«Единэ Россием» илъэпкъ программэ къызэрэдыхэлъытагъэу, Херсонскэ хэкум и Геническэ район иеджапIэхэм ящагухэм спортым зыщыпылъыщтхэ площадкэхэр ащагъэпсых.

ЕджапIэу N 1-м щырагъэжьэгъагъэр аухыгъ пIоми хъущт. ЛъэсрыкIо гъогухэр фашIыжьынхэу, чIыпIэр зэтырагъэпсыхьа­жьынэу ары ныIэп къэнагъэр. Ащ пэмычыжьэу физкультурэм зыщыпылъыщтхэ ыкIи псауныгъэр зыщызэтырагъэуцожьыщт комплекс (ФОК-р) къагъэуцущт.

— Херсонскэ хэкум изэтегъэу­цожьын фэгъэзэгъэ шъолъырхэм джы къашIырэ ФОК-хэм афэдэ зыпарэкIи яIагъэп. Геническэ районым псэуалъэу щагъэуцурэр зэкIэ Адыгеир ары языгъэшIырэр. Ны-тыхэм, цIыфэу исхэм яшIоигъоныгъэхэр къыдалъытэ­хэзэ ахэм япроектхэр агъэхьазырых, — къыIуагъ «Единэ Россием» Херсонскэ хэкумкIэ ишъолъыр къутамэ исекретарэу Игорь Костюкевич.

Комплексэу еджапIэу N 1-м щырагъэжьагъэр квадратнэ метрэ 600-м ехъущт, залэу хэтыщтыр нэбгырэ 40 зы уахътэм чIэфэным телъытэгъэщт. Волейбол, баскетбол, футбол ешIапIэхэр, нэмыкIэу спортсмен ныбжьыкIэхэм ящыкIэгъэщтхэр хэтыщтых, джэгунхэм яплъынхэу къекIуалIэхэрэм апае тIысыпIэхэр иIэщтых. Джащ фэдэу бжыхьэ-кIымэфэ уахътэхэм мыр зэрагъэфэбэщтыр ежь хэу­шъхьафыкIыгъэу иIэнэу агъэуцущт. Псэуалъэм ипроцент 30-р ашIыгъах, мы илъэсым ишэкIогъу ма­зэ аухынэу ары гухэлъэу яIэр. Геническэ иеджапIэу N 2-м испортзал гъэцэкIэжьын Iоф­шIэнхэр зырамышIылIагъэхэр илъэс 30-м ехъугъ, зэхэоным нэсыгъ. Мы уахътэм ащ щагъэу­цущт комплексым ылъапсэ агъэ­­чъы, щагум щырагъэжьэгъэ площадкэм ишIын гъунэм рафылIагъ.

«Единэ Россием» Херсонскэ хэкумкIэ ишъолъыр къутамэ иактивистхэмрэ цIыфэу псэупIэм дэсхэмрэ IофшIэнхэр зэрэлъыкIуатэхэрэм лъэплъэх.

— ЕджэпIитIум ащеджэхэрэм янэ-ятэхэм тадэгущыIэзэ, Iоф­шIэнхэр дгъэнафэщтыгъэх. Шъо­лъырэу IофшIэнхэр зэшIозы­хыхэрэм илIыкIохэми, ны-тыхэми, учреждениехэм япащэхэми сыдигъуи зэпхыныгъэ зэдыряIэным, пIалъэхэм адиштэу псэуа­лъэхэм яшIын аухыным тынаIэ тет, — къы­Iуагъ Херсонскэ хэкумкIэ шъолъыр къутамэм илIыкIоу Павел Тропкиным. Мыхэм анэмыкIэу джыри гъэсэныгъэм, медицинэм яучреждениехэр, МФЦ-р зычIэтыщт унэр кIэу ашIынхэу партием илъэпкъ программэ къыделъытэ.

«Единэ Россием» илъэпкъ программэу УФ-м и Къэралыгъо Думэ ихэдзынхэм текIоныгъэр къызэращыдихыгъэм положение 295-рэ хэхьэ. Ахэр 2021 — 2025-рэ илъэсхэм пхыращынхэу ары ащ зэрэщыгъэнэфагъэр. Мы тхылъым игъэпсын хэгъэгум ис нэбгырэ миллиони 2,5-м ехъу хэлэжьагъ.

Мы илъэсым имэкъуогъу мазэ и 13-м джыри программэм гъэтэрэзыжьын 70-рэ фашIыгъ. Ащ ишIуагъэкIэ тхылъым иедзы­гъохэм зэкIэми хэхъоныгъэхэр афэшIыгъэ хъугъэ, «Развитие новых регионов» ыкIи «Развитие туризма» зыфиIохэрэр кIэу хэхьагъэх.