Адыгеим ичIыгулэжьхэм бжыхьэсэ лэжьыгъэхэм яIухыжьын гъунэм рафылIагъ. ПстэумкIи гектар 109801-рэ ар хъущтыгъ. АР-м мэкъу-мэщымкIэ и Министерствэ бэдзэогъум и 24-м тызэрэщигъэгъозагъэмкIэ, ащ щыщэу 87980-р Iуахыжьыгъах.

Бжыхьэсэ коц гектар 90300-м хагъэкIыгъ 78803-рэ. Зы гектарым, гурытымкIэ лъытагъэу, центнер 43,7-рэ къырахыжьы, тонн 344483-рэ къаугъоижьыгъ.

Джэджэ районым бжыхьасэхэм яIухыжьын щаухыгъ пIоми хъущт. Гектар 31517-у яIагъэм ипроцент 99-р аIожьыгъах. Коцэу мы районым щапхъыгъагъэр гектар 23439-рэ хъущтыгъ, 23293-р хагъэкIыгъ. Зы гектарым, гурытымкIэ центнер 45,1-рэ къеты.

Анахьыбэу къизыхырэр, гурытымкIэ лъытагъэу центнер 48,2-рэ, Красногвардейскэ районым ичIыгулэжьхэр ары. Бжыхьэсэ коц гектар 11691-рэ пстэумкIи яIагъ, Iуахыжьыгъэр 8440-рэ мэхъу. КъыщырахыжьырэмкIэ ахэм ауж кIэкIэу ит Шэуджэн районыр. ПстэумкIи гектар 14750-рэ мы культурэм рагъэубытыгъагъ, 12845-р Iуахы­жьыгъ, гурытымкIэ центнер 48-рэ къеты.

ЗэкIэмкIи комбайнэ 251-мэ республикэм ибжыхьасэхэр Iуахыжьых. Ахэм лэжьыгъэр зытырахыгъэу пстэумкIи гектар 47755-мэ уарзэр ащаупкIэтэжьыгъах, ар зыхажъухьажьыгъэр гектар 37504-р ары.

Гъатхэм апхъыгъагъэхэм яIухыжьын езыгъэжьагъэхэри чIыгулэжьхэм ахэтых. ГущыIэм пае, Джэджэ районым гъэтхэсэ хьэ гектари 10,8-у щыхалъхьэгъагъэр Iуахыжьыгъ, зым центнер 25,6-рэ къырахыгъ. Зэнтхъ гектар 51-у яIэм щыщэуи 10-р аIожьыгъах, гурытымкIэ лъытагъэу, центнер 32,5-рэ къеты. Джащ фэдэу мы районым джэнч лъэпкъэу щыхалъхьэгъагъэхэм, хэтэрыкIхэм яIухыжьыни щырагъэжьагъ.

Зэнтхъыр Мыекъопэ районми щыIуахыжьы. ПстэумкIи гектари 102-рэ яIагъ, 87-р хагъэкIыгъ, центнер 27,4-рэ къырахы.

ХЪУТ Нэфсэт.