Мы аужырэ илъэсхэм бжыхьасэхэм, гъэтхасэ­хэм анэ­мы­кIэу, чъыгхатэхэм, хэтэрыкIхэм, цумпэ лъэпкъ зэфэшъхьафхэм якъэгъэкIын республикэм зыщырагъэушъомбгъу.

Къэралыгъо программэу «Агростартап» зыфиIорэм ишIуагъэкIэ Мыекъопэ районым чIыгухэр щызыIыгъ ТIэшъу Аслъан мэкъумэщ хъызмэтым зыфигъэ­загъ. КIэлэ ныбжьыкIэр зыщылэжьэрэ хьасэм бэмышIэу тыщыIагъ, иIофшIэн зэрэзэхищэрэр, гухэлъэу иIэхэр къытфиIотагъэх.

— Илъэс къызэкIэлъыкIохэм экономистэу чIыпIэ зэфэшъхьафхэм Iоф ащысшIагъ. Пандемием илъэхъан мэкъу- мэщым зыфэзгъэзэнэу сегупшысэу езгъэжьагъ, ау ар зэрэмыIэшIэхыр дэгъоу къызгурыIощтыгъ. Синыбджэгъухэм къэралыгъо IэпыIэгъухэр зэрэщыIэр къызысаIом, сытырагъэгушIухьагъ. АдыгеимкIэ ащ фэдизэу бэу къыщамыгъэ­кIырэ, псауныгъэмкIи шIуагъэ зыпылъ къыхэсхыным сегупшысэщтыгъ. Пщыкъуй­хьаблэ дэт хъызмэтшIапIэу «Сады Адыгеи» зыфиIорэм сызэкIом, ежевикэ къэзгъэкIынэу тесыубытагъ. Ащ Iоф дэпшIэнымкIэ шапхъэу пылъхэр зэзгъэ­шIагъэх. НэмыкI культурэхэм ялъытыгъэмэ, ар шIэхэу кIодырэп, нахь зещэгъошIу, — еIо тигущыIэгъу.

ЫпэкIэ экономистэу Iоф зы­шIэ­щтыгъэ кIалэм къин къыщы­хъугъэп бизнес-планыр ыгъэхьазырынэу. Мыекъопэ район администрацием мэкъу-мэщымкIэ иотдел, АР-м мэкъу-мэщымкIэ и Министерствэ IэпыIэгъу къы­зэ­рэфэхъугъэхэмкIэ лъэшэу зэрафэразэр къыIуагъ. Тхылъхэр зыпхырэкIыхэм, IофшIэныр ригъэжьагъ, ежевикэр къызщигъэ­кIыщт хьасэр ыгъэхьазырыгъ, псы зэрэкIикIэщтыр ыгъэуцугъ.

— Сомэ миллионрэ мин 600-рэ къысатыгъ, ащ ишIуагъэкIэ кIысыжь мини 6-м ехъу къэсщэфыгъ, цIыфхэр къасщэхи дгъэтIысхьагъэ. Ежевикэ куандэхэр зэрэдэкIоещтхэр къыдэтлъытэзэ, пкъэухэр дгъэуцугъэх, ины хъурэр кIэтэшIэ. Метри 2-м къыщегъэ­жьагъэу 5-м нэсэу илъэгагъэ хъун ылъэкIыщт. Ежевикэ лъэпкъэу «Лох-Несс» дгъэтIысхьагъэр. Анахь Iоф къызыпыкIыгъэр псы зэрэкIэткIэщтыр ары, «капельное орошение» зыфаIорэм тегъэпсыхьагъэу тшIыгъэ, ащкIэ ищыкIэгъэ Iэмэ-псымэр зэкIэ зэдгъэгъотыгъ. Скважинэ дгъэуцугъэ, ау ащ къичъырэ псы чъыIэр занкIэу акIапкIэмэ ыгъэсымэ­джэщтхэти, ар зыщыфэбэщтыри тшIыгъэ, ащ насос хэтэу пчыхьэ къэс псы кIэтэкIэ, — еIо Аслъан.

ГъэрекIо бжыхьэм агъэтIысхьэгъэ культурэм изытет непэ дахэ, кIымафэр дэгъоу зэпачыгъ. Зэрифэшъуашэу ешIушIэх.

Апэрэ илъэсым лэжьыгъэ къызэримытыщтыр пащэм къыраIуагъэу щытыгъ. КъэкIорэ илъэсым гугъэпIэ инхэр фыриIэхэу непэрэ мафэм ищыкIагъэр зэкIэ регъэгъоты, уцыжъым зыкъимыштэным пае тракторкIэ ыкIи IэкIэ агъэкъабзэ. Ежевикэ зырызэу хэтэу тлъэгъугъэхэр иных, Аслъан ыгъэтIысхьэгъэ лъэпкъыр зэрэдэгъур гъуащэрэп, къыпыкIагъэр IэшIу.

— Iоф пшIэщтмэ, хабзэр IэпыIэгъу къыпфэхъу, ар зымыуасэ щыIэп. О уимылъку закъокIэ мыщ фэдиз пфэ­укIочIыщтэп. Федеральнэ ыкIи шъолъыр IэпыIэгъухэм яшIуагъэкIэ мэкъу-мэщым хэхъоныгъэхэр ешIых, фермерэу, унэе предпринимателэу щыIэр нахьыбэ мэхъу. Мы лъэбэкъу иныр сшIынымкIэ IэпыIэгъу къысфэхъугъэхэм зэкIэми сафэраз, тирайон администрацие мэкъу-мэщымкIэ иотдел, Адыгеим мэкъу-мэщымкIэ и Министерствэ илIыкIохэм ренэу анаIэ къыттет, сыд фэдэ Iофыгъо тиIэми, яшIуагъэ къытагъэкIы, — еIо Аслъан.

Фермер ныбжьыкIэм гухэлъышIухэр иIэх. ЧIыгу хьасэу ыIыгъыр къышIыхьанэу ригъэжьагъ, къыугъоижьырэ ежевикэр зыщиIыгъыщт псэуалъэу гъэучъыIалъэхэр зычIэтыщтхэр ышIыщтых.

Ежевикэр зыщищэщтым джыри икъу фэдизэу егупшысагъэп. КъэкIорэ илъэсым игъэмафэ лэжьыгъэ бэгъуагъэ къытынэу мэгугъэ. Непэрэ мафэм ащ фэлажьэ, мы культурэм фэгъэхьыгъэ зэхахьэу щыIэхэрэм ахэлажьэ, культурэм икъэгъэкIын шапхъэу пылъхэр зэрегъа­шIэх.

ДЕЛЭКЪО Анет. Сурэтхэр: А. Iэшъын.