Iоф зишIэрэр илъэс хъугъэ
Къулыкъоу 122-м иреспубликэ кол-гупчэ зызэхащагъэр илъэс хъугъэ. 2020-рэ илъэсым, пандемием илъэхъан, ащ Iоф ышIэу ригъэжьэгъагъ пIоми хъущт. КовидымкIэ республикэм исхэм яупчIэхэм джащыгъум Адыгеим иапшъэрэ еджапIэхэмрэ иколледжхэмрэ ястудент волонтерхэм джэуап къаратыжьыщтыгъ.Нэужым зигугъу къэтшIырэ гупчэр медицинэ информационнэ-аналитическэ гупчэм хагъэхьажьыгъ ыкIи техническэу нахь зэтырагъэпсыхьагъ. Ащ гъэцэкIэжьын IофшIэнхэр щыкIуагъэх, ищыкIэгъэ оборудованиер къащэфыгъ. Рагъэджэгъэ нэбгырэ 46-мэ джыдэдэм операторэу Iоф ашIэ.
Контакт-гупчэм испециалистхэм медицинэ фэIо-фашIэхэм язэхэщэн епхыгъэ Iофыгъохэр цIыфхэм къафызэхафых, зязыгъэуплъэкIу зышIоигъохэр врачхэм адэжь атхых. Республикэм иIэзапIэхэр зэкIэ ащ зэрэрапхыгъэм медучреждениехэм ярегистратурэхэм яIофшIэн къафигъэпсынкIагъ. Джащ фэдэу «линие плъырымкIэ» зэзэгъыныгъэ шIыкIэм тетэу дзэ къулыкъур ахьын зэралъэкIыщтым, мобилизацием къыхиубытэхэрэм IэпыIэгъу зэрафэхъухэрэм япхыгъэ упчIэхэр аратын алъэкIыщт.
Зыгъэпсэфыгъо мафэ имыIэу кол-гупчэм Iоф ешIэ, мафэ къэс нэбгырэ мини 5 фэдизмэ ялъэIу ащ егъэцакIэ. ГъэрекIо нэбгырэ мин 250-м ехъумэ врачхэм зарагъэуплъэкIунэу зарагъэтхыгъагъ. Гупчэм тапэкIи зызэриушъомбгъущтым, иамалхэм зэрахэхъощтым щэч хэлъэп.