ТекIоныгъэр къыдахыгъ
Къалэхэр гуIэтыпIэу зэтегъэпсыхьэгъэнхэмкIэ я VIII-рэ Урысые зэнэкъокъум Мыекъуапэрэ Адыгэкъалэрэ языгъэпсэфыпIэ чIыпIэхэм язэтегъэпсыхьан фэгъэхьыгъэ проектхэм текIоныгъэр къыщыдахыгъ. «Къэлэ цIыкIухэм ыкIи тарихъ псэупIэхэм яхэхъоныгъ» зыфиIорэ форумым изэфэхьысыжьхэм ар къаушыхьатыгъ.
Зэнэкъокъур УФ-м и Президентэу Владимир Путиным иунашъокIэ зэхэщагъэ хъугъэ. Лъэпкъ проектэу «ПсэупIэ ыкIи къэлэ зэтегъэпсыхьагъ» зыфиIорэм хэхьэрэ федеральнэ проектэу къалэхэр шэпхъэшIухэм адиштэным фэгъэхьыгъэм хэтэу зэнэкъокъур рагъэкIокIы. Къэлэ цIыкIухэм языгъэпсэфыпIэ ыкIи общественнэ мэхьанэ зиIэ чIыпIэхэм хэхъоныгъэшIухэр афашIынымкIэ, непэрэ мафэм диштэу зэтырагъэпсыхьанхэмкIэ ар амалышIу мэхъу.
«Къэлэ цIыкIухэу нэбгырэ мини 100-м къыщыублагъэу мин 200-м нэс зыщыпсэухэрэм» зыфиIорэ зэнэкъокъу едзыгъом Мыекъуапэ изыгъэпсэфыпIэ чIыпIэу Мэздахэ изэтегъэпсыхьанкIэ къыщагъэлъэгъогъэ проектым текIоныгъэр къыщыдихыгъ.
«Къэлэ цIыкIухэу нэбгырэ мин 20-м нэс зыщыпсэухэрэр» зыфиIорэ едзыгъом Адыгэкъалэ ипарк ия 2-рэ Iахь изэтегъэпсыхьанкIэ къагъэлъэгъогъэ проектыр щыпхырыкIыгъ. Зэнэкъокъум пылъ шапхъэхэмкIэ проектитIури 2024 — 2025-рэ илъэсхэм агъэцэкIэнхэу щыт. Адыгеим и ЛIышъхьэу КъумпIыл Мурат текIоныгъэу къыдахыгъэм мэхьанэшхо ритыгъ, ащ ишIуагъэкIэ республикэм икъэлитIу хэхъоныгъэшIухэр зэрапыщылъхэр къыкIигъэтхъыгъ.
УФ-м и Правительствэ и Тхьаматэу Михаил Мишустиным зэрэхигъэунэфыкIыгъэмкIэ, федеральнэ бюджетым мыгъэ сомэ миллиард 20-у къытIупщыгъэр текIоныгъэр къыдэзыхыгъэ проекти 145-мэ атырагощэщт. Къэралыгъом ипащэ иунашъокIэ фондым имылъку хагъэхъуагъ. А ахъщэм щыщ зигугъу къэтшIыгъэ проектитIумкIэ Адыгеими мылъку къыфатIупщыщт. Адыгэкъалэ мы зэнэкъокъум ящэнэрэу хэлажьэ. Мызыгъэгум къэлэ паркым игъэкIэжьынкIэ ищыкIэгъэ Iофтхьабзэу къыхалъхьагъэхэр — лъэсрыкIо гъогухэр зэтегъэпсыхьэгъэнхэр, кIэлэцIыкIу джэгупIэхэр шIыгъэнхэр, остыгъэхэр атегъэуцогъэнхэр.
Зэфэхьысыжьхэр зыщашIыгъэ зэхахьэм хэлэжьагъэу, Мыекъуапэ иадминистрацие ипащэу Геннадий Митрофановым текIоныгъэу зэнэкъокъум къыщыдахыгъэм мэхьанэшхо ритыгъ, тикъэлэ гупсэ итеплъэ хэхъоныгъэшIухэр фэшIыгъэнхэмкIэ джыри зы амалышIоу ар хигъэунэфыкIыгъ.