ЯшIэныгъэхэм ахагъахъо
ХимиемкIэ ыкIи биологиемкIэ гъэмэфэ еджапIэр мэфэкI шIыкIэм тетэу бэдзэогъум и 19-м къызэIуахыгъ.
Хабзэ зэрэхъугъэу, Адыгэ къэралыгъо университетым изыгъэпсэфыпIэу «Горная легенда» зыфиIорэм ар щызэхащагъ. Урысыем ишъолъыри 10-мэ къарыкIыгъэ кIэлэеджэкIуи 106-рэ ащ къекIолIагъ. Ахэм ащыщэу 57-р Адыгеим щыщых. Я 7-рэ классым къыщегъэжьагъэу я 11-м нэс ащеджэхэу мы предметхэм афэщагъэхэм тхьамэфищым яшIэныгъэхэм мыщ щахагъэхъощт.
БиологиемкIэ гъэмэфэ еджапIэр 2019-рэ илъэсым къыщегъэжьагъэу, химиемкIэ — ятIонэрэу зэхащэ. Мы предметхэм ямэхьанэ нахь зыкъырагъэIэтыныр, игъэкIотыгъэу арагъэшIэныр, интеллектуальнэ зэнэкъокъухэм афагъэхьазырынхэр, практическэ задачэхэр дэгъоу къашIыныр ары пшъэ-рылъ шъхьаIэу зэхэщакIохэм зыфагъэуцужьырэр.
АР-м гъэсэныгъэмрэ шIэныгъэмрэкIэ и Министерствэ, Адыгэ къэралыгъо университетыр, республикэ естественнэ-хьисап еджапIэр, «Полярис-Адыгея» зыфиIорэр ары гъэмэфэ еджапIэм кIэщакIо фэхъугъэхэр.
Гъэсэныгъэ программэм теоретическэ ыкIи практическэ IофшIэн зэфэшъхьафхэр къыделъытэх. Химием фэщэгъэ ныбжьыкIэхэм апэрэ мэфищым органическэ ыкIи мыорганическэ химием фэгъэхьыгъэ шIэныгъэхэр арагъэгъотыщтых. Программэм ихьылъагъэ зэфэшъхьаф, атомыр зэрэзэхэтым къыщегъэжьагъэу, реакциехэм яуравнениехэр, фенолыр зэрэзэхэтыр ыкIи нэмыкIхэр къыделъытэх.
Биологиер зикIэсэ кIэлэеджакIохэми ягъэсэныгъэ программэ гъэшIэгъонэу щыт. Зоологием, молекулярнэ биологием ыкIи микробиологием япхыгъэ шIэныгъэхэр игъэкIотыгъэу афызэхафыщтых. Джащ фэдэу палеонтологиер ыкIи экологиер, цIыфым ифизиологие ыкIи ианатомие, биохимиер, генетикэр, нэмыкI лъэныкъохэми анэсыщтых.
НыбжьыкIэхэм шIэныгъэ языгъэгъотыгъэ кIэлэеджакIохэм республикэ естественнэ-хьисап еджапIэр, хэгъэгум ит апшъэрэ еджапIэхэр къэзыухыгъэхэр ахэтых. Мыгъэ апэрэу Москва къэралыгъо университетым ихэушъхьафыкIыгъэ факультет къикIыгъэхэм ныбжьыкIэхэм Iоф адашIэщт. Джащ фэдэу Ломоносовым ыцIэ зыхьырэ къэралыгъо университетым биологиемкIэ ифакультет кIэлэегъэджэ пэрытхэр къикIыгъэх.
Маяковскэм ыцIэ зыхьырэ еджапIэу Москва дэтым къикIырэ кIэлэегъаджэхэр илъэс заулэ хъугъэу химиемкIэ гъэмэфэ еджапIэм къекIолIагъэхэм шIэныгъэхэр арагъэгъоты. Ахэм IэпэIэсэныгъэшхо яI, рагъаджэхэрэм химиемкIэ Урысые олимпиадэхэм иаужырэ уцугъохэм текIоныгъэ ыкIи хагъэунэфыкIырэ чIыпIэ ренэу къащадахы.
КIэлэеджакIохэм яшIэныгъэхэм зэрахагъэхъощтым дакIоу ахэр агъэчэфыщтых, спортивнэ, творческэ зэнэкъокъухэр, интеллектуальнэ джэгукIэхэр афызэхащэщтых. Ащ нэмыкIэу спикерхэм мастер-классхэр къатыщтых. Хабзэ зэрэхъугъэу, гъэмэфэ еджапIэм адыгэ культурэм фэгъэхьыгъэ Iофтхьабзэ щызэхащэщт. Адыгэхэм яшэн-хабзэхэр, якультурэ нэмыкI шъолъырхэм къарыкIыгъэ хьакIэхэр нахь благъэу нэIуасэ афашIыщт.
Адыгэ къэралыгъо университетым ипресс-къулыкъу.