ХэушъхьафыкIыгъэ дзэ операцием хэлажьэхэрэм ащыщыбэм зэзэгъыныгъэкIэ къулыкъур къыхахыгъ. ДзэкъулыкъушIэхэм ыкIи ахэм яунагъохэм къэралыгъор IэпыIэгъу афэхъузэ, ахъщэ тын зэфэшъхьафхэр афигъэнэфагъ.

Уф-м зыухъумэжьынымкIэ и Министерствэ зэзэгъы­ныгъэкIэ къулыкъур щихьынэу кIатхэрэм зэтыгъо ахъщэ тынэу Адыгеим щыратырэм хагъэхъуагъ ыкIи ар сомэ мин 200-м нэсыгъ.

Мыщ ыпаIокIэ мобилизацием къыхиубытагъэу е гуфакIоу хэушъхьафыкIыгъэ дзэ операцием ащагъэхэм зэтыгъо ахъщэу сомэ мини 100 аратыщтыгъэр. АР-м и Правительствэ иунашъокIэ 2023-рэ илъэсым, мэкъуогъум а ахъщэ тыныр сомэ мини 150-рэ ашIыгъ. Мазэ тешIагъэу, бэдзэогъум, джыри ащ сомэ мин 50 хагъэхъуагъ ыкIи сомэ мин 200-м нагъэсыгъ.

Зэзэгъыныгъэм кIэтхэгъэ дзэкъулыкъушIэм ахъщэ тынхэр къыратынхэм фэшI паспортым икопие ыкIи ахъщэр зэрагъэхьащт лицевой счетым иномер ыIыгъ­хэу дзэ комиссариатым екIолIэн лъэIу тхылъ ытхын фае. ЦIыфыр Адыгеим щыпсэоу, ау чIыпIэм дэмытхагъэмэ, мы уахътэм зыщыпсэурэм щыIэ дзэ комиссариатым идзэ учет зэрэхэтымкIэ тхылъэу къыритырэм кIуачIэ иI.

Мы шъолъыр ахъщэм нэмыкIэу дзэкъулыкъушIэм иIофшIэн зэрифэшъуашэу ахъщэ къыкIэкIо: зэзэгъыныгъэм зэрэкIатхэрэм пае зэтыгъо федеральнэ ахъщэ тынэу сомэ мини 195-рэ, мазэ къэс лэжьапкIэр сомэ мин 205-рэ, водителым — сомэ мин 211-м, отделением икомандир — мин 232-м къащежьэ. Къулыкъум щашIырэ гъэхъагъэхэр къыдыхалъытэх.

Къыхэдгъэхъожьын къэралыгъо фондэу «Хэгъэгум иухъумакIохэр» зыфиIорэм ишъолъыр отделение иIоф­шIэн Адыгеим зэрэщыригъэжьагъэр. Ащ иIофышIэхэм хэушъхьафыкIыгъэ дзэ операцием хэлажьэхэрэм, иветеранхэм, хэкIодагъэхэм ыкIи ахэм яунагъохэм IэпыIэгъу арагъэгъоты. Фондым еуалIэхэрэм къазэрадеIэщтхэр: социальнэ лъэныкъомкIэ IэпыIэгъу пстэури, егъэджэгъэнхэр ыкIи икIэрыкIэу егъэджэжьыгъэнхэр, IофшIэн ягъэгъотыгъэныр, ахъщэ тынхэр афэгъэпсыгъэнхэр, медицинэ IэпыIэгъу зэфэшъхьафхэр афэгъэцэкIэгъэнхэр, IэзэпIэ-зыгъэпсэфыпIэхэм гъэ­кIогъэнхэр, нэмыкIхэри.

ЗэзэгъыныгъэкIэ къулыкъу хьыгъэным къыфэдгъэзэжьымэ, ащ кIон фитхэр илъэс 18 зыныбжьхэм къащегъэжьагъэу илъэс 65-м нэс. Шъхьадж зыщыпсэурэ чIыпIэм щыIэ дзэ комиссариатхэм защарагъэтхын алъэкIыщт.

ЛъэIу тхылъыр номерэу 117-м, порталэу «Къэралыгъо фэIо-фашIэхэр» зыфиIорэм е сайтэу службапоконтракту.рф. щатын алъэкIыщт. ЗэкIэ ахъщэ тынхэм ыкIи фэгъэкIотэнэу щыIэхэм япхыгъэ къэбарыр нахь игъэкIотыгъэу зэзыгъашIэ зышIоигъохэм а сайтым ыкIи телеграм-каналэу «Адыгея — Служу Родине» зыфиIорэм арагъотэщт.