«Хэгъэгум иухъумакIохэр» зыфиIорэ Къэралыгъо фондым иапэрэ форумэу «Зэфагъ. ШIушIагъ. Лъытэныгъ» зыфиIорэр джырэблагъэ ТекIоныгъэм имузееу Москва дэтым щыкIуагъ. Заохэм ахэлэжьэгъэ ветерани 150-рэ ащ къыщызэрэугъоигъагъ.

ХэушъхьафыкIыгъэ дзэ операцием хэлажьэхэу, ветеранхэу, къэралыгъо тынхэр къызфагъэшъошагъэ­хэу И. Донцовымрэ М. Къэрданэмрэ АР-м илIыкIохэу ащ хэлэжьагъэх. Фондым ишъолъыр къутамэ къызэритырэмкIэ, М. Къэрданэр ежь ишIоигъоныгъэкIэ хэушъхьафыкIыгъэ дзэ операцием хэлэжьагъ. УIэгъэ хьылъэ къызытыращэм ыуж къыгъэзэжьын фаеу хъу­гъэ. Зэо зэпэуцужьхэм зэрахэлэжьагъэр, ахэм яветеранэу зэрэщытыр тхылъым икъыдэхынкIэ ыкIи сэкъатныгъэу иIэмкIэ купэу зыхахьэрэм игъэнэфэнкIэ IэпыIэгъу ищыкIагъэу Фондым ащ зыфигъэзагъ. Лъэ­ныкъуитIумкIи IэпыIэгъу ыгъотыгъ.

И. Донцовым илъэс 15-м патриотическэ гъэсэныгъэмкIэ общественнэ мэхьанэ зиIэ Iофыгъохэм чанэу ахэлэжьагъ. Федеральнэ ыкIи шъолъыр проект пчъа­гъэхэм язэшIохынкIэ шIэныгъэ куу зэригъэгъотыгъ. А лъэныкъомкIэ иIофшIэн лъигъэкIотэн ылъэкIыным пае къышъхьапэщт шIыкIэ-амалхэм ащыгъуазэ шIоигъоу И. Донцовыр а форумым кIуагъэ. АР-м патриотическэ Iофтхьабзэу щызэшIуахыхэрэм ахэгъэхъогъэным джыри дэлэжьэным ар фэхьазыр.

Общественнэ организациехэм япроектхэм ветеранхэр тапэкIэ ахэлэжьэнхэ зэралъэкIыщтыр, ежьхэм ягукъэкIхэр пхырагъэкIынымкIэ ашIэн фаехэр, хэу­шъхьа­фыкIыгъэ дзэ операцием зэрэхэлэжьагъэхэр къаIуатэзэ, ашъхьэкIэ къарыкIуагъэр хэгъэгум уфэшъыпкъэным ищысэтехыпIэу зэрэщытыр цIыфхэм тэрэзэу анэгъэсыгъэныр, ежьхэм афэдэ ветеранхэр мамыр щыIакIэм хэгъэгъозэжьыгъэнхэр форумым зыщытегущыIэгъэхэ лъэныкъохэм ащыщых.