Дзэ къулыкъум гъатхэм ащагъэхэмрэ Донской къэралыгъо техно­ло­гическэ университетым икурсантхэмрэ блэкIыгъэ тхьаумафэм Мыекъуапэ и Гупчэ мемориал дэжь Урысыем зэрэфэшъыпкъэщтхэмкIэ дзэкIолIи 150-м ехъумэ Iогъэ пытэ щатыгъ.

Адыгэ Республикэм и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард, УIэшыгъэ КIуачIэхэм яветеранэу, генерал-майорэу Александр До­рофеевым, Адыгеим идин, иобщественнэ организациехэм ялIыкIохэм дзэкIолI ныбжьыкIэхэм шIуфэс къарахыгъ.

Адыгеим и ЛIышъхьэу КъумпIыл Мурат ыцIэкIэ Мыекъуапэ имэрэу Геннадий Митрофановым дзэкIолIхэм зафигъэзагъ. Урысыем идзэ къулыкъу щызы­хьынэу изыхъухьэгъэ кIалэхэмкIэ присягэм мэхьанэшхо зэри­Iэр ащ хигъэунэфыкIыгъ.

— Хэгъэгум ипатриотхэр зы­пIугъэ ны-тыхэм лъэшэу са­фэраз. ТикIалэхэм ятэжъхэр, ятэ­хэр, ашыхэр щысэтехыпIэу зэряIэщтхэм, Хэгъэгум иухъу­мэкIо шъыпкъэ зэрэхъущтхэм сицыхьэ телъ. Дзэм ащэгъа­кIэхэм ящыIэныгъэ къыхэхъу­хьэгъэ мыщ фэдэ хъугъэ-шIэгъэ­шхомкIэ сафэгушIо! УшэтыпIэ пстэури зэпышъучынэу, псауны­гъэ пытэрэ ныбджэгъу цыхьэшIэгъухэмрэ шъуиIэнэу сышъу­фэлъаIо, — къыIуагъ Геннадий Митрофановым.

Генералхэр, офицерхэр, хэ­бзэ къулыкъухэм ялIыкIохэр дзэкIолI ныбжьыкIэхэм афэгу­шIуагъэх, Урысыем и ЛIыхъу­жъэу Цэй Эдуард Хэгъэгум иухъумэкIо ныбжьыкIэхэм зафигъазэзэ къыIуагъ лIыхъужъныгъэ зезыхьэгъэ ятэжъ пIа­шъэхэр щысэтехыпIэу яIэнхэу.

— ШъуищыIэныгъэ изичэзыу лъэоянэу мы хъугъэ-шIагъэр зэ­рэхъущтым, пшъэдэкIыжьэу шъухьырэм къызэрэхэхъуагъэр зэрэзэхэшъушIыкIыщтым, Хэ­гъэгум ыпашъхьэ пшъэрылъы­шхоу щышъуиIэр зэрифэшъуа­шэм тетэу зэрэжъугъэцэкIэщтым сицыхьэ телъ, — къы­Iуагъ Цэй Эдуард.

УIэшыгъэ КIуачIэхэм яветеранэу, генерал-майорэу Александр Дорофееври дзэ къулыкъушIэхэм къафэгушIуагъ.

— Мы мафэр егъэшIэрэу шъугу къинэжьыщт, — къыIуагъ ащ. — Шъуиныбджэгъухэм, шъуянэ-шъуятэхэм, офицерхэм апашъхьэ шъуи Хэгъэгу шъу­зэрэфэшъыпкъэщтымкIэ Iогъэ пытэ щышъутыгъ. Мы мемориалым зыцIэ тетхагъэхэм, тихэгъэгу исуверенитет хэушъхьафыкIыгъэ дзэ операцием къыщызыухъумэхэрэм афэдэу лIы­гъэ къызыхэжъугъафэ тшIоигъу. Дзэм епхыгъэ шIэныгъэхэр шъуIэ къижъугъахьэх, Хэгъэгум иухъумэкIо цыхьэшIэгъухэм яIоф лъыжъугъэкIуат.

Митинг ужым Iофтхьабзэм хэлэжьагъэхэм Гупчэ мемориалым къэгъэгъэ блэрхэр кIэ­лъыралъхьагъэх.

Александра Балабась. Сурэтхэр авторым иех.