Орденэу «Родительская слава» зэратыгъэ унагъохэм УФ-м и Президентэу Владимир Путиныр Кремлым ащыIу­кIагъ. Сабыибэ зэрыс Шишкинхэм яунагъоу Адыгеим икIыгъэр ахэм ахэтыгъ.

Поклоннэ Iуашъхьэм тет ТекIоныгъэм имузей, ВДНХ-м, зоопаркым, океоанариумым, циркым, зыгъэ­псэфыпIэ паркэу «Зарядье» къарагъэплъыхьагъэх, къухьэм исхэу псыхъоу Москва техьагъэх.

Къэралыгъом ипащэ са­быибэ зэрыс унагъохэу ригъэблэгъагъэхэм ады­ри­Iэгъэ зэIукIэгъум илъэ­хъан алъэгъугъэм аригъэ­шIыгъэ шIошIхэмкIэ дэгощагъэх, Москва кIонхэ алъэкIынымкIэ IэпыIэгъу зэрафэхъугъэм пае зэрэ­фэразэхэр хагъэунэфыкIыгъ.

Сабыибэ зэрыс унагъо­хэм къэралыгъор зэрарыгушхорэр Владимир Пу­тиным къыкIигъэтхъыгъ. ШIу­лъэгъуныгъэр, гукIэ­гъур, лъытэныгъэр, зэде­Iэжьныгъэр ахалъхьэзэ зи­сабыйхэр зыпIурэ ны-тыхэр нэмыкIхэм щысэтехыпIэ зэрафэхъухэрэр къыхигъэщыгъ.

Мы зэIукIэгъум осэшхо фишIэу АР-м и ЛIышъхьэу КъумпIыл Мурат хигъэунэфыкIыгъ: «Сабыибэ зыщапIурэ унагъом нахь лъапIэ зыпари щымыIэу Владимир Путиным къы­зэрэкIигъэтхъырэм де- сэгъаштэ. Сабыйхэр зэрыс унагъохэм IэпыIэгъу та­фэхъуным пае тфэлъэ­кIыщтыр зэкIэ тэшIэ».