«ХэшIыкI фысиIэп» пIомэ е уимыIоф ухэмыхьэмэ мымакIэу ишIуагъэ къыокIыжьэу къыхэкIы. Ау зыхэмышIыкIырэм уиIоф хаплъхьэмэ, нахьыбэрэм изэрар къыокIы. Адыгэмэ къэбар сэмэркъэоу ахэлъым ащ урегъэгупшысэ. Аужыпкъэм, гущыIэ щэрыоуи ар лъэпкъым къыхэнагъ. Адыгэ къуаджэ щыщ нэбгырищ гъунэгъу станицэм кIуагъэх урысыбзэ тIэкIу къызэрагъашIэ ашIоигъоу. Зым «Я»-р ыгу рихьыгъ, ятIонэрэм «Он»-р къыхи­хыгъ. Ящэнэрэр анахь сэнаущэу щытыти, гущыIэухыгъэу «Ничего не знаю» къызэригъэшIагъ. КъэкIожьхэзэ лIы укIыгъэ гъогум телъэу шъхьарыхьагъэх. АшIэщтыр амышIэу еплъыхэу щытхэзэ полицейскэхэр къашъхьарыхьагъэх. — Кто это сделал? — аIуи, ахэр кIалэхэм къяуп­чIыгъэх. — Я, – ыIуи зыр къэуцугъ. — Он, – ыIуи ятIонэрэри къыгоуцуагъ. — Ничего не знаю, — ыIуи ящэнэрэр ичIыпIэ къикощыкIыгъэп. «Я» зыIуагъэр аубытыгъ, «Он» зыIуагъэр шыхьатэу зыдащагъ, «Ничего не знаю» зыIуагъэр къатIупщыжьыгъ. Арышъ, «не знай» гъушъэр» нахьышIоу къычIэ­кIыгъ. Зи зыхэмышIыкIырэм ухэмыхьэ­мэ нахьышIу. Хьаудэкъо Сар. Мыекъуапэ.