Адыгэ Республикэм гъогухэр щынэгъончъэнхэмкIэ икомиссие изэ­хэсыгъоу Адыгеим и ЛIы­шъхьэу КъумпIыл Мурат тхьамэтагъор зыщызэрихьагъэм 2023-рэ илъэсым иапэрэ кIэ­лъэныкъо республикэм игъо­гухэм тхьамыкIагъоу атехъухьагъэхэм, гъогу­хэр щынэгъончъэнхэмкIэ, тхьамыкIагъохэм нахь макIэу цIыфхэр ахэ­кIодэнхэмкIэ амалэу зэрахьэхэрэм щатегущыIагъэх.

АР-м хэгъэгу кIоцI Iоф­хэмкIэ и Министерствэ ГИБДД-мкIэ и ГъэIорышIапIэ ипащэ ипшъэрылъхэр зыгъэцэкIэрэ Тхьаркъохъо Юсыф доклад шъхьаIэр мыщ къыщишIыгъ. Минис­терствэм къызэритыгъэмкIэ, мы илъэсым иапэрэ кIэлъэныкъо Адыгеим игъо­гухэм тхьамыкIэгъуи 190-рэ атехъухьагъ. Нэбгырэ 23-рэ ахэм ахэкIодагъ, 227-мэ шъобжхэр атещагъэ хъугъэ. Гъогухэм къащыхъугъэ тхьамыкIа­гъохэм нэбгыри 5-кIэ нахь макIэу ахэкIодагъ. ТхьамыкIагъо къызэхъулIэрэ лъэсрыкIохэмрэ кIэлэцIыкIухэмрэ ахэхъуагъ.

«Мы аужырэ тхьама­фэхэм кIэух дэй зыфэ­хъугъэ тхьамыкIэгъо заулэ гъогухэм атехъухьагъ. Пшъэ­дэкIыжь зыхьырэ Iэшъхьэтетхэми, чIыпIэхэм япащэхэми мы Iофыгъом нахь лъэшэу анаIэ тырагъэтынэу сялъэIу. Тхьамы­кIагъохэр зыпкъ къикIы­гъэр зэрагъэшIэн, зэфэ­хьысыжьхэр ашIын, ахэр къэмыхъунхэмкIэ ищыкIэгъэ амалхэр зэрахьанхэ фае», — къыIуагъ Адыге­им и ЛIышъхьэ.

Гъогухэр щынэгъончъэн­хэм япхыгъэ нэмыкI Iофы­гъохэми комиссием хэтхэр ахэплъагъэх. Ахэм ащыщ зыныбжь имыкъугъэхэм автомобильхэмрэ мототранспортымрэ зэрэзэра­фэхэрэр, электросамокатхэр жъугъэу зэрагъэфедэ­хэрэр.

Республикэм и ЛIы­шъхьэ муниципалитетхэм япащэхэмрэ хэбзэухъумэкIо къулыкъухэмрэ пшъэ­рылъ афишIыгъ ищыкIэгъэ пэшIорыгъэшъ Iофтхьа­бзэхэр зэрахьанхэу. Мые­къуапэ иадминистрацие пшъэрылъ фашIыгъ электросамокатхэр къалэм зэрэщагъэфедэхэрэм, ахэр прокат зэрашIыхэрэм шэпхъэ икъу хилъхьанэу.

Лъэпкъ проектэу «Шэп­хъэшIухэм адиштэрэ гъогу щынэгъончъэхэр» зыфи­Iорэр 2023-рэ илъэсым иапэрэ кIэлъэныкъо рес­публикэм зэрэщагъэцэкIагъэм зэхэсыгъом щытегущыIагъэх. Адыгеяавтодорым къызэритыгъэмкIэ, республикэ проектэу ­«Гъо­гу щынэгъончъэхэр» зыфиIорэм игъэцэкIэн пае 2023-рэ илъэсым сомэ миллион 504-рэ федеральнэ бюджетым, сомэ миллиард 1,7-рэ республикэ бюджетым къахагъэкIыгъ. А мылъкум щыщ муниципальнэ образованиехэм субсидиеу аратыгъ, рес­пуб­ликэ мэхьанэ зиIэ ав­томобиль гъогухэр агъэ­цэкIэжьыгъэх.

2023-рэ илъэсым иапэ­рэ кIэлъэныкъо республи­кэ мэхьанэ зиIэ автомобиль гъогухэм яIахь 13-мэ, чIыпIэ мэхьанэ зиIэ автомобиль гъогухэу кило­метрэ 11 зикIыхьагъэмэ Iоф­шIэнхэр ащаухыгъэх. ЯтIонэрэ илъэсныкъоми республикэ мэхьанэ зиIэ автомобиль гъогухэу километрэ 49-рэ зикIыхьагъэхэм ягъэцэкIэжьын аухынэу рахъухьэ. Джащ фэдэу искусственнэ псэуа­лъэхэр шапхъэм диштэу зэтегъэпсыхьэгъэнхэмкIэ псэолъищмэ IофшIэнхэр ащэкIох. Муниципальнэ образованиеу «Яблоновскэ къэлэ псэупIэм» иавтомобиль гъогоу километри 4 зикIыхьагъэм тет псэолъи 5-мэ ягъэцэ­кIэжьынкIэ IофшIэнхэр аухынхэу рахъухьэ. Федеральнэ гъогухэу Адыгеим пхырыкIхэрэр шапхъэм диштэу зэтырагъэпсы­хьанхэу, тхьамыкIагъо къызыщыхъун ылъэкIыщт чIыпIэхэр агъэцэкIэжьынхэу КъумпIыл Мурат зэ­хэсыгъом пшъэрылъ щафишIыгъ.

Гъогу хъызмэтшIапIэу «Черноморьем» и ГъэIорышIапIэ ипащэ игуадзэу Юрий Усачевым зэхэсыгъом къызэрэщиIуагъэмкIэ, гъогухэм яIыгъынкIэ зэзэгъыныгъэхэр адашIыгъэх, мылъку тедзэ къы­хэгъэкIыгъэнымкIэ лъэIу тхылъ Федеральнэ гъогу агентствэм IэкIагъэхьагъ. Илъэсэу итыр имыкIызэ тхьамыкIагъо къызщыхъу­рэ чIыпIэхэр зэтегъэпсы­хьэгъэнхэмкIэ IофшIэнхэр зэхэзыщэщт подрядчикыр агъэнэфагъ.

«Республикэм игъогу­хэр щынэгъончъэнхэм пае хабзэм иреспубликэ, имуниципальнэ, хэбзэухъумэкIо къулыкъухэм, автомобиль гъогухэр зыфэгъэзагъэхэм яшъыпкъэу Iоф зэдашIэн фае. Тэ анахьэу тызпылъын фаер цIыфхэм ящыIэныгъэ къэухъумэ­гъэныр ары», — къыIуагъ КъумпIыл Мурат.

АР-м и ЛIышъхьэ ипресс-къулыкъу