КIэлэцIыкIу 28-рэ къэхъугъ
2023-рэ илъэсым ЭКО-м ишIуагъэкIэ республикэм сабый 28-рэ къыщыхъугъ.
Лъэпкъ проектэу «Демография» зыфиIорэм къыдыхэлъытагъэу мы илъэсым ЭКО-м епхыгъэ медицинэ фэIо-фэшIи 170-рэ фэдиз ашIынэу агъэнафэ. Ащ ыпкIэ хэлъэп, шIокI зимыIэ медицинэ страхованием иполискIэ ашIы. Псауныгъэр къэухъумэгъэнымкIэ АР-м иминистрэ игуадзэу Хьагъэудж Мариет къызэриIуагъэмкIэ, мы илъэсым имэзи 5 бзылъфыгъэ 70-мэ мыр афашIынэу агъэнэфагъ, 55-мэ афашIыгъ. ЭКО-м ишIуагъэкIэ лъэрымыхьэ хъугъэ бзылъфыгъэ 21-рэ учетым хэуцуагъ, нэбгыритIумэ тIолъфэныкъохэр къафэхъугъэх. ПстэумкIи сабый 28-рэ къэхъугъ. Мы уахътэм ехъулIэу ЭКО-м епхыгъэу сомэ миллиони 6,5-рэ зыосэ протокол 55-мэ апкIэ атыгъ.
— Джырэ лъэхъан «сабый хэмыкIыныгъ» зыфаIорэр гумэкIыгъо дэдэу щытэп. А узыр игъом къыхагъэщэу ыкIи ащ зэрэIэзэщтхэ шIыкIэр тэрэзэу къызыхахыкIэ, процент 90-м кIэух дэгъу афэхъу. Сабый хэмыкIыныгъэм изы Iэзэгъухэм ЭКО-р ащыщ, — щыхагъэунэфыкIыгъ АР-м псауныгъэр къэухъумэгъэнымкIэ и Министерствэ. УплъэкIунэу ябгъэшIыщтхэм, ар зыфашIы ыкIи зышIы мыхъущтхэм афэгъэхьыгъэ къэбарыр зэкIэ къышъоIэзэрэ врач-гинекологым, джащ фэдэу Перинатальнэ гупчэм иIэзапIэ иврачхэм яжъугъотылIэщт.
— Къэралыгъо политикэмкIэ непэ анахь шъхьаIэр демографием изытет нахьышIу шIыгъэныр ащыщ. КIэлэцIыкIухэр зэрыс унагъохэм IэпыIэгъу афэхъугъэным, унагъом Iоф дэшIэгъэнымкIэ шIуагъэ къэзытыщт шIыкIэхэр къыхэхыгъэнхэм мэхьанэшхо иI. ХэзгъэунэфыкIы сшIоигъу япшъэдэкIыжь къагурыIозэ сабыйхэр зыпIурэ ны-тыхэр гъэшIогъэнхэм, сабыибэ зэрыс унэгъо ныбжьыкIэхэу зигъот макIэхэм IэпыIэгъу афэхъугъэным афэгъэхьыгъэ программэхэр гъэхьазырыгъэнхэр республикэ парламентым къызэриIэтыхэрэр. Джащ фэд, кIэлэцIыкIухэр зэрыс унагъохэр чIыпIэ зэфэшъхьафхэм арыфэхэу, къэралыгъо фэIо-фашIэхэм ашъхьадэкIэу IэпыIэгъу ящыкIагъэ зэрэхъурэр къыдэплъытэн фае. Унагъом ищыIэкIэ-псэукIэ изытет къезыгъэIыхырэ Iофыгъохэр псынкIэу дэгъэзыжьыгъэнхэм ыкIи ящыкIэгъэ IэпыIэгъур ягъэгъотыгъэным афэшI социальнэ къулыкъухэм, фэIо-фашIэу агъэцакIэхэрэм, мысатыушI лъэныкъохэм хэхъоныгъэ ягъэшIыгъэн фае, — къыIуагъ социальнэ политикэмкIэ, унагъом иIофхэмкIэ, псауныгъэр къэухъумэгъэнымкIэ ыкIи культурэмкIэ парламентым икомитет итхьаматэу Наталья Широковам.