Мыекъопэ къэралыгъо технологическэ университетым экологиемкIэ ифакультет истуденткэу Анастасия Сотниковар «Паанаярви илъэсгъогухэр» зыфиIорэ шIэныгъэ-ушэтын экспедициеу Карелием щыкIуагъэм хэлэжьагъ.

«Урысыер икIэрыкIэу зэтэ­гъашIэ» зыцIэ проектым къыдыхэлъытагъэу экспедициер зэ­хащэгъагъ. Лъэпкъ ушэтын университетэу «Экономикэм иапшъэрэ еджапI», президентскэ платформэу «Урысыер — амалышхохэм яхэгъэгу», программэу «ЗекIоным нахьыб» зыфиIохэрэр ары Iофтхьабзэм икIэщакIохэр ыкIи изэхэщакIо­хэр. Проектым ишIуагъэкIэ Урысыем ичIыпIэ зэфэшъхьаф­хэм ащеджэрэ студентхэр шIэныгъэ-ушэтын экспедициехэм ахэлэжьэнхэ алъэкIы.

Джыри мэзэе мазэм лъэныкъо зэфэшъхьафхэмкIэ Анастасие заявкэр ытыгъагъ, ащ ыуж бэ темышIэу лъэпкъ паркэу «Паанаярви» къырагъэблэгъагъ.

— Сэ экспедициеу сызхэлэжьэнэу сызфэягъэр едзыгъоу «Экология» зыфиIорэм хахьэщтыгъ. Ащ фэшI анкетэм шъып­къагъэ хэлъэу сиамалхэр, шIэ­ныгъэу сиIэр истхагъэх ыкIи проектым лъэш дэдэу сыхэла­жьэ зэрэсшIоигъори письмэу гослъхьагъэм къыщисIотыкIыгъ. Заявкэу птыщтыр зэрэбгъэхьазырыщтми шэпхъэ гъэнэфагъэ пылъыгъ. ГущыIэм пае, тэ экспедициеу тызхэлэжьэщтым елъытыгъэу тестовэ ушэтынхэр тагъэтыгъэх, шъоф Iофхэм та­зэрэхэлэжьагъэмкIэ опытэу ти­Iэри къытшъхьэпэжьыгъ, — къеIуатэ Анастасие.

Къалэхэу Москва, Мыекъуапэ, Саратов ыкIи Самарэ адэт апшъэрэ еджапIэмэ ащеджэрэ нэбгырэ I2 зэкIэмкIи экспедицием хэлэжьагъэр. Карелием илъэпкъ парк щаIыгъ псэушъхьэмэ япчъагъэ, ахэр зэрэзэтефыгъэхэр, къэкIыхэрэр зы­фэдэхэр тхыгъэнхэр, зэкIэлъыкIуакIэ а тхыгъэмэ яIэу гъэпсыгъэнхэр — джащ фэдэ IофшIэнхэр ары экспедицием хэла­жьэрэмэ япшъэрылъыгъэр.

— Экспедицием имафэ пэпчъ гъэшIэгъонэу гъэпсыгъагъэ, Iофтхьэбзэ зэфэшъхьафхэмкIэ ушъэгъагъэ, ом изытет зэ­рэдэгъугъэм ишIуагъэкIэ орхидеемэ япчъагъэ зэдгъэшIэн тлъэкIыгъэ. «Венерин башмачок настоящий» зыфиIорэр (Cyp­ripedium calceolus L.) илъэс пчъагъэхэм къэкIы, темыр орхидееу зилъэгагъэ сантиметрэ 60-м нэсырэр ахэм ащыщыгъ. Ар Урысые Федерацием итхылъ Плъыжь дэтхагъ. ГъэшIэгъоны, ар зыкъэгъагъэрэр ыныбжь илъэс 15 — 17-м зынэсыкIэ ары. Илъэс 85-рэ ыкIи 105-рэ зыныбжь орхидеехэри тапэ къифагъэх, — къыIотагъ студенткэм.

Ащ нэфэшъхьафэу купыр къушъхьэу «Кивакка» лъэсэу дэкIоягъ, Карелием ипсыхъурэе дахэ зэрагъэлъэгъугъ, псыкъе­фэххэу «Мянтюкоски» ыкIи «Киваккакоски» якIолIагъэх, Карельскэ Унэм чIэхьагъэх.

Экспедицием изэфэхьысы­жьэу онлайн шIыкIэм тетэу Iоф зышIэрэ аудиогид зэхащагъ, материалэу аугъоигъэхэр зыхэ­хьащтхэ видеоролик агъэхьазырыщт.

Джыри нэмыкI экспедициехэм Анастасие ахэлэжьэным щэгугъы.