Росреестрэм ишъолъыр ГъэIорышIапIэ Адыгеим ычIыгухэр гектар пчъагъэу зэрэхъухэрэм икъэлъытэн, ахэр зэрэзэтеутыгъэхэр, статусэу яIэр гъэнэфэгъэныр пшъэрылъ шъхьаIэу иIэхэм ащыщ. 2022-рэ илъэсым ащ фэдэ Iофтхьабзэу зэхищэгъагъэхэм къагъэлъэгъуагъэм изэфэхьысыжь джырэблагъэ ыгъэхьазырыгъ.

Ащ къызэригъэлъэгъуагъэмкIэ, чIыгоу республикэм иIэм зэхъокIыныгъэ фэхъугъэп — гектар 779180-у зэрэхъущты­гъэм тет. Ащ инахьыбэр мэкъумэщ хъызмэтым фэгъэзагъ. Ызыщанэ фэдизыр мэзхэм ыкIи мэз хъыз­мэтым ыгъэфедэхэрэм зэлъаубыты, проценти 7-м псэупIэхэр тетых, адрэ къанэрэр гъэлъэшыгъэу къагъэгъунэхэрэм ащыщых, промышленностым, энергетикэм, транспортым, связым япхыгъэх, псыхэм аубыты е чIыгу IэпэчIэгъанэкIэ алъытэх.

ИкIыгъэ илъэсым зэрагъэунэфыгъэмкIэ, мэкъумэщ хъызмэтым ичIыгухэр соткэ 90-кIэ, мэз фондым иехэр соткэ 20-кIэ, IэпэчIэгъанэкIэ алъытэхэрэр сотки 10-кIэ нахь макIэ хъу­гъэх. Ахэм къахэхыгъэ Iахьхэр псэупIэхэм е нэмыкI лъэныкъохэм ячIыгухэм зэрахагъэхьагъэхэр ары а щыкIэгъэ тIэкIур къыз­хэкIыгъэр. — Зэрэхабзэу, илъэс къэс дгъэхьазырырэ докладым республикэм чIыгу фондэу иIэр зыфэдизыр къегъэнафэ. Нахьыбэу шIуагъэ къатэу чIыгухэр гъэфедэгъэнхэм фыте­гъэпсыхьэгъэ унашъохэм яшIын лъапсэ фэхъурэ документэу ар щыт, — къыIуагъ ГъэIорышIапIэм ипащэ игуадзэу Къуижъ Эдуард.

Адыгеим ичIыгухэр гектар пчъагъэу зэрэхъухэрэм, ахэм язытет фэгъэхьыгъэ докладым Росреестрэм иинтернет нэкIубгъо ущеплъын плъэкIыщт. Руб­рикэм ыцIэр «Открытая служба», ащ ыуж «Статистика и аналитика» зыфиIорэр къызэIупхыщт, шъолъырыр «Адыгэ Республик». Интернет нэкIубгъор къызэрэбгъотыщтыр: https: //rosreestr.gov,ru/open-ser­vice/statistika-i-analitika/otchety-ob­zory-doklady/0I-doklad-o-sos­toyanii-zemel-v-respublike-ady­geya-v2022-godu/

Росреестрэм АР-мкIэ и ГъэIорышIапI.