Пчъагъэхэм къаIуатэ
2023-рэ илъэсым имэзихэу пыкIыгъэм АР-м хэгъэгу кIоцI IофхэмкIэ и Министерствэ иIофшIэн зыщызэфихьысыжьыгъэ зэхэсыгъо джырэблагъэ щыIагъ.
Министрэу Олег Безсмельницыным къызэриIуагъэмкIэ, полициер ыкIи нэмыкI хэбзэухъумэкIо къулыкъухэр зэгъусэхэу чанэу зэрэзэдэлажьэхэрэм ишIуагъэкIэ шъолъырым илъ рэхьатныгъэм зыпкъитыныгъэ иI.
Мы илъэсым имэзи 6-у пыкIыгъэм республикэм бзэджэшIэгъэ 1880-рэ щызэрахьагъэу агъэунэфыгъ. 2022-рэ илъэсым мыщ фэдэ иуахътэ егъэпшагъэмэ а пчъагъэр процент 22-кIэ нахь макI.
АдыгеимкIэ полицием икъулыкъушIэхэм Iофтхьабзэу зэшIуахыгъэхэм яшIуагъэкIэ хъункIэн бзэджэшIагъэу зэрахьагъэхэр, псэупIэхэм зэрятыгъуагъэхэр, зыныбжь имыкъугъэхэм хэбзэукъоныгъэхэр зэрашIыгъэхэр нахь макIэ хъугъэ.
Мы уахътэм къыриубытэу хэбзэнчъэу наркотикыр къызэрэрагъэкIокIыгъэм епхыгъэ бзэджэшIэгъи 107-рэ агъэунэфыгъ.
Мы илъэсым имэзи 6 Адыгеим игъогухэм хъугъэ-шIэгъи 190-рэ къатехъухьагъ. Ахэм нэбгырэ 23-рэ ахэкIодагъ, нэбгырэ 227-мэ шъобжхэр атещагъэхэ хъугъэ. Зыныбжь имыкъугъэхэр зыхэфэгъэ гъогу хъугъэ-шIэгъэ 18 агъэунэфыгъ, ахэм зы кIэлэцIыкIу ахэкIодагъ, нэбгырэ 20-мэ шъобжхэр атещагъэхэ хъугъэ.
Полицием иIофшIэнкIэ анахь шъхьаIэу къыхагъэщыгъэр общественнэ щынэгъончъэныр ыкIи хэбзэ рэхьатныгъэр къэухъумэгъэныр, экстремизмэ нэшанэ зиIэ бзэджэшIагъэхэм цIыфхэр ащыухъумэгъэнхэр, ныбжьыкIэхэм зэрахьэрэ бзэджэшIагъэхэр нахь макIэ шIыгъэнхэр, нэмыкIхэри.
КIАРЭ Фатим.