Къэралыгъо программэхэм яшIуагъэкIэ Шэуджэн районым кIэлэцIыкIу IыгъыпIищ кIэу щашIы. Ахэм ащыщэу Тихоновым дагъэуцуагъэр мэкъуогъум и 1-м мэфэкI шIыкIэм тетэу къызэIуахыгъ. Хьатыгъужъыкъое ыкIи Зарево къоджэ псэупIэм ащашIыхэрэр мы илъэсым къызэIуахынхэу агъэнафэ. КIэлэцIыкIу IыгъыпIищыри джырэ шапхъэхэм атегъэпсыхьагъэх.

— Лъэпкъ проектхэмрэ къэралыгъо программэхэмрэ ахэхьэгъэ псэуалъэхэр зэкIэ ипIалъэм шIыгъэнхэм ыкIи ахэм язытет шапхъэхэм адиштэным, кIэлэцIыкIухэр дэгъоу пIугъэнхэм, щынэгъончъэным епхыгъэ Iоф­тхьабзэхэр зэкIэ гъэцэкIагъэ хъунхэм анаIэ тырагъэтын фае. Къуаджэхэм адэлъ щыIакIэр Iэрыфэгъоу щытыным, цIыфхэм ящыкIэгъэ фэIо-фашIэхэр, анахьэу етIани кIэлэцIыкIухэм, ягъэгъотыгъэнхэм япхыгъэ IофшIэныр лъыгъэ­кIотэгъэным мэхьанэшхо иI», — къыщиIогъагъ КъумпIыл Мурат Шэуджэн районым зэкIом. Непэ IофшIэнхэр зэрэкIохэрэм АР-м и ЛIышъхьэ лъэшэу ынаIэ тет.

Заревэм щашIырэ кIэлэцIыкIу IыгъыпIэм бэмышIэу тыщыIагъ ыкIи къоджэ псэупIэм ипащэу Хьамырзэкъо Мурат гущыIэгъу тыфэхъугъ. Псэуалъэм ишIын зынагъэсыгъэм ащ тыщигъэгъозагъ.

— АР-м и ЛIышъхьэу КъумпIыл Мурат, федеральнэ хэбзэ къулыкъухэм яIэпыIэгъу яшIуагъэкIэ цIыфхэр бэрэ зэжэгъэхэ кIэлэцIыкIу IыгъыпIэр типсэупIэ шIэхэу къыщызэIутхыщт. Ащ къыхэкIыкIэ IофшIэпIэ чIыпIэ 40 кIэу тиIэщт ыкIи Iоф зымышIэхэрэм япчъагъэ зэхапшIэу нахь макIэ хъущт, кIэлэцIыкIу IыгъыпIэм кIонхэм пае чэзыу тиIэжьыщтэп, — еIо тигущыIэгъу.

Къэралыгъо программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэм къыдыхэлъытагъэу псэуа­лъэр ашIы. ЕджапIэм джыри мыкIорэ кIэлэцIыкIуи 120-м ар афытегъэпсыхьагъ. Сомэ миллиони 173-м ехъу пэIухьанэу агъэнафэ.

Зарево къоджэ псэупIэм къутыри 10 хэхьэ. Илъэс 20-кIэ узэкIэIэбэжьмэ мы чIыпIэм кIэлэцIыкIу IыгъыпIэу тетыгъэр стыгъагъэ, агъэкъэбзэжьи, нэкIэу щытыгъ. 2022-рэ илъэсым мэзэе мазэм къэралыгъо программэм ишIуагъэкIэ кIэлэцIыкIу IыгъыпIэм ишIын аублагъ. IофшIэнхэр пшъэрылъэу иIэмкIэ гъунэпкъэ гъэнэфагъэ зиIэ обществэу «СМУ- 38-м» егъэцакIэх.

КъатитIоу зэтет кIэлэцIыкIу IыгъыпIэм итеплъэ дахэ. ПсэолъэшIхэм унэр ашIыгъах, ащ ыкIоцI ыкIи гупэм япхыгъэ IофшIэнхэри ыкIэм фэкIох, инженер коммуникациехэр зэрифэшъуашэу агъэ­псыгъэх.

