УФ-м и Президентэу Владимир Путиным сабыибэ зэрыс унагъохэм мэкъуогъум адыриIэгъэ онлайн-зэIукIэм Адыгеим щыщ унэгъо Iужъоу Шишкинхэр хэлэжьагъэх. Ахэр джы Москва щыIэх.

Унагъом игъэпытэнкIэ ыкIи сабыйхэм япIункIэ гъэхъагъэхэр зэрашIыгъэхэм апае «Родительская слава» зыфиIорэ орденыр Шишкин зэшъхьэгъусэхэу Ильярэ Елизаветэрэ къэралыгъом ипащэ къафигъэшъошагъ. Онлайн- зэIукIэгъум Шишкинхэм яса­быеу хэлэжьагъэхэм анахьэу зыкIэ­хъопсыхэу къаIогъагъэр Кремлыр зэрагъэлъэгъу ыкIи къэралыгъом и Президент IукIэхэ зэрашIоигъор ары. Ар къадэ­хъун зэралъэкIыщтымкIэ Владимир Путиным джэуап къаритыжьыгъагъ ыкIи Адыгеим щыщ унагъом имызакъоу, онлайн-зэIукIэм сабыибэ зэрыс унагъоу хэлэжьагъэхэр зэкIэ Кремлым ригъэблэгъагъэх.

Бэрэ зэжагъэхэр унагъом къыдэхъугъ — Шишкинхэр Мос­ква рагъэблэгъагъэх. Мы тхьамафэм экскурсие зэфэшъхьаф­хэм ахэр ахэлажьэх, Океанариумым щыIагъэх. Кремлым зэрэкIощтхэр хъугъэ-шIэгъэ шъхьаIэу щыт.

Ащ фэгъэхьыгъэу АР-м и ЛIышъхьэу КъумпIыл Мурат ихъытыу нэкIубгъо къыщитхыгъ: «Ягухэлъхэр къыздэхъухэрэм ыкIи унэгъо пытэ зышIэнэу фаехэм зэкIэми сафэгушIо. Федеральнэ ыкIи шъолъыр социальнэ программэхэр дгъэцакIэхэзэ, тэри тлъэкI къызэрихьэу сабый зэрыс унагъохэм тадэIэпыIэщт. Непэ республикэм сабыибэ зэрыс унэгъо мини 8 щэпсэу, ахэм япчъагъэ илъэс къэс унэгъо 400 — 500-кIэ нахьыбэ мэхъу. Демографием, сабыибэ зэрыс унагъохэм япхыгъэ Iофыгъохэм къэралыгъом лъэпкъ мэхьанэ щаратэу анаIэ зэращатырагъэтырэр ащ къеушыхьаты». ЗыкIэхъопсыхэрэр къыздэ­хъугъэ унагъом хъугъэ-шIагъэр гуIэтыпIэ фэхъущт.

Сурэтыр: унагъом ихъарзы­нэщ.