Мобилизацием хэфагъэхэм ыкIи ахэм яунагъохэм IэпыIэгъу тедзэ аIэкIэгъэхьэгъэным фэшI шъолъыр, муниципальнэ мэхьанэ зиIэ хэбзэгъэуцугъэ ыкIи нэмыкI шэпхъэ пра­вовой акт 90-м ехъу республикэм щаштагъ.

Адыгеим IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч къызэриIуагъэмкIэ, хэушъхьафыкIыгъэ дзэ операцием хэлажьэхэ­рэм зэкIэми шъолъыр тыныр араты, 2023-рэ илъэсым имэкъуогъу щегъэжьагъэу ар сомэ мин 200-м нагъэсыгъ. Джащ фэдэу уIагъэ зытелъ дзэкъулыкъушIэхэм зэтыгъоу сомэ миллион, хэушъхьафыкIыгъэ дзэ операцием хэлажьэхэрэм ясабыйхэм сомэ мин 20 афатIупщы. Мы тыныр унэгъо 1487-мэ, ахэм сабый 2481-рэ арыс, къызфагъэфедагъ. Джащ фэдэу загъэ­псэфыным ыкIи япсауныгъэ агъэпытэным фытегъэпсыхьэгъэ фэгъэкIотэнхэри мыхэм яIэх. ХэушъхьафыкIыгъэ дзэ операцием хэлажьэхэрэм якIэлэцIыкIухэу еджапIэхэм ащеджэхэрэр ыпкIэ хэмылъэу ащагъашхэх, колледжхэм ачIэсхэм шхыныгъэ стырхэр аIэкIагъахьэх, ащ нэмыкIэу кIэлэцIыкIу IыгъыпIэм кIохэрэм яIыгъын тефэрэ ахъщэр унагъом Iахырэп. ПсэупIэхэм гъэстыныпхъэ шхъуантIэр ящэлIэгъэным фытегъэпсыхьэгъэ сомэ мини 100 хъурэ зэтыгъо тыныр хэушъхьафыкIыгъэ дзэ операцием хэла­жьэхэрэм яунэгъо 79-мэ къыз­фагъэфедагъ. Мырзэ Джанбэч къызэриIуагъэмкIэ, мы купым ха­хьэхэрэм ыпкIэ хэмылъэу юридическэ IэпыIэгъу арагъэгъо­ты, джащ фэдэу социальнэ фэ­Iо­-фашIэхэр афагъэцакIэх, транспорт хэбзэIахьым итынкIэ фэгъэкIотэныгъэу яIэхэр агурагъаIо.

ХэушъхьафыкIыгъэ дзэ опера­цием къыгъэнэфэрэ пшъэ­рылъ­хэр гъэцэкIэгъэнхэм фэшI рес­публикэ бюджетым къыхэгъэ­кIыгъэ сомэ миллиони 143-рэ Адыгеим щагъэфедагъ. «Единэ Россием» ишъолъыр къутамэ и Секретарэу КъумпIыл Мурат иунашъокIэ сомэ миллион 23-рэ зытефэгъэ пкъыгъо зэфэшъхьафхэр партием игъэцэкIэкIо комитет къыщэфыгъэх ыкIи дзэ частьхэм аIэкIигъэхьагъэх. Джащ фэдэу «Хэгъэгум иухъумакIохэр» зыфиIорэ фондым ылъэныкъокIи дзэкъулыкъушIэ­хэм IэпыIэгъу зэрафэхъухэрэр къыщаIуагъ АР-м и Къэралыгъо Совет — Хасэм ипресс-­къулыкъу.