Пчъагъэхэм къаIуатэ
ГъогурыкIоныр щынэгъончъэнымкIэ къэралыгъо гъэIорышIапIэу Хэгъэгу кIоцI IофхэмкIэ АР-м и Министерствэ хэтым къызэритырэмкIэ, 2023-рэ илъэсым имэзихэу пыкIыгъэм гъогурыкIоным ишапхъэхэр аукъуагъэхэу гъогогъуи 190-рэ агъэунэфыгъ, ахэм нэбгырэ 23-рэ ахэкIодагъ, нэбгырэ 227-мэ шъобжхэр атещагъэ хъугъэ. БлэкIыгъэ зыгъэпсэфыгъо мафэхэм Мыекъуапэ ыкIи Тэхъутэмыкъое районым къащыхъугъэ тхьамыкIагъохэм а пчъагъэхэм ахигъэхъуагъ. ЗэкIэмэ анахь гумэкIыгъор сабыйхэр хэкIуадэхэу, шъобжхэр хахэу гъогухэм къащыхъурэ тхьамкIагъохэр нахьыбэ зэрэхъугъэхэр ары (процент 40-кIэ).
Джащ фэдэу бэдзэогъум и 9-м Шэуджэн районым гъогум щызэутэкIыгъэ машинитIум апкъ къикIыкIэ автомобилыр зезыфэщтыгъэмрэ дисыгъэхэмрэ хэкIодагъэх, ахэм язырэр сабый, джыри кIэлэцIыкIуитIум шъобжхэр атещагъэ хъугъэ. БэмышIэу Теуцожь районым къыщыхъугъэ машинэ зэутэкIым зы нэбгырэ хэкIодагъ, ащ дисыгъэ нэбгыриплIыми шъобжхэр хахыгъэх, ахэм ащыщэу нэбгырищыр зыныбжь имыкъугъэ кIэлэцIыкIух. ЯтIонэрэ машинэм исыгъэ нэбгырищми зэрар ащ хахыгъ.
Бэдзэогъу пчыхьэ горэм самокатыр гъогум зэпырызыщыщтыгъэ сабыеу илъэси 8 зыныбжьыр тезыутыгъэ автомобилистыр къэуцугъэп. Шъобж зэфэшъхьафхэр фэхъугъэу АР-м икIэлэцIыкIу клиническэ сымэджэщ сабыир нагъэсыгъ. Ар зышIэгъэ бзэджашIэм зигъэбылъыжьыгъ. Ау Мыекъуапэ и Къэралыгъо автоинспекцие иIофышIэхэм ар къагъотыгъ, бзэджэшIагъэ зезыхьагъэм иIоф зэхафы.
«Мыекъуапэ – Джаджэ – Псыбай» зыфиIорэ гъогум ия 47-рэ километрэ къыщыхъугъэ тхьамыкIагъом игугъу къэмышIын плъэкIыщтэп. Автомобилым исэу зекIо кIогъэ унагъор поселкэу Заревэм ыкIи станицэу Джаджэм азыфагу илъ гъогум къыщыуцунэу хъугъэ. Илъэси 7 зыныбжь сабыир машинэм къикIи гъогум къытелъэдагъ. БлэкIыщтыгъэ машинэм ар тыриутыгъ. Шъобж зэфэшъхьафхэр фэхъугъэхэу сабыир АР-м икIэлэцIыкIу клиническэ сымэджэщ нагъэсыгъ.
Бэдзэогъум и 20-м гъогууанэу Мыекъуапэ — Джаджэ — Псыбай ия 62-рэ километрэ илъэс 14 зыныбжь кIалэр щытыраутыгъ. Рулым кIэрысыгъэр Краснодар краим щэпсэу, илъэс 55-рэ ыныбжь. IэпыIэгъу псынкIэр къэмысызэ зыныбжь имыкъугъэм ыпсэ хэкIыгъ.
Зигугъу къэтшIыгъэ хъугъэ-шIагъэхэмкIэ къулыкъу гъэнэфагъэхэм зэхэфын IофшIэнхэр зэшIуахы.
Гъогухэм къащыхъурэ тхьамыкIагъохэр зыпкъ къикIырэр гъогурыкIоныр щынэгъончъэнымкIэ шапхъэхэр машинэхэр зезыфэхэрэми, лъэсрыкIохэми зэраукъохэрэр ары: анахьыбэу зэрэхэукъохэрэр апэкIэ къикIырэ машинэм игъогу зэрэтехьэхэрэр, машинэу зэблэкIыхэрэм ячэзыу зэраукъорэр, гъогум зэдытет автомобильхэм язэпэчыжьагъэ зэрэфэмысакъыхэрэр ары.
Сабыйхэр гъогум зыдытезыщэхэрэ ны-тыхэми гъогурыкIоным ишапхъэхэр зыщагъэгъупшэ хъущтэп. Щынэгъончъэ бгырыпхыхэр, къэзыухъумэрэ тIысыпIэхэр, шъхьэр къэзыухъумэщт шлемхэр, лъэгонджэ ыкIи Iэтэгъу телъхьэхэр ахэм ящыкIагъэх. Самокатхэр, кушъхьэфачъэхэр, скутерхэр ыкIи нэмыкI зечъэрэ пкъыгъохэр къафащэфынхэм ыпэкIэ ахэм ягъэфедэн ишапхъэхэр сабыйхэм арагъэшIэн фае.