АР-м и Къэралыгъо Совет — Хасэм и Тхьаматэ игуа­дзэу Цэй Эдуард цIыфхэр зырегъэблагъэхэм, Мыекъуапэ ирайонхэм ащыщ Iофыгъоу иIэхэм щытегущы­Iагъэх.

Мобилизацием хэфa­гъэу хэушъхьафыкIыгъэ дзэ операцием хэлэжьэрэ дзэкIолIым ишъхьэгъусэ урамэу Калининым ыцIэ зыхьырэм хэкIырэ дэхьапIэхэм ащыщ игъэцэкIэ­жьынкIэ IэпыIэгъу афэ­хъунхэу къыкIэлъэIугъ. Ар автомобиль гъогум нахьи зэрэнахь лъхъанчэм къы­хэкIэу, ощхышхо къещхэу е бэу къесыгъэу осыр зыжъужьыкIэ, псыр ечъэ­-хышъ, дэуцо, щагухэм адэлъадэ.

Къэлэ администрацием илIыкIоу зэIукIэгъум хэлэжьагъэм къызэриIуагъэмкIэ, къалэм итемыр-къохьэпIэ лъэныкъоу ар зыдэгъэзагъэм щыпсэухэрэм мы гумэ­кIыгъор яI. Псыр гъогум къызэречъэхырэм имызакъоу, чIычIэгъымкIи къакIэхьэ. Ащ фытегъэ­псыхьэгъэ проектэу агъэ­хьазырыгъэм къыщыдэ­лъытагъэу Iофыгъом идэгъэзыжьын къихьащт илъэ­сым рагъэжьэщт, ау ащ емыжэхэу бзылъфыгъэр къызкIэлъэIугъэм игъэцэкIэн ыуж ихьащтых. Парламентым ипащэ игуа­дзэ IофшIэнхэр зэрэлъагъэкIуатэхэрэм ежь ышъхьэкIэ лъыплъэщтэу къариIуагъ.

ДзэкIолIым ишъхьэгъусэ къызэриIуагъэмкIэ, дэ­хьапIэр чэщырэ къагъэнэфырэп. Ащ пае электричествэм икIуапIэ дащэн фае. Мы уахътэм Iофы­гъом идэгъэзыжьын ыуж итых, IофшIэнхэр зэрэ­зэшIуахыщтхэр, пIалъэу яIэщтыр, мылъкоу пэIухьащтыр къалъытэх.