Аужырэ шапхъэхэм адиштэу кIэлэцIыкIухэр зычIэсыщтхэр, зыщыджэгущтхэр, япсауныгъэ зыщапсыхьащт спортзалыр, Iофтхьэбзэ зэфэшъхьафхэр зыщызэхащэщтхэр хэтых, ахэр иных, лъа­гэх. Ащ нэмыкIэу медицинэм иIофы­шIэ зычIэсыщтыр, шхапIэр ыкIи нэмыкI­хэр къыдыхэлъытагъэх. КъатитIоу зэтет кIэлэцIыкIу IыгъыпIэм апэрэ къатым купи 4, ятIонэрэм купи 2 ащаIыгъынэу агъэпсыгъ.

Тэ тызэкIом, псэуалъэм ыкIоцI ипроцент 80-р хьазырыгъ, дэпкъхэр ятIонэрэу къагъэлэжьынхэу, джэхашъохэм линолеумэу тырадзэщтыри къафащэжьыгъэу IофшIэнхэм афежьэнхэу щытыгъ.

— КIэлэцIыкIухэр зычIэсыщтхэр пшIыным пшъэдэкIыжь ин пылъ. Гупсэфэу, Iэрыфэгъоу щытын фае. Тэрэзэу къэфэбэным, электричествэр зэпыу имыIэу къекIолIэным лъэшэу тынаIэ тет. ЫпэрапшIэу сыд фэдэ лъэныкъокIи щынэгъон­чъэ­­ным ишапхъэхэр зэрифэ­шъуашэу тэгъэцакIэх. Джэха­шъохэм тырадзэщт линолеумри экологическэ шъыпкъэхэм адештэ, ычIэгъкIэ машIом зыкъыщимыштэнэу гъэпсыгъэ. IофшIэнхэр чъэпыогъум къэ­тыухынхэу щыт, ау ыпэ титэу тэкIо, сыда пIомэ дгъэцэкIэжьын горэ къыхэкIымэ, игъо тифэн фае, — еIо пшъэ­рылъэу иIэмкIэ гъунэпкъэ гъэнэфагъэ зиIэ обществэу «СМУ-38-м» ипрорабэу Шъхьэлэхъо Алый.

Сабыйхэр щагум къызыращхэкIэ зыщыджэгущтхэ гъэIагъэхэр агъэхьазырыгъэх, щагум мыжъуакIэ датэкъуагъ, дагъэчIыкIыжьынэу щытыгъ. Мафэм нэбгырэ 40 фэдизмэ Iоф ашIэу къыхэкIы.

— ПсэолъэшIыным бэшIагъэ сызхэтыр, къасIомэ сшIоигъу джы тшIырэ кIэлэцIыкIу Iы­гъыпIэхэр ыпэрэхэм бэкIэ зэратекIыхэрэр. Зэтегъэпсыхьа­гъэх, иных, ахэтын фаер зэкIэ проектхэм къыдалъытэ. Iоф­шIэныр уухэу кIэлэцIыкIухэр о пшIыгъэ псэуалъэм ашIогупсэфэу, агу рихьэу, гушIоу къекIуа­лIэхэ зыхъукIэ, тиIофшIэн мэхьанэу иIэр зэхэтэшIэ, — еIо прорабым.

Зарево къоджэ псэупIэм хэхъоныгъэхэр ышIынхэмкIэ республикэм ихэбзэ къулыкъухэм лъэшэу яшIуагъэ къызэ­рарагъэкIырэмкIэ зэрафэразэхэр Хьамырзэкъо Мурат къыIуагъ. Лъэпкъ про­ект­хэм, къэралыгъо программэхэм яшIуагъэкIэ хэхъоныгъэхэр ашIых. Ащ ишIуагъэкIэ ныбжьыкIэу дэкIыжьхэрэр нахь макIэ хъунэу, ахэм къагъэзэжьынымкIэ ишIуагъэ къэкIонэу ыкIи къоджэ псэупIэм демографиемкIэ изытет нахь дэгъу хъунэу зэрэгугъэхэрэр пащэм къыIуагъ.

ДЕЛЭКЪО Анет. Сурэтхэр: Iэшъынэ Аслъан.