Адыгеим унэгъо МФЦ щагъэпсыщт
Урысые Федерацием ишъолъырхэм лъэныкъо зэфэшъхьафхэмкIэ къэралыгъо ыкIи муниципальнэ фэIо-фашIэхэр зыщагъэцэкIэрэ унэгъо Гупчэ (семейный МФЦ) ащызэхэщэгъэным фытегъэпсыхьэгъэ социальнэ проектэу къагъэхьазырыгъэхэм язэнэкъокъу кIэлэцIыкIоу щыIэныгъэм чIыпIэ къин ригъэуцуагъэхэм IэпыIэгъу ягъэгъотыгъэнымкIэ Фондым зэхищэгъагъ. Адыгеир ащ хэлажьи, грантэу сомэ миллиони 8,1-рэ къырихыгъ.
АР-м IофшIэнымкIэ ыкIи социальнэ хэхъоныгъэхэмкIэ и Министерствэ къызэрэщаIуагъэмкIэ, унэгъо МФЦ-р цIыфхэм социальнэ фэIо-фашIэхэр афэгъэцэкIэгъэнхэмкIэ Мыекъуапэ игупчэ ыкIи социальнэ-реабилитационнэ Гупчэу «Доверие» зыфиIорэм ащагъэпсыщт. КIэлэцIыкIу зэрыс унагъохэм, щыIэныгъэм чIыпIэу зэригъэуцуагъэхэр къыдэлъытагъэу, лъэныкъо пстэумкIи IэпыIэгъу ятыгъэныр ары ащ пшъэрылъ шъхьаIэу иIэр.
— Унагъоу сабый зэрысым щыкIагъэу иIэхэм уакъыпкъырыкIызэ непэрэ лъэхъаным амалэу къытыхэрэм адиштэу социальнэ фэIо-фашIэхэр афэгъэцэкIэгъэнхэм мы проектыр фытегъэпсыхьагъ. ЩыIэныгъэм чIыпIэ къин ригъэуцогъэ унагъом къулыкъу зэфэшъхьафхэр къызэпимыкIухьэхэу «зы шъхьаныгъупчъэ» шIыкIэм тетэу ищыкIэгъэ фэIо-фашIэхэр мы Гупчэм щыфагъэцэкIэщтых, — къыIуагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.
Министерствэм тызэрэщигъэгъозагъэмкIэ, унэгъо МФЦ-м кIэлэцIыкIу зэрыс унагъохэм психологическэ IэпыIэгъу ягъэгъотыгъэным, социальнэ фэIо-фашIэхэр афэгъэцэкIэгъэнхэм, нэужыми щыкIагъэу яIэхэр дэгъэзыжьыгъэ зэрэхъухэрэм лъыплъэгъэным, упчIэу яIэхэм джэуапхэр ятыжьыгъэнхэм, ящыкIэгъэ информациер аIэкIэгъэхьэгъэным, нэмыкIхэм афэгъэзэгъэ къулыкъу зэфэшъхьафхэр иIэщтых. Ны-тыхэм яIофхэр зэхафыфэ кIэлэцIыкIухэм яуахътэ шIуагъэ хэлъэу агъэкIоным фэшI Гупчэм джэгупIэ щагъэпсыщт.