ШышъхьэIум и 1-р — зи Хэкужъ къэзыгъэзэжьыгъэм и Маф
Лъытэныгъэ зыфэсшIырэ силъэпкъэгъухэр, сичIыпIэгъухэр!
Дунэе Адыгэ Хасэм игъэцэкIэкIо комитет ыцIэкIи, сэ сшъхьэкIи зи Хэкужъ къэзыгъэзэжьыгъэм и МафэкIэ сыгу къыздеIэу сышъуфэгушIо!
АдыгэхэмкIэ мыр мэфэ лъэпIэ дэдэу щыт. ЛIэшIэгъу плIанэкIэ узэкIэIэбэжьмэ, Косовэ зао зэрэщыкIощтыгъэм ыпкъ къикIыкIэ куп хъухэу адыгэхэр тарихъ чIыгужъым къызэрэкощыжьыгъагъэхэм епхыгъэу ар хагъэунэфыкIы.
Джащыгъум адыгэхэм зэрэдунаеу рагъэлъэгъугъагъ азыфагу зыкIыныгъэ зэрилъыр, зэлъэпкъэгъухэр зэрэзэфэгумэкIыжьыхэрэр.
Урысые Федерацием ипащэхэр мы общественнэ-политическэ хъугъэ-шIэгъэ иным чанэу зэрэхэлэжьагъэхэм тихэгъэгу иавторитет дунаим къызэрэщиIэтыгъэм имызакъоу, ятэжъ пIашъэхэм ячIыгужъ адыгэхэр къэщэжьыгъэнхэми фэIорышIагъ.
ЩыIэныгъэм чIыпIэ къин ригъэуцуагъэхэм анэмыкIхэми тарихъ чIыгужъым къызэрагъэзэжьырэр сигуапэу хэсэгъэунэфыкIы. Ежьхэм агу къызэрариIорэм тетэу тилъэпкъэгъубэ яхэкужъ къэкIожьы. IэкIыб къэралыгъомэ къарыкIыжьыгъэ нэбгырэ 5000-м ехъумэ тарихъ чIыгужъым непэ хэхъоныгъэу ышIыхэрэм яIахьышIу хэлъ. Тилъэпкъэгъухэр щыIэкIэ-псэукIакIэм хэгъэгъозэжьыгъэнхэмкIэ къэралыгъо хэбзэ къулыкъухэм бэ зэшIуахырэр.
Зи Хэкужъ къэзыгъэзэжьыгъэхэу лъытэныгъэ зыфэсшIыхэрэр! Шъуятэжъ пIашъэхэм ячIыгужъ шъупэIапчъэу илъэсыбэрэ шъузыпсэугъэ нэуж тарихъ чIыгужъым къызэрэжъугъэзэжьыгъэмкIэ лIыгъэ зешъухьагъ. Дунаим ичIыпIэ зэфэшъхьафхэм шъо шъуакъыщыхъугъэми, тарихъ чIыгужъым ренэу зэпхыныгъэ дышъуиIагъ, тилъэпкъ ишэн-хабзэхэр къэшъуухъумагъэх. Тарихъ чIыгужъым шъукъызэрэкIожьыгъэмкIэ шъуятэжъ пIашъэхэр зыкIэхъопсыщтыгъэхэр къыжъудэхъугъ.
Тарихъ чIыгужъым шъыпкъэныгъэрэ шIулъэгъурэ зэрэфышъуиIэм фэшI «тхьашъуегъэпсэу» шъосэIо. Псауныгъэ пытэ, щыIэкIэ-псэукIэ дэгъу шъуиIэнэу, мамыр огур ренэу шъуашъхьагъ итынэу, тилъэпкърэ Хэгъэгумрэ хэхъоныгъэ языгъэшIыщт гъэхъагъэхэр тапэкIи шъушIынэу шъуфэсэIо!
Дунэе Адыгэ Хасэм и Президентэу Сэхъурэкъо Хьаути