Урысые Федерацием и Президентэу Владимир Путиным пшъэрылъэу къыгъэуцугъэхэм ащыщых кIэлэцIыкIухэм яегъэджэнкIэ амалышIухэр ягъэгъотыгъэнхэр, гурыт еджапIэхэр зы сменэ IофшIэным тещэгъэнхэр.

Федеральнэ гупчэр IэпыIэгъу къафэ­хъузэ, политическэ партиеу «Единэ Россием» ипроектхэм адиштэу мыщкIэ Iофтхьэбзэ гъэнэфагъэхэр республикэм щызэрахьэх.

Мыгъэ гурыт еджэпIи 3-мэ яшIын Тэхъутэмыкъое районым щаухыщт. Къи­хьащт илъэсым Мыекъуапэрэ Тэхъутэмыкъое районымрэ гурыт еджэпIитIу ащагъэпсынэу рахъухьэ. Джырэ шапхъэ­хэм адиштэрэ гъэсэныгъэ гупчэхэу ахэр хъущтых, пэрыт технологиехэр ащагъэфедэщтых.

Адыгеим и ЛIышъхьэу КъумпIыл Мурат псэуалъэхэм яшIын зэрэкIорэм ышъхьэкIэ гъунэ лъефы. Нэбгырэ 1100-мэ ателъытэгъэ гурыт еджапIэм ылъапсэ Мыекъуапэ щагъэчъыгъ. Къалэм икъо­кIыпIэ лъэныкъоу бэмышIэу псэолъа­кIэхэр жъугъэу къызыдэтэджэщтхэм ар щагъэпсыщт. Республикэм ипащэ зэрэхигъэунэфыкIыгъэмкIэ, микрорайонэу «Восходым» изэтегъэпсыхьан социальнэ инфраструктурэм игъэпсынкIэ рагъэ­жьагъ. Мыгъэ ащ IэзэпIакIэ къыщызэIуа­хыгъ, общественнэ чIыпIэхэр щызэтырагъэпсыхьэх.

«Гурыт еджапIэм пэблагъэу цIыфхэм япсауныгъэ зыщагъэпытэн, спортым зыщыпылъынхэ алъэкIыщт чIыпIи дгъэ­псыщт. Къалэм иадминистрациерэ АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэрэ пшъэрылъ афэсшIыгъ микрорайонхэм язэтегъэпсыхьанкIэ лъэныкъо пстэури къыдалъытэнэу. Мыекъуапэ итеплъэ дэхэн фае, ау Адыгеим щыпсэухэрэмкIи, ихьакIэхэмкIи ар Iэрыфэгъоу зэрэщытын фаери зыщагъэ­гъупшэ хъущтэп», — къыIуагъ Адыгеим и ЛIышъхьэ.