ШIэныгъэлэжь ныбжьыкIэхэм я Вавиловскэ еджапIэ Адыгэ къэралыгъо университетым истудентхэм яшIэныгъэхэм щахагъэхъуагъ.

Пшызэ ушэтыпIэ станциер ары (Н.И. Вавиловым ыцIэ зыхьырэ ВИР-м икъутам) шIэныгъэлэжь ныбжьыкIэхэм яеджа­пIэ зыщызэхащэгъагъэр, ар Краснодар краим и Гулькевичскэ район зыдэщыIэр. Урысыем ишъолъыриймэ — Адыгеим, Якутием, Краснодар краим, Белгородскэ ыкIи Калининградскэ хэкухэм, Москва ыкIи Санкт-Петербург — яшIэныгъэ­лэжь ныбжьыкIэ 20 а Iофтхьабзэм хагъэлэжьагъэх. Ахэм ащыщых Адыгэ къэралыгъо университетым естествознаниемкIэ ифакультет истуденткэхэу Алина Терещенкэмрэ Дарья Тидерманрэ.

«Агротехнологием инеущрэ маф» зыфиIорэ шIэныгъэ гупчэу дунэе мэхьанэ зиIэм ипрограммэ Вавиловым ыцIэ зыхьырэ еджапIэр хэхьэ.

Мэфитфым къыкIоцI еджапIэм рагъэблэгъагъэхэм къэкIыхэрэм ягенетическэ амалхэр ауплъэ­кIугъ. ХэтэрыкIхэм, дагъэ зы­хэлъ­хэ ыкIи ахьаджырэ культурэхэм ягенетическэ амалхэр зэгъэшIэгъэнхэмкIэ отделхэм япащэхэр лекциехэм къяджа­гъэх. Ахэр: мэкъумэщ шIэны­гъэхэмкIэ кандидатхэу Анна Артемьевар ыкIи Андрей Павловыр, биологие шIэныгъэхэмкIэ докторхэу Эдуард Хатефовымрэ Владимир Жуковымрэ.

Теоретическэ шIэныгъэу еджа­пIэм щызэрагъэгъотыгъэм дакIоу селекционнэ IофшIэнхэу нэшэ-хъыр­быдзхэм якъэгъэкIын фэгъэ­хьыгъэхэми студентхэм заща­гъэгъозагъ. Ащ фэдэ культурэхэм янаучнэ еджапIэ Пшызэ ушэтыпIэ станцием зиIэр 1920-рэ илъэсым къыщегъэ­жьагъ. Илъэс 50-м ехъугъэу ащ щэлажьэ мэкъумэщ шIэныгъэ­хэмкIэ докто­рэу Генрих Теханович. Ащ ригъа­джэхэрэр игъу­сэ­хэу нашэ, къэб ыкIи хъырбыдз лъэпкъ 40 фэдиз къыхи­хыгъ.

Вавиловскэ еджапIэхэр 2020-рэ илъэсым къыщегъэжьагъэу зэхащэх. Аужырэ уахътэм егъэ­джэнхэр шъофыр ары зыщыкIохэрэр, ащ ишIуагъэкIэ хэтэрыкI лъэпкъ зэфэшъхьафмэ нэIуасэ зафашIы ыкIи адэлажьэх. 2022-рэ илъэсым къыщыублагъэу еджапIэм изэхэщэн Адыгэ къэралыгъо университетыр чанэу хэлажьэ.

Адыгэ къэралыгъо университетым ипресс-къулыкъу