Форумэу «Урысыер — Африкэр»
Адыгэ къэралыгъо университетым илIыкIо купэу ректорэу Мамый Даутэ зипащэр «Урысыер — Африкэр» зыфиIорэ ятIонэрэ экономикэ ыкIи гуманитар форумым хэлэжьагъ, ар бэдзэогъум и 27 — 28-м Санкт-Петербург щырекIокIыгъ. УФ-м и Президентэу Владимир Путиныр ыкIи Африкэм икъэралыгъохэм япащэхэр форумым къеблэгъэгъагъэх.
Саммитым иIофшIэн къыдыхэлъытагъэу АКъУ-м иректор тематическэ сессиехэм ахэлэжьагъ ыкIи африкэ хэгъэгухэм яапшъэрэ гъэсэныгъэ системэ илIыкIомэ зэIукIэгъухэр адыриIагъ. Адыгэ къэралыгъо университетым истендэу апшъэрэ еджапIэм ишIэныгъэ-гъэсэныгъэ ыкIи иинновационнэ проектхэм якъэбар къызщыраIотыкIырэр къэгъэлъэгъопIэ гупчэу «Экспофорум» зыфиIорэм щагъэуцугъагъ. Программэу «Приоритет 2030» зыфиIорэмкIэ агъэцакIэрэ проектхэр, Кавказ хьисап гупчэр, ныбжьыкIэ шIэныгъэ лабораториеу агъэкIэжьырэ энергием дэлажьэрэр ыкIи нэмыкI лъэныкъуабэхэр ащ къыщагъэлъэгъуагъэх.
Африкэм ит къэралыгъохэр зыщыкIэхэрэ кадрэхэм ягъэхьазырынкIэ апшъэрэ еджапIэхэм адэлэжьэгъэныр ары нахь мэхьанэ зэратырэ Iофыгъоу форумым къыщаIэтыгъэр. Урысыем иапшъэрэ еджапIэхэм студент мин 34-рэ джырэ уахътэм ащеджэ. Гъэ къэс бюджет чIыпIэхэр нахьыбэ ашIых. 2020-рэ илъэсым УФ-м и Правительствэ Африкэм къикIырэ студентмэ квотэ 1700-рэ аритыгъ, 2023рэ илъэсым ар 4700-рэ хъугъэ.
«Урысыер — Африкэр: университетхэр зэдэлэжьэнхэмкIэ гугъапIэу щыIэр» зыфиIорэ сессием хэлэжьагъэхэм ащыщыгъ АКъУ-м иректорэу Мамый Даутэ. ЗэхэгущыIэжь Iофтхьабзэм хэлэжьагъэх Урысые Федерацием шIэныгъэмрэ апшъэрэ гъэсэныгъэмрэкIэ иминистрэу Валерий Фальковыр, Урысыем ыкIи Африкэм яапшъэрэ еджапIэхэм яректорхэр ыкIи ялIыкIохэр. Сессиер зэрищагъ Московскэ къэралыгъо университетэу М. В. Ломоносовым ыцIэ зыхьырэм иректорэу, Урысыем иректорхэм я Союз ипрезидентэу, РАН-м иакадемикэу Виктор Садовничэм.
«Урысыер — Африкэр» зыфиIорэ ятIонэрэ саммитыр мэхьанэшхо зиIэ Iофтхьабзэ хъугъэ. Африкэм икъэралыгъохэм япэщэ 17 ыкIи ахэм ягъусэгъэ лIыкIо 49-рэ форумым ихьэкIагъэх. Я 21-рэ лIэшIэгъум къыгъэнэфэрэ пшъэрылъыкIэхэм язэшIохын саммитыр фытегъэпсыхьагъэ хъугъэ, политикэм, щынэгъончъэным, экономикэм, шIэныгъэ-техническэ ыкIи культурнэ-гуманитар лъэныкъохэмкIэ зэрэзэдэлэжьэщтхэм фэгъэхьыгъэ унашъохэр аштагъэх.
Адыгэ къэралыгъо университетым ипресс-къулыкъу