганизациехэм яIофышIэ 518-мэ яфитыныгъэхэр зэтырагъэуцожьыгъэх, сомэ миллион 19-м ехъу аратыжьыгъ. Предпринимательхэм яфитыныгъэхэм япхыгъэу хэукъоныгъэ 372-м ехъу прокурорхэм къыхагъэщыгъ. Дисциплинарнэ ыкIи административнэ пшъэдэкIыжь нэбгырэ 90-мэ арагъэхьыгъ, шэпхъэ хэбзэ акт 29-м емызэгъыхэу прокурорхэм къызэкIагъэкIожьыгъ.

Бизнесым пылъхэм яхэбзэ фитыныгъэхэр амыукъонхэм фэшI планым хэтэу ыкIи хэмы­тэу уплъэкIун Iофтхьабзэхэр прокурорхэм зэрахьагъэх. Ащ нэмыкIэу къэралыгъо ыкIи муниципальнэ зэзэгъыныгъэхэм апэIухьащт ахъщэр заказ зытырэм IэкIагъэхьаным лъыплъа­гъэх. Мы лъэныкъомкIэ чIыфэу ателъыгъэ сомэ миллиони 4,8-рэ арагъэпщыныжьыгъ.

Мы пIалъэм къыкIоцI бзэджэшIагъэу зэрахьагъэр процент 21,9-кIэ нахь макIэу агъэунэфыгъ. БзэджэшIэгъэ хьылъэ ыкIи хьылъэ дэдэ зезыхьагъэхэм япчъагъэ процент 1,5-кIэ къеIы­хыгъ. Къолъхьэ тын-Iыхыным епхыгъэ бзэджэшIагъэу зэрахьэхэрэми прокуратурэр лъэшэу ынаIэ тет. Къолъхэ тын-Iыхыным пэшIуекIогъэнымкIэ хэбзэгъэуцугъэр аукъуагъэу 189-рэ къыхагъэщыгъ, нэбгыри 126-мэ административнэ ыкIи дисциплинарнэ пшъэдэкIыжьхэр арагъэ­хьыгъэх.

Игорь Шевченкэм зэхэсы­гъом зэфэхьысыжь къыфишIызэ къызэриIуагъэмкIэ, анахь шъхьа­Iэу щытын фаер цIыфхэм ясоциальнэ фитыныгъэхэр къэухъу­мэгъэнхэм ыкIи зэтегъэуцожьыгъэнхэм, Iэзэгъу уцхэр ыкIи медицинэ пкъыгъохэр, сэкъатныгъэ зиIэхэр щыIэныгъэм хэгъэгъозэжьыгъэнхэмкIэ ящыкIэгъэщт техникэр аIэкIэгъэхьэгъэным епхыгъэ Iофыгъохэр ары. Джащ фэдэу зыныбжь имыкъугъэхэм, анахьэу сабый ибэхэм, псэупIэхэр ягъэгъотыгъэнхэу, социальнэу мыухъумэгъэ цIыфхэм анаIэ атырагъэтынэу къафигъэпытагъ.

Джащ фэдэу цIыфхэм яIоф­шIэн фитыныгъэхэр амыукъонхэм фэшI уплъэкIун ыкIи лъып­лъэкIо къулыкъухэм яуполномоченнэхэм, шъолъырым ихэбзэухъумэкIо къулыкъухэм зэхэубытэгъэ Iофтхьабзэхэр зэхащэнхэу къариIуагъ.

КIАРЭ Фатим.