ЯIофшIакIэ ауплъэкIугъ
АР-м хэгъэгу кIоцI IофхэмкIэ и Министерствэ щызэхэщэгъэ Общественнэ советым илIыкIохэу Николай Киселевымрэ Светлана Дорошенкэмрэ Урысые Iофтхьабзэу «Гражданский мониторинг» зыфиIорэм хэлэжьагъэх.
[caption id="attachment_136349" align="aligncenter" width="800"] Сурэтыр: Къэралыгъо автоинспекциер.[/caption]
Iофтхьабзэр зытегъэпсыхьагъэр хэгъэгу кIоцI IофхэмкIэ къулыкъухэм яIофшIэн лъыплъэгъэныр ары. Ащ къыдыхэлъытагъэу советым хэтхэр шъолъыр Къэралыгъо автоинспекцием и ГъэIорышIапIэ щыIагъэх.
Гъогу-патруль къулыкъум ихэушъхьафыкIыгъэ батальон иIофшIэн зэхэщэгъэнымкIэ купым истаршэ инспекторэу, полицием имайорэу Игорь Варламовыр лIыкIохэм къапэгъокIыгъ.
Гъогухэм къатехъухьэрэ авариехэр нахь макIэ шIыгъэнхэмкIэ амалэу агъэфедэхэрэм Николай Киселевыр кIэупчIагъ. Инспекторхэм къызэраIуагъэмкIэ, анахь шIуагъэ къэзытырэ амалхэм ащыщ видеофиксацием игъэфедэн. Мы уахътэм Адыгеим ишъолъыр ащ фэдэ комплекси 128-рэ щагъэуцугъ ыкIи илъэс къэс ахэм япчъагъэ хагъахъо.
Нэужым общественникхэр гъогурыкIоным ылъэныкъокIэ административнэ хэбзэукъоныгъэхэр автомат шIыкIэм тетэу зыщатхырэ Гупчэм чIэхьагъэх. Ащ ипащэу, полицием имайорэу Игорь Филатовым советым хэтхэр къырищэкIыхэзэ IофшIэныр зэрэгъэпсыгъэр къафиIотагъ.
Хэбзэукъоныгъэ гъэнэфагъэ пэпчъ тегъэпсыхьэгъэ камерэхэр чIыпIэ зэфэшъхьафхэм зэращагъэуцугъэм ишIуагъэкIэ оