Урысые физкультурэ-спорт комплексым ифестивалэу «IофшIэнымрэ зыухъумэжьынымрэ сафэхьазыр» зыфиIорэм и Урысые финал хэлэжьэнхэу къалэу Ялтэ агъэкIощтхэр шIэхэу къэнэфэщтых.

Илъэс къэс мыщ фэдэ Iоф­тхьабзэр дунэе кIэлэцIыкIу гупчэу «Артекым» щызэхащэ. Респуб­ликэм щыщ кIэлэцIыкIуи 8 къыхахыщт, илъэс 12 — 13, 14 — 15 зыныбжь купитIумэ шъэожъыи 4-рэ пшъэшъэжъыи 4-рэ ахагъэ­хьащт.

Муниципальнэ зэнэкъокъум щыпхырыкIыгъэ кIэлэцIыкIухэр ары республикэ фестивалым хэлэжьагъэхэр. Мыекъуапэ зы мафэкIэ ахэр спорт лъэпкъ зэфэшъхьафхэмкIэ: метрэ 60-м икъэ­чъынкIэ, къэлъэнымкIэ, есынымкIэ, щэрыонымкIэ ыкIи нэмыкI­хэмкIэ яIэпэIэсэныгъэ къагъэ­лъэгъуагъ. Командэхэм ахэт пэпчъ икуп очкохэр къыфелэжьы. 2023-рэ илъэсым иIоныгъо ыкIэхэм адэжь купитIуми анахь дэгъоу закъыщызыгъэлъэгъогъэ шъэожъыи 2-рэ пшъэшъэжъыи 2-рэ зырыз «Артекым» агъэкIощтых. Джыдэдэм очкохэр къалъы­тэжьых.

Хабзэ зэрэхъугъэу, республикэ фестивалым пэрытныгъэр илъэс пчъагъэ хъугъэу къыщыдэзыхырэр муниципальнэ образованиеу «Къалэу Мыекъуапэ» икоманд ары.