Урысые Федерацием и Правительствэ и Тхьаматэ игуадзэу Александр Новак газификациемкIэ федеральнэ штабым изэ­хэсыгъо тыгъуасэ зэрищагъ. ГазификациемкIэ программэр зэрэпхы­ращырэм, Президентэу Владимир Путиным пшъэ­рылъэу къафишIыгъэхэр агъэцакIэхэзэ, цIыф куп заулэмэ Iэпы­Iэгъу зэрафэхъухэрэм мыщ щатегущыIагъэх.

Республикэм и ЛIы­шъхьэу КъумпIыл Мурат пшъэрылъ къызэрэфишIыгъэм тетэу АР-м иминист­рэхэм я Кабинет и Тхьаматэ игуадзэу ЛIыхэсэ Махьмуд Адыгеим ыцIэкIэ видеозэпхыныгъэ шIыкIэм тетэу кIогъэ зэIукIэм хэлэжьагъ. Видеоконференцием джащ фэдэу хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м экономикэ хэхъоныгъэмкIэ ыкIи сатыумкIэ иминистрэу Шэу­джэн Заур, пшъэдэкIыжьэу ыхьырэмкIэ гъунэпкъэ гъэ­нэфагъэ зиIэ общест­вэу «Газпром межрегионгаз Майкоп» игенеральнэ пащэу ЕкъутэкI Аслъан, республикэм иминистрэ­хэм я Кабинет хэтхэр.

Александр Новак ипэублэ псалъэ зэрэщыхигъэу­нэфыкIыгъэмкIэ, социальнэ газификациемкIэ программэр хэгъэгум ишъо­лъыр пстэуми анахь щырящыкIагъэхэм, «Единэ Россиер» кIэщакIо зыфэ­хъугъэхэм, Президентэу Владимир Путиным къызы­дыригъэштагъэхэм ащыщ.

Зэхэсыгъом зэрэщыхагъэунэфыкIыгъэмкIэ, пстэумкIи зэрэхэгъэгоу лъэIу тхылъ миллионрэ мин 300-рэ къыщатыгъ, илъэсныкъом лъэIу тхылъ мин 257-рэ Iахьтедзэу къаIэкIагъэхьагъ. Тхылъ мин 990-мэ адэлажьэх, процент 94-мкIэ зэзэгъыныгъэхэр адашIыгъэх, тхылъхэм япроцент 71-м арытхэр афагъэцэкIагъэх.

Социальнэ псэуалъэхэм ягазификациекIэ, газ зэраIэкIагъэхьэрэ программэхэм ягъэцэкIэнкIэ шъо­лъыр штабхэм 2023-рэ илъэсым ия 2-рэ кIэлъэныкъо Iоф зыдашIэщт лъэныкъохэр зэхэсыгъом щагъэнэфагъэх. Шъолъыр­хэм игъо афалъэгъугъ газификациемкIэ пшъэ­рылъэу зыфашIыжьыгъэ­хэр агъэцэкIэнэу, IофшIэнхэмкIэ пIалъэхэр амыу­къонэу, фэгъэкIотэныгъэ зиIэ цIыф купхэм социальнэ IэпыIэгъу арагъэ­гъотынэу.

Социальнэ газификациемкIэ программэм къыдилъытэрэ Iофтхьабзэхэр Адыгеим зэрэщагъэцакIэ­хэрэм республикэм и ЛIышъхьэ ышъхьэкIэ гъунэ алъефы. КъумпIыл Мурат шъолъыр штабым пшъэ­рылъ фишIыгъ программэм игъэцэкIэнкIэ Iофхэр къырамыгъэIыхынхэу. Джы­дэдэм газрыкIуапIэм пышIэгъэнхэмкIэ зэзэгъы­ныгъэ 6905-рэ респуб­ли­кэм щадашIыгъ, газры­кIуапIэхэр унэ 4424-мэ ягъунапкъэхэм анагъэ­сыгъ, унэгъо 1616-рэ гъэ­стыныпхъэ шхъуантIэм пашIэгъах.

ФэгъэкIотэныгъэ зиIэ цIыф купхэм IэпыIэгъу ягъэгъотыгъэнымкIэ Адыге­им и ЛIышъхьэ пшъэ­рылъ заулэ афи­шIыгъ. АР-м IофшIэнымкIэ ыкIи социальнэ хэхъоныгъэмкIэ и Министерствэ къызэритыгъэмкIэ, унэхэм газ афищэгъэным тегъэпсы­хьагъэу хэушъхьафыкIыгъэ дзэ операцием хэлажьэ­хэрэм зэтыгъо ахъщэ IэпыIэгъу къафыхагъэкIы. ХэушъхьафыкIыгъэ дзэ операцием хэлажьэхэрэм ащыщэу лъэIу тхылъ къязыхьылIэгъэ нэбгырэ 79-мэ сомэ мини 100 аратыгъ. ПстэумкIи 2023-рэ илъэсым яунэ газ ещэлIэгъэнымкIэ зэтыгъо ахъщэ IэпыIэгъу къаратыным пае справкэ 236-рэ фэгъэкIо­тэныгъэ зиIэхэм къафыратхыкIыгъ.