ЯщыкIэгъэ дэдагъ
«Къоджэ псэупIэхэм хэхъоныгъэ ягъэшIыгъэныр» зыфиIорэ къэралыгъо программэм къыдыхэлъытагъэу мы аужырэ илъэсхэм фельдшер-мамыку IэзапIэу Адыгеим щагъэпсыгъэр бэ. Ахэм ащыщ Теуцожь районым къутырэу Петровым унакIэу щашIыгъэр. Мыщ бэмышIэу «Адыгэ макъэр» щыIагъ, иIофшIакIэ зэрэзэхэщагъэм зыщигъэгъозагъ.
Уахътэр лъыкIуатэ къэс псауныгъэм икъэухъумэнкIэ, игъэпытэнкIэ амалыкIэхэр нахьыбэу щыIэ мэхъух. Мы къулыкъум хэхъоныгъэу ышIыхэрэм ащыщ социальнэ мэхьанэ зиIэ псэуалъэхэр къоджэ псэупIэхэм зэращагъэпсыхэрэр. Ахэм адэс- хэм янахьыбэр, хабзэ зэрэхъугъэу, нэжъ-Iужъых. Апэрэ медицинэ IэпыIэгъу ахэм агъотыным фэшI ФАП-хэм мэхьанэшхо яI ыкIи ахэм лъэшэу АР-м и ЛIышъхьэу КъумпIыл Мурат лъэшэу ащ ынаIэ тет.
|
«Лъэпкъ проектэу «Псауныгъэр къэухъумэгъэныр» зыфиIорэм къыдыхэлъытагъэу Iофыгъоу къэуцухэрэм ащыщыбэ непэ зэшIотэхы. АщкIэ тызэрэзекIон ыкIи анахьэу тынаIэ зытедгъэтын фаехэр къагъэнэфагъэх Президентэу Владимир Путинымрэ УФ-м и Правительствэрэ. Мыщ дэжьым тэркIэ пшъэрылъ шъхьаIэу щытыр лъэпкъ проектым амалэу къытырэр зэрифэшъуашэу къызфэдгъэфедэныр, медицинэ IэпыIэгъур шэпхъэшIухэм адиштэу ыкIи цIыфхэмкIэ Iэрыфэгъоу дгъэпсыныр ары. Анахьэу ар зыфэгъэхьыгъэр апэрэ медицинэ IэпыIэгъур ары». Адыгеим и ЛIышъхьэу КъумпIыл Мурат. |
Къутырэу Петровым дэт фельдшер-мамыку IэзапIэм тызычIахьэм, ащ ипащэу Сусанна Ефремовар нэгушIоу къытпэгъокIыгъ, яIофшIэн фэгъэхьыгъэу къытфиIотагъ. Аужырэ шапхъэхэм адиштэу ашIыгъэ IэзапIэм нэр егъэгушIо, гуIэтыпIэу зэтырагъэпсыхьагъ. КъызэрэтаIуагъэмкIэ, кIымафэрэ ыкIоцI фабэ, гъэмафэрэ къэзгъэучъыIырэр чIэт, псы фаби, чъыIи яI. КабинетхэмкIи зэтеутыгъ: аптекэр, процедурнэр, кIэлэцIыкIухэм ыкIи бзылъфыгъэхэм зыщяплъыхэрэр. Джащ фэдэу джырэ лъэхъаным диштэрэ мебелыр, Iэмэ-псымэхэр чIагъэуцуагъэх.
УнакIэр квадрат метри 122-рэ мэхъу. Псауныгъэм икъэухъумэн фытегъэпсыхьэгъэ псэуалъэм сомэ миллион 11,2-м ехъу пэIухьагъ, илъэсэу икIыгъэм итыгъэгъэзэ мазэ ащ Iоф ышIэу ригъэжьагъ.
— ЦIыфхэр бэрэ зэжэгъэхэ, социальнэ мэхьанэ зиIэ мыщ фэдэ псэолъакIэ яIэ зэрэхъугъэмкIэ мэгушIох. Ащ зиIахьышIу хэзышIыхьагъэхэм зэкIэми афэразэх. КъызэIуахыгъэкIэ IэзапIэм ягуапэу къакIорэр нахьыбэ хъугъэ. Нэбгырэ 200 фэдиз къытэпхыгъ, ахэм ащыщэу кIэлэцIыкIухэр зэрэхъухэрэр нэбгырэ 30. План гъэнэфагъэм тетэу нахьыжъхэми, сабыйхэми мазэ къэс вакцинэхэр ахалъхьэх. Врачым къафыритхыкIырэм елъытыгъэу Iэзэн фэIо-фашIэхэр афэтэгъэцакIэх. Ахэм ямызакъоу, бзылъфыгъэ лъэрмыхьэхэми алъэплъэх. Анахь пшъэрылъ шъхьаIэу тиIэр тицIыфхэм апэрэ медицинэ IэпыIэгъур ядгъэгъотыныр ары. АщкIэ зэкIэ тищыкIэгъэщтыр тиI, — хигъэунэфыкIыгъ Сусаннэ.
ТигущыIэгъу къызэриIуагъэмкIэ, псэупIэм дэсхэм янахьыбэр нэжъ-Iужъых, ащ къыхэкIыкIэ телефонкIэ ахэм афытеозэ ягумэкIыгъохэм защегъэгъуазэ. Флюорографиер ашIын зэрэфаер агу къегъэкIыжьы, IэпыIэгъоу ящыкIагъэм елъытыгъэу районым арегъащэх.
— Мафэ къэс къытэолIэрэ къутырдэсхэр анахьэу зыгъэгумэкIыхэрэр лъыдэкIуаер, гур, уIэгъэ зэфэшъхьафхэр ары. Апэрэ IэпыIэгъур ядгъэгъотыным пае тищыкIэгъэ Iэзэгъу уцхэр тIэкIэлъых. Мы чIыпIэм ЭКГ-р щафэтэшIы, анализхэр аIэтэхыхэшъ, врачым дэжь тэгъакIох. ГумэкIыгъоу къытахьылIэрэр зэфэшъхьаф. Мары бэмышIэу хьэр къызэцэкъэгъэ хъулъфыгъэр къэкIуагъ. Ащ апэрэ IэпыIэгъур езгъэгъотыгъ, район сымэджэщым згъакIомэ сшIоигъоу бэрэ селъэIугъ, ау къысфегъэшIугъэп. Iэзэн Iофым игугъу къэтшIымэ, Гъобэкъое врач амбулаторием къикIызэ терапевт тхьамафэм тIо къакIощтыгъ, ар Iэрыфэгъу дэдагъ. Ау бэмышIэу ар IукIыжьыгъ, джы мазэм зэ Пэнэжьыкъое район сымэджэщым къекIы. Ащ игъусэхэу мэхъу педиатрэр, гинекологыр. Мы къэкIогъухэм анэмыкIэу игъэкIотыгъэ диспансеризациер афызэхэтэщэ, амал зэриIэкIэ псауныгъэм игъэпытэн фэIорышIэрэ нэмыкI Iофтхьабзэхэри ретэгъэкIокIых, — къыхигъэщыгъ фельдшер-мамыку пунктым ипащэ.
Мы IэзапIэм Сусаннэ закъу щылажьэрэр. ИкIыгъэ илъэсым итыгъэгъэзэ мазэу унакIэр къызыщызэIуахыгъэм тефэу къэкIонэу хъугъэ. Ар къуаджэу ПчыхьалIыкъуае къыщыхъугъ, щапIугъ ыкIи джыри унагъо ихьагъэу ащ щэпсэу. Ишъхьэгъусэрэ ежьыррэ кIэлэцIыкIу зэдапIу. Сусаннэ Краснодар дэт медицинэ колледжым лъэшэу ыгу рихьырэ мамыку сэнэхьатыр щызэригъэгъотыгъ. Нэужым Краснодар и Перинатальнэ гупчэ илъэситфырэ Iоф щишIагъ. Сабый къыпыфи, чэщ дежурствэхэм кIонэу амал имыIэ зэхъум, ежь ишIоигъоныгъэкIэ къыIукIыжьыгъ. Бзылъфыгъэ нэгушIор джы зыIут IэзапIэм щыриIэ пшъэрылъхэр зэрэфэлъэкIэу егъэцакIэх. Анахь шъхьаIэр сымаджэу къакIорэм ыгу къыдэпщэеныр, ищыкIэгъэ гущыIэ фабэхэр пэбгъохынхэр, зыгъэгумэкIырэм уедэIуныр ары. Сусаннэ илъэсныкъоу мыщ Iоф зыщишIэрэм къыкIоцI ищытхъу аригъэIон, зыкъаригъэштэн ылъэкIыгъ, псэупIэм дэсхэм ныбджэгъушIу афэхъугъ.
Iэшъынэ Сусан. Сурэтхэр: Iэшъынэ Аслъан.