ЛIэшIэгъум шъхьадэкIыгъ
Черкес (Адыгэ) автоном хэкур зызэхащагъэр илъэси 101-рэ хъугъэ
Бэдзэогъум и 27-м, 1922-рэ илъэсым РСФСР-м хэтэу Адыгеим автономие иIэ зэрэхъугъэр, нэужым республикэр Урысыем ишъхьафит шъолъырэу зэрагъэпсыгъэр адыгэ къэралыгъо зэтеуцоным мэхьанэ зиIэ нэкIубгъоу хэхьагъ.
АР-м и ЛIышъхьэу КъумпIыл Мурат зэрэхигъэунэфыкIыгъэмкIэ, шъолъырым щыпсэурэ цIыфхэм Iоф зэрашIэрэм, лъытэныгъэ азыфагу илъэу лъэпкъхэр зэрэщызэдэпсэухэрэм, гъэхъагъэхэр ашIыхэзэ мамырэу зэрэлажьэхэрэм яшIуагъэкIэ илъэси 101-м Адыгеим хэхъоныгъэшIухэр ышIыгъэх. КъыкIэлъыкIорэ лIэужхэми ахэр лъагъэкIотагъэх, экономикэм, социальнэ лъэныкъохэм зыкъаIэтыгъ, тихэку кIасэ ипсэупIэ пэпчъ гуIэтыпIэ хъуным дэлэжьагъэх.
— Непэ Адыгеир ыпэкIэ лъэкIуатэ, лъэныкъо зэфэшъхьафхэмкIэ нэмыкI шъолъырхэм апэ ешъы. Гъогухэр ыкIи коммуникациехэр зэтырагъэпсыхьэх; цIыфхэр зыщыпсэущт унэхэр ашIых; культурэм, гъэсэныгъэм, псауныгъэм икъэухъумэн яучреждениехэр шъолъырым щагъэкIэжьых ыкIи кIэхэр къыщызэIуахых; хъызмэтшIапIэхэм япчъагъэ хэхъо, цIыф псэупIэхэм ятеплъэ зызэблехъу. УФ-м и Президент, и Правительствэ ыкIи и Федеральнэ ЗэIукIэ анаIэ къызэрэттетым ишIуагъэкIэ а зэпстэур зэшIотэхы. Республикэм щыпсэухэрэм егъэжьапIэу тшIыхэрэмкIэ къызэрэддырагъаштэрэм тихахъохэр зэрэлъыкIуатэхэрэр бэкIэ епхыгъ. ЯIофшIэн ыкIи ясэнаущыгъэ рахьылIэзэ тихэку нахьышIум фэзыщэхэрэм лъэшэу сафэраз. Непэ тлъэгъурэ хэхъоныгъэшIухэм лъапсэ афэзышIыгъэ нахьыжъхэу къытшъхьащытхэм яшIушIагъэ ащ хэлъ, — къыщеIо АР-м и ЛIышъхьэ ишIуфэс тхылъ.