Бэдзэогъум и 22-м, мафэм Мыекъопэ къэлэ паркым хъугъэ-шIэгъэ тхьамыкIэгъошхоу къыщыхъугъэм зыныбжь имыкъугъэ кIэлэцIыкIоу илъэси 9 зыныбжьыр зэрэхэкIодагъэм цIыфхэр лъэшэу зэридзагъэх. Урысыем и Следственнэ Комитет иследственнэ ГъэIорышIапIэу АР-м щыIэм Iоф хьылъэхэм язэхэфынкIэ иотдел мы гъогу хъугъэ-шIагъэмкIэ уголовнэ Iоф къызэIуихыгъ.

УФ-м и Следственнэ комитет и Тхьаматэу Александр Бастрыкиным АР-м иследственнэ Гъэ­IорышIапIэ ипащэу А. Липало пшъэрылъ фишIыгъ пэшIоры­гъэшъ ыкIи зэхэфын Iофхэр зэрэкIорэм ышъхьэкIэ щигъэ­гъозэнэу.

Следствием зэригъэунэфыгъэмкIэ, бэдзэогъум и 22-м мафэм сыхьатыр 2-рэ такъикъ 30-м Мыекъуапэ урамэу Спортивнэмрэ Гагариным ыцIэ зыхьырэ урамымрэ зыщызэ­уалIэхэрэм автомобилэу «Мерседес Бенц» зыфиIоу урамэу Спортивнэм къырычъэщтыгъэр ыпэ итэу автомобилэу «Форд Фокусым» еутэ­кIыгъ.

Ащ ыуж автомобилэу «внедорожникыр» лъэшэу чъэзэ къэлэ паркым екIурэ урамэу Спортивнэм телъади, гъунапкъэ­хэр къэзыгъэнэфэрэ пкъэоу тетыгъэхэр риутыхэзэ, лъэсрыкIо гъогу цIыкIум тетыгъэ цIыфхэм ахэлъэдагъ. Илъэси 9 зыныбжь кIэлэцIыкIур тыри­утыгъ, шъобжэу тещагъэхэм апкъ къи­кIэу а чIыпIэм ащ идунай щихъожьыгъ. Ащ ыуж автомобилыр Шъхьэгуащэ инэпкъ дыс къечъэхи, а чIыпIэм щызэпыри­гъэзагъ.

Автомобилэу «Мерседес Бенц» зыфиIорэм иводитель ыкIи ащ дисыгъэ нэбгыри 7-мэ, ахэм ащыщэу нэбгыри 5-р кIэлэцIыкIух, шъобж зэфэшъхьаф­хэр атещагъэхэу сымэджэщым ащагъэх.

Мы мафэм ехъулIэу хъугъэ- шIагъэм лъапсэ фэхъугъэр гъэ­унэфыгъэнымкIэ следовательхэм следственнэ уплъэкIунхэр ра­гъэкIокIых, хьыкум экспертизэхэр ашIых.

Тигъэзет къызщыдэкIыщт уахътэм ехъулIэу, мы гъогу хъугъэ-шIагъэм ыпкъ къикIэу псаоу къэнагъэхэу сымэджэщым чIэлъхэм япсауныгъэ изытет зыщыдгъэгъозагъ. Республикэ кIэлэцIыкIу клиническэ сымэджэщым иврач шъхьаIэу Гъогъо Жаннэ къызэрэтиIуагъэмкIэ, мы мафэм ехъулIэу сымэджэщым нэбгыритIу чIэлъ.

— Илъэси 7 зыныбжь пшъэшъэжъыер реанимацием илъ, изытет хьылъэкIаеу алъытэ. Адрэ пшъэшъэжъыеу илъэс 12 зыныбжьыр педиатриемкIэ отделением чIэлъ, ащ ипсауны­гъэкIэ зыпари щынагъо щыIэп, — къыIуагъ Гъогъо Жаннэ.

Джащ фэдэу врач шъхьаIэм къызэриIуагъэмкIэ, телемедицинэ амалыр къызфагъэфеди, Урысые лъэпкъ ушэтэкIо медицинэ университетэу Н. И. Пироговым ыцIэ зыхьырэм сымаджэхэм язытет щауплъэкIугъ. ЗэряIэзэщтхэр зэкIэ аIэкIэлъ, лъыри афекъу.

УФ-м и Следственнэ комитет иследственнэ ГъэIорышIапIэу АР-м щыIэм имызакъоу, АР-м и Прокуратурэ, АР-м хэгъэгу кIоцI IофхэмкIэ и Министерствэ мы хъугъэ-шIагъэм изэхэфынкIэ Iофышхо ашIэ, Iоф­тхьэбзэ зэфэшъхьафхэр агъэцакIэх.