Урысые Федерацием и УIэшыгъэ КIуачIэ­хэм яхьылIэгъэ къэбар нэпцI цIыфхэм зэраIэкIигъэхьагъэм пае Красногвардейскэ районым щыщ хъулъфыгъэу уголовнэ Iоф къызыфызэIуахыгъэм фэгъэхьыгъэу хьыкумым унашъоу ышIыгъэм кIуачIэ иIэ хъугъэ.

ЩынэгъончъэнымкIэ Федеральнэ къулыкъум Адыгэ Рес­публикэмкIэ и ГъэIорышIапIэ иIофышIэхэм зэрагъэунэфы­гъэмкIэ, Красногвардейскэ районым щыщ Игорь Коротковым 2022-рэ илъэсым игъэтхапэ мобильнэ телефоныр къызфигъэфедэзэ, Урысые Феде­рацием и УIэшыгъэ КIуачIэхэм афэгъэхьыгъэ видеороликэу къэбар нэпцIхэр цIыфхэм зэра­лъигъэIэсыгъэр интернет-мессенджерэу «WhаtsАрр»-м ригъэ­хьагъ.

Урысыем и Следственнэ ко­митет Адыгэ РеспубликэмкIэ иследственнэ гъэIорышIапIэ оперативнэ-лъыхъон Iофтхьа­бзэу зэрихьагъэхэмкIэ материалхэр щынэгъончъэнымкIэ фе­деральнэ къулыкъухэм IэубытыпIэ къызыфашIыхэзэ, Урысыем и Уголовнэ кодекс ия 207.3-рэ статья иа 1-рэ Iахь диштэу илъэс 39-рэ зыныбжь хъулъфыгъэм уголовнэ Iоф къы­фызэIуахыгъ.

Красногвардейскэ район хьы­кумым И. Ю. Коротковым лажьэ иIэу ылъытагъ, Урысыем и Уголовнэ кодекс ия 207.3-рэ статья иа 1-рэ Iахь диштэу сомэ мин 800 тазырэу тырилъхьагъ. Адыгэ Республикэм и Апшъэрэ хьыкум мы уголовнэ Iофым икIэрыкIэу зыхэплъэжьым, Красногвардейскэ район хьыкумым унашъоу ышIыгъэр тэрэзкIэ ылъытагъ.

Хьыкумым иунашъо кIуачIэ иIэ хъугъэ.

ЩынэгъончъэнымкIэ ­Федеральнэ къулыкъум АР-мкIэ и ГъэIорышIапIэ ипресс-къулыкъу