Тарихъ чIыгужъым къэзыгъэзэжьыгъэм и Мафэ фэгъэхьыгъэ Iофтхьабзэхэр непэ Адыгеим щызэхащагъэх.

Илъэс 25-кIэ узэкIэ­Iэ­бэжьмэ, 1998-рэ илъэсым ишышъхьэIу мазэ куп хъу­хэу адыгэхэр зао зыщыкIощтыгъэ Косовэ къызэрикIыжьыгъэхэм, Хэку­жъым ахэр къызэрэкощы­жьыгъэхэм япхыгъэу мы мафэр агъэнэфагъ.

Хабзэ зэрэхъугъэу, рес­публикэм ичIыпIэ зэфэшъхьафхэми, Мыекъуапи зи Хэкужъ къэзыгъэзэжьы­гъэм и Мафэ Iофтхьэбзэ гъэшIэгъонхэр ащызэхащэх. ЗыкIыныгъэмрэ ЗэгурыIоныгъэмрэ япчэгу тарихъ чIыгужъым къэзыгъэзэжьыгъэ тилъэпкъэгъу­хэр бэ хъухэу къыщызэрэугъоигъэх. Джащ фэдэу хэбзэ къулыкъухэм, общественнэ организациехэм ялIыкIохэри, республикэм щыпсэухэрэри, ихьакIэхэри ахэм ахэтыгъэх.

Республикэм и ЛIышъхьэ мэфэкIым имэхьанэ къыIэтэу хигъэунэфыкIыгъэмэ ащыщ тарихъ чIыгу­жъым къэзыгъэзэ­жьыгъэхэм щыIэ­кIэ-псэукIэ тэрэз яIэнымкIэ илъэс 25-м къыкIоцI Адыгеим бэ зэрэщызэшIуахыгъэр. Республикэм исхэми, общественнэ организацие зэ­фэшъхьафхэми мы Iофым яIахьышхо ха­шIыхьэ. ЛъэгэпIэ зэфэшъхьафхэм ащы­зэрахьэрэ амал­хэм яшIуагъэкIэ ти­лъэпкъэгъухэм псын­­кIэу урысые обществэм чIыпIэ гъэнэфагъэ щау­быты.

Федеральнэ хэ­бзэ къулыкъухэм мы Iофым къызэрэдырагъэштагъэм, Адыгеим ихэбзэ къулыкъухэмрэ иобщест­веннострэ Iофтхьабзэу зэ­рахьагъэхэм яшIуагъэкIэ илъэс 25-кIэ узэкIэIэбэжьмэ, зао зыщыкIощтыгъэ Косовэ исыгъэ адыгэхэм яапэрэ куп тарихъ чIыгу­жъым къыгъэзэжьыгъагъ. ЫужкIи тилъэпкъэгъухэр тадэжь къэкощыжьыгъэх. А хъугъэ-шIагъэхэм дунэе мэхьанэшхо яIагъ. Тихэ­гъэгу тилъэпкъэгъухэм Iэ­пыIэгъу зэрафэхъугъэм нафэ къышIыгъ зэкъош зэфыщытыкIэхэр адыриIэным ар ренэу зэрэфэхьазырыр. Лъэпкъ шэн-ха­бзэхэр къызэтегъэнэжьыгъэнхэмкIэ, IэкIыб къэралыгъохэм арыс тилъэпкъэ­гъухэм культурэ-гуманитар зэпхыныгъэу адытиIэм зегъэушъомбгъугъэнымкIэ ащ фэдэ екIолIакIэр лъэ­псэшIоу щыт.

Тыркуем, Шам, Иорданием, Израиль, Европэм къарыкIыжьыгъэ тилъэп­къэгъу 2000 фэдиз непэ республикэм ис. Ахэм ащыщыбэмэ ящыIэныгъэ чIыпIакIэм щызэтеуцуагъ, Iоф ашIэ, еджэх. ЗичIыгужъ къэзыгъэзэжьыгъэхэм якIэ­лэцIыкIухэу республикэм къыщыхъугъэхэм ялIэужыкIэ Адыгеим къыщэтэджы. Ахэм гъэсэныгъэ зэрагъэ­гъоты, Урысые Федера­цием и УIэшыгъэ КIуачIэ­хэм къулыкъу ащахьы, Iоф ашIэ.

ЧIыгужъым къэзыгъэзэжьыгъэхэм илъэс 25-м къыкIоцI гъогоу къакIугъэр сурэтхэм, живописым, графикэм, скульптурэхэм, нэмыкI IэшIагъэхэм къащыгъэлъэгъуагъэ хъугъэ. Адыгэ Республикэм исурэт къэгъэлъэгъуапIэ бэмышIэу къыщызэIуахыгъэ къэ­гъэлъэгъонэу «Кавказская диаспора» зыфиIорэм иэкспозицие ахэм ащыщ­хэр хагъэхьагъэх.

Джащ фэдэу мэфэкIым хэлэжьагъэхэм амал яIагъ лъэпкъ IэшIагъэхэм нэIуасэ къэгъэлъэгъоным защыфашIынэу.

ЗичIыгужъ къэзыгъэзэжьыгъэм и Мафэ мэфэкI концертым къыгъэдэхагъ. Рес­пуб­ликэм итворческэ коллектив зэфэшъхьафхэр: Адыгеим лъэпкъ орэдымкIэ ыкIи къашъомкIэ и Къэралыгъо ансамблэу «Ислъамыер», Адыгэ Республикэм искусствэхэмкIэ икIэ­лэцIыкIу еджапIэу Лъэ­цэрыкъо Кимэ ыцIэ зыхьырэр, творческэ объединениеу «Ошъад», адыгэ къа­шъомкIэ лъэпкъ ансамблэу «Абреки» зыфиIорэр, Адыгэ Рес­публикэм изаслуженнэ артистхэу Дау­тэ Сусаннэрэ Лъачэ Альбертрэ ыкIи нэмыкIхэр ащ хэлэжьагъэх. Адыгэ джэгукIэ мэфэкIыр аухыгъ.

Сурэтхэр: А. Гусев.