Адыгеим игъогу Iахь 23-у мыгъэ агъэцэкIэжьынэу ра­гъэ­жьагъэхэм IофшIэнхэр ащаухых пIоми хъущт.

«Щынэгъончъэ ыкIи шэп­хъэшIухэм адиштэрэ автомобиль гъогухэр» зы­фиIорэ лъэпкъ проектым къыдыхэлъытагъэу 2024-рэ илъэсым агъэ­кIэжьынэу агъэнэфэгъагъэ­хэм ахэр ащыщых, пстэумкIи километрэ 54-рэ мэхъу. ПIалъэ­хэм апэ ишъын­хэм пае «Адыгеяавтодорыр» 2025-рэ илъэсымкIэ агъэнэфагъэхэм ащыщэуи Iахьи 6 нахьыжьэу агъэцэкIэ­жьы­нэу подрядчикхэм зэзэ­гъыныгъэхэм адыкIэтхагъ.

ГъэцэкIэжьын IофшIэнхэр зэрашIылIэхэрэм ащыщ тигъунэгъу къалэу Шытхьалэ, станицэу Джаджэр ыкIи поселкэу Дружбэр зэзыпхыхэрэ гъогум иIахьэу километри 6,2-рэ хъурэр. Ар адрэхэм атекIы. Сыда пIомэ субъектитIур, Краснодар краимрэ Адыгеимрэ, район гупчитIур, Шытхьалэрэ Джаджэмрэ, зэрепхых, шъолъыр ыкIи муниципальнэ мэхьанэ зиIэ гъогухэр хэхьэх, транспортэу щызэблэкIырэр бэ.

А зэпстэумэ ямыза­къоу, станицэу Дондуковскэм иурамитIумэ, Советскэмрэ Лениным ыцIэ зыхьырэмрэ, ягъогоу щыт, гурыт еджапIэр, культурэм и Унэ, мэкъумэщ техникумым изы унэ, паркыр, стадионыр тетых.

Гъогум игъэцэкIэжьын пстэумкIи сомэ миллиони 107,7-рэ пэIухьащт. Псэу­пIэр зэрэзэпичырэм фэшI гъогу зэхэкIыпIэу иIэхэм язэгъэфэн, тамыгъэу атетыщтхэм, зыщыгъэтхъы­гъэщтхэм анаIэ атырагъэ­тын фае. Общественнэ транспортыр къызщыуцу­рэмрэ социальнэ псэуа­лъэхэм яавтомобиль уцу­пIэхэмрэ асфальт атыралъ­хьащт. «Гъогу ыкIи псэолъэшI ГъэIорышIапIэу N 3-р» ары Iоф щызышIэрэр. Асфальтэу гъогур зэщиз зышIырэр агъэтIылъыгъах, джы мыжъокIэ-мастикэ зэхэлъэу ар зыгъэпытэщтыр тыралъхьэ. IофшIэнхэр мы илъэсым иIоныгъо мазэ и 1-м аухынхэ гухэлъ яI.