МашинакIэхэр аратыгъэх
АР-м хэгъэгу кIоцI IофхэмкIэ и Министерствэ полицием иучастковэ уполномоченнэхэм ыкIи нэмыкI подразделениехэм якъулыкъушIэхэм автомобиль 11-мэ яIункIыбзэхэр мэфэкIшIыкIэм тетэу аритыжьыгъэх.
[caption id="attachment_136732" align="aligncenter" width="800"]
Сурэтыр: АР-м хэгъэгу кIоцI IофхэмкIэ и Министерств[/caption]
Урысыем хэгъэгу кIоцI IофхэмкIэ и Министерствэ къаритыгъэ машинэхэр шъолъыр министерствэм ичIыпIэ подразделениехэм атырагощагъэх.
Iофтхьабзэм хэлэжьагъэх АР-м хэгъэгу кIоцI IофхэмкIэ иминистрэу Олег Безсмельнициныр, ащ игуадзэхэр, джащ фэдэу чIыпIэ подразделениехэм япащэхэр, хэгъэгу кIоцI къулыкъум иIофышIэхэр.
Министрэм ипэублэ псалъэ ицыхьэ телъэу къыщыхигъэщыгъ цIыфхэм ярэхьатныгъэ къэухъумэгъэнымкIэ машинакIэу аратыгъэхэр IэпыIэгъушIу къазэрафэхъущтхэр, якъулыкъу къызэрагъэпсынкIэщтыр.
Машинэхэр дэгъоу зэтегъэпсыхьагъэх, ом изытет емылъытыгъэу тыди апхырыкIынхэ алъэкIынэу кIуачIэ яI. Ащ ишIуагъэкIэ, бзэджэшIагъэхэр къычIэгъэщыгъэнхэмкIэ пшъэрылъэу къафагъэуцугъэхэр нахьышIоу зэрэзэшIуахыщтхэм уехъырэхъышэнэу щытэп.
Транспортыр подразделениехэм атырагощэным ыпэкIэ шъолъыр министерствэм ипащэ анаIэ тыраригъэдзагъ муниципальнэ образованиехэм ащыIэ къулыкъухэм яIофшIэн зэрэзэхащэрэм, гъэхъагъэу яIэхэм. Ащ фэдэу зиIофшIэн къыхигъэщыгъэр Мыекъопэ районыр ары, сыда пIомэ мыщ Iоф щызышIэрэ къулыкъушIэхэр анахьэу къушъхьэтх чIыпIэхэм ащыIэх. Мы районым щыпсэурэ цIыфхэм яшIуагъэ зэрэрагъэкIырэм имызакъоу, зекIоу тиреспубликэ щыIэхэм IэпыIэгъу ящыкIагъэу бэрэ закъыфагъазэ.
Джащ фэдэу къулыкъум иIофшIэнкIэ къыхигъэщыгъэхэм ащыщ Тэхъутэмыкъое районыр. Краснодар пэгъунэгъоу зэрэщысым къыхэкIэу мы чIыпIэр псэупIэкIэ къыхэзыхыхэрэм япчъагъэ хэхъо зэпыт. Ащ къыхэкIэу полицием икъулыкъушIэхэм яIофшIэни нахьыб, цIыфэу къяуалIэрэри макIэп.
Ащ къыхэкIэу хэгъэгу кIоцI къулыкъум иподразделениехэу зигугъу къэтшIыгъэхэм яавтопаркхэм машинищ джыри къахэхъуагъ.
КIэухым звание зэратыгъэ офицерхэм ащыщхэм министрэм тэмэтелъхэр ыкIи УФ-м хэгъэгу кIоцI IофхэмкIэ и Министерствэ иведомственнэ тын лъапIэхэр аритыжьыгъэх.
АР-м хэгъэгу кIоцI IофхэмкIэ и Министерствэ ипресс-къулыкъу