АР-м и ЛIышъхьэу КъумпIыл Мурат Дунэе зекIо-патриотическэ ныб­жьыкIэ форумэу «Кавказ зыкIыр» зыфиIорэм изэфэшIыжьын фэгъэхьыгъэ Iофтхьабзэу Налщык щыкIуагъэм хэлэжьагъ.

Форумыр Урысыем и Пре­зидентэу Владимир Путиным ипшъэрылъхэу къэралыгъор шIу ягъэлъэгъугъэным ыкIи обществэм шIуагъэ къыфегъэхьы­гъэным атегъэпсыхьэгъэ ныбжьыкIэ зекIоным зегъэушъомбгъугъэным ехьылIагъэхэм къадыхэлъытагъэу рагъэкIокIы.

Абхъазым, Къыблэ Осетием, Адыгеим, Дагъыстан, Ингушетием, Къэрэщэе-Щэрджэсым, Темыр Осетием — Аланием, Чэчэным, Ставропольскэ краимрэ Къэбэртэе-Бэлъкъарым- рэ къарыкIыгъэ ныбжьыкIэхэмрэ лъэныкъо зэфэшъхьафхэм япхыгъэу Iоф зышIэхэрэмрэ мэфитIум зекIоным ыкIи хьа­кIэпэгъокIыным алъэныкъокIэ IофшIэкIэ амалэу яIэхэмкIэ зэ­хъожьыгъэх, ныбжьыкIэхэм мы Iофыгъохэм яIахьэу хэлъым тегущыIагъэх, япроектхэмрэ ягукъэкIхэмрэ щызэхафыгъэх.

IофшIэным изы лъэныкъоу джыри щытыгъэр лъэпкъ ыкIи дин зыкIыныгъэ, зэдэлэжьэныгъэ Кавказым щыпсэухэрэм зэдыряIэныр ары.

Гъэсэныгъэм тегъэпсыхьэгъэ едзыгъохэр, шIэныгъэ лекциехэр, зэпео-зэдэгущыIэгъухэр, проектнэ IофшIэныр, экскурсие­хэр форумым къыдыхэлъытэ­гъагъэх.

«КIэлэеджакIохэмрэ апшъэрэ еджапIэхэм ачIэсхэмрэ Iоф адэ­шIэгъэным Адыгеим мэхьанэшхо щыраты. Джащ пае ныбжьыкIэ чанхэр форумхэм, зэфэсхэм, конференциехэм — зыкъызщагъэлъэгъон алъэкIыщт пстэуми, ягукъэкIхэр нэмыкIхэм защарагъэлъэгъущт чIыпIэхэм, яеплъыкIэхэм къадезыгъэштэщтхэр къызщагъотыщтхэм ахэлэжьэнхэм иIофыгъокIэ тигуапэу IэпыIэгъу тафэхъу. Мыщ фэдэ Iофтхьабзэхэр тиреспубликэ щыретэгъэкIокIых, ахэм тикъэралыгъо инэмыкI шъолъырхэм ащыпсэурэ пшъашъэхэмрэ кIа­лэхэмрэ къятэгъэблагъэх. Мэхьанэшхо иI ныбжьыкIэхэм къырахьыжьэрэ Iофыгъохэр нэужым хэбзэ къулыкъухэм яIофшIэнкIэ къыдыхалъытэным, анахьэу зигъо хъухэрэм ыкIи обществэм зыдыригъаштэхэрэм сыд фэдэрэ лъэныкъокIи Iэпы­Iэгъу агъотыным», — къыIуагъ КъумпIыл Мурат.

НыбжьыкIэ форумым изэфэшIыжьын тегъэпсыхьэгъэ мэфэкI зэхахьэм хэлэжьагъэх УФ-м и Президент иполномочнэ лIыкIоу Темыр Кавказ Федеральнэ шъолъырым щыIэ Юрий Чайкэ, Темыр Осетием — Аланием и ЛIышъхьэу Сергей Меняйло, Абхъаз Республикэм и Пре­зидентэу Аслъан Бжания, Рес­пуб­ликэу Къыблэ Осетием и Президентэу Алан Гаглоевыр, Къэ­бэртэе-Бэлъкъар ыкIи Къэ­рэщэе-Щэрджэс республикэхэм я ЛIышъхьэхэу КIокIо Казбекрэ Темрезов Рэщыдрэ.

МэфэкI едзыгъом ыуж Iоф­тхьабзэм къекIолIагъэхэм концерт къафатыгъ Къэбэртэе-Бэлъ­къарым итворческэ куп­хэмрэ искусствэм иIофышIэхэмрэ.

АР-м и ЛIышъхьэ ипресс-къулыкъу