Зынэхэм амылъэгъурэ илъэс 15 зыныбжь Малика Алиевар къушъхьэу Ошъутенэ илъэгапIэ дэкIоен ылъэкIыгъ.

Зипсауныгъэ амалхэр зэщыкъогъэ цIыфхэу сэкъатныгъэ зи­Iэхэм афызэшIокIыщтыр зэ­рэбэр ащ игъэхъагъэкIэ къыушыхьатыгъ. Ащ дакIоу, респуб­ликэм паратуризмэм зыщиу­шъомбгъунымкIэ проектыр Маликэрэ игухэлъ къыдэхъунымкIэ IэпыIэгъу къыфэхъугъэ Урысые общественнэ организациеу «Опора России» зыфиIорэм ишъолъыр къутамэ хэт Дмитрий Слесаренкэмрэ къагъэлъэгъуагъ.

Дэеу зэхэзыхырэ ыкIи зымы­лъэгъурэ кIэлэцIыкIухэр зычIэс республикэ еджэпIэ-интернатэу Мыекъуапэ дэтым Маликэ ще­джэ. Ежь ищыIэныгъэ нахь къы­зэригъэпсынкIэщтым имызакъоу, нэмыкIхэми ар къадигъэхъуным чанэу зэрэпылъымкIэ ар респуб­ликэм бэмэ щашIэнэу хъугъэ. Мыщ фэгъэхьыгъэ тхыгъэхэр республикэм исоциальнэ хъытыухэм ыкIи къэбар жъугъэм нэмыкI иамалхэм бэрэ къарэхьэ.

Апэу игугъу зашIыгъэр 2021-рэ илъэсым мэкъуогъум и 30-м УФ-м и Президентэу Владимир Путиным цIыфхэм адишIыгъэ «ЗэдэгущыIэгъу занкIэу» щыIагъэм видеозэпхыныгъэ шIыкIэм тетэу зызщыфигъэзагъэр ары. Ежь ышъхьэ имызакъоу, Маликэ фэдэу зымылъэгъухэрэм афэгумэкIэу Урысыем и Президент елъэIугъагъ зипсауныгъэкIэ щы­кIагъэ зиIэхэм атегъэпсыхьэгъэ пкъыгъохэу Урысыем къыщыдагъэкIыхэрэр ыпкIэ хэмылъэу аратырэ техническэ пкъыгъохэм яспискэ хагъэхьанхэу.

Адыгеим и ЛIышъхьэ мызэу, мытIоу пшъэшъэжъыем IукIэнэу хъугъэ.

— Малика Алиевар — гушIубзыоу, щыIэныгъэм кIэгушIурэ, сэнаущыгъэ зыхэлъ кIэлэцIыкIу­хэм ащыщ. Зыщеджэрэ интернатми, шы-спорт еджапIэми сащыIукIэу къыхэкIыгъ. Ащ ыIэкIэ ышIыгъэ нэмазщыгъэу къыситыгъагъэр сэгъэлъапIэ, — къыщиIуагъ зэIукIэгъухэм ащыщ КъумпIыл Мурат.

Гъэзетэу «Адыгэ макъэм» гъэтхэпэ мазэм Маликэ фэгъэ­хьыгъэ тхыгъэ джыри къихьагъ. Мы пшъэшъэжъыем илъэси 6 ныIэп ыныбжьыгъэр ынэхэм амылъэгъужьэу къызэнэм. Къиныгъоу зэпичыгъэри макIэп. Маликэ хьафизэу къызэрэна­гъэм пае зы чIыпIэ исэу, зыгорэ IэпыIэгъу къыфэхъуным ежэу щытэп. Москва дэт лаборато­риеу «Сенсор-Тех» зыфиIорэм рагъэб­лэгъэгъагъ.

Зымылъэгъухэрэм апае ашIырэ камерэу «Робин» зыфиIорэм иушэтынхэм ар ахэ­лэжьагъ.

Мары джыри бэмышIэу гъэ­мэфэ зыгъэпсэфыгъохэм унэм ишIыхьагъэу исыным ыпэ къушъ­хьэм дэкIоеныр къыхихыгъ.

— Къушъхьэу «Ошъутенэм» фэгъэхьыгъэ къэбархэм ся­джагъ ыкIи ащ цIыфхэр зэрэдэкIуаехэрэр сшIэщтыгъ, — къеIуатэ Маликэ. — БэшIагъэ сэри ащ сыдэкIуае сшIоигъоу сыгу зилъы­гъэр. ДэпкъиплIым сеплъэу унэм сисыным ыпэ, сызхэт щыIэныгъэ къызэрыкIом шъхьадэкIэу сшIэшъущтхэм сягупшысэзэ, чэщ-мэфищ лъэсрыкIо зекIо сыкIонэу тесыубытагъ. Анахь лъэгэпIэ иным сыдэкIоешъуныр къыздэ­хъугъ! Къушъхьэ шъхьапэм нэсыгъэ хьафизэм ыгу щышIэрэр шъошIа?! «Къушъхьэу Ошъутен — метрэ 2804-рэ» зыфиIорэ тхыгъэр зытет пхъэмбгъум сызытеIабэм, сигушIуакIэ гъунэ иIагъэп, текIоныгъэр къыдэсхыгъэу къысщыхъугъ.

Маликэ тызыIокIэм, къушъхьэм илъэгапIэ нэсын зэрэхъугъэр сыхьатым къыкIоцI къы­Iуатэ икъугъ. Ащ гухахъоу хигъо­тагъэр сэ сшъхьэкIэ зэхэсшIэн слъэ­кIыгъ. Аужырэ метрэ заулэу къэнагъэр ыкIужьыныр къин дэдэ къыщы­хъугъ. Ащ фэдиз гъогу­уанэу къыкIугъэр метрэ заулэ пае хьаулые зэримыгъэхъущтым егупшысэзэ, пшъэшъэжъыем а къиныгъор зэпичынымкIэ кIуачIэ къызэрэзхигъотэжьыгъэр къыхигъэщыгъ.

Маликэ къыдэхъугъэ гъэхъагъэмкIэ иныбджэгъухэм адэгощагъ, ащыщыбэ ащ кIэхъопсыгъ, а гъогум рыкIонхэу фэягъэх.

— Анахь зипсауныгъэ тэрэз­хэри мы лъэгапIэм нэсышъухэ­рэп. Маликэ ипсауныгъэ амалхэр зэрэзэщыкъуагъэм емылъытыгъэу, ар къыдэхъугъ, гушхоныгъэ ин хэлъ. Мыщ къегъэлъагъо цIыфэу мафэ къэс пэрыохъухэм аIукIэрэр лъэгэпIэ гъэнэфагъэ­хэм ыкIи гъэхъагъэхэм къызэра­фэкIон ылъэкIыщтыр, — къы­Iуагъ Дмитрий Слесаренкэм.

Джащ фэдэу ащ къыхигъэщыгъэхэм ащыщ зымылъэгъурэ цIыфхэм дунаим щыхъурэ-щы­шIэрэр макъэкIэ е IэкIэ теIабэ­хэзэ зэрэзэхашIэрэр. Хьафизэр гъэмафэм къушъхьэм дэкIуаеу, осым зыхэIабэкIэ ыгу щышIэрэр къэпчъыгъуай.

Зипсауныгъэ амалхэр зэщыкъогъэ цIыфхэм Iоф адэшIэгъэнымкIэ хэушъхьафыкIыгъэ курс­хэр Дмитрий Слесаренкэм къыу­хыгъэх. Ащ ыпэкIи IэкIэлъы­гъэ IэпэIэсэныгъэр ыкIи джы ы­гъотыгъэ шIэныгъэхэр зэхигъа­хъохи, дэеу зэхэзыхырэ ыкIи зымылъэгъурэ кIэлэцIыкIухэр зыщеджэхэрэ интернатым чIэс­хэм Iоф адишIэу ригъэжьагъ. Ащ Маликэ нэIуасэ щыфэхъугъ. Джы нэбгыритIум къагъэлъэгъо­гъэ проектэу сэкъатныгъэ зиIэ­хэр социальнэу щыIэныгъэм зыкъыхагъотэным фэIорышIэрэр республикэм щыпхыращыщт, паратуризмэм зырагъэушъом­бгъущт. Дмитрий зэрилъытэрэмкIэ, ащ фэдэ купым хэхьэрэ цIыфхэр зекIо зыдащэн алъэ­кIыщт чIыпIэу Адыгеим иIэр макIэп.

Проектыр республикэм щыпхыращыныр зигукъэкIыр «Опора России» зыфиIорэм ишъо­лъыр къутамэ ипащэу Наталья Егоровар ары.

— Сэкъатныгъэ зиIэхэр социальнэу щыIэныгъэм хэгъэгъо­зэгъэнхэм епхыгъэ гупшысэхэр къызыпкъырыкIынхэ фаер ежьхэр ыкIи ащ фэдэ кIэлэцIыкIу­хэр зыпIурэ унагъохэр ары. Ахэр ары дэгъоу зышIэрэр зэкIэ ящыкIагъэр ыкIи ахэр зэрафэбгъэцэкIэщтыр. Мары Маликэ ищысэкIэ къытигъэлъэгъугъ инклюзивнэ зекIоным респуб­ликэм зызэрэщебгъэушъомбгъун плъэкIыщтыр. Хьафизэр Ошъутенэ апэрэу дэкIоягъ. Ар псын­кIагъэу пфэIощтэп. Анахь шъхьа­Iэр — ежькIэ ар зэрэтекIоныгъэшхом дакIоу Урысыем щыпсэурэ сабый хьафизэхэмкIи гъэхъэ­гъэшхоу плъытэ хъущт. Ахэм зэрямызакъор, хэхъоныгъэхэр, гъэхъагъэхэр ашIыхэзэ обществэм шIуагъэ къыфахьэу зэ­рэпсэунхэ алъэкIыщтыр къыгъэ­лъэгъуагъ, — еIо Н. Егоровам.

Маликэ янэу Жанна сэкъатныгъэ зиIэхэм щыIэныгъэм зыкъыхагъотэным фэбанэхэрэм ащыщ, мы лъэныкъомкIэ респуб­ликэм илъ общественнэ щыIа­кIэм, инклюзивнэ зекIоным зырагъэушъомбгъуным чанэу хэлажьэ, «Опора России» зыфиIорэм ишъолъыр къутамэ хэт.

Мы охътэ благъэхэм зипсауныгъэ амалхэр зэщыкъогъэ кIэлэцIыкIухэр зекIо ащэнхэм фэшI ящыкIэгъэщт пкъыгъохэм яспискэ Дмитрий Слесаренкэм къыгъэхьазырыщт. Ахэр къэщэфыгъэнхэмкIэ республикэм ипредпринимательхэм ясообществэ IэпыIэгъу къафэхъущт.

Iэшъынэ Сусан. Сурэтsр: Малика Алиевам ихъарзынэщ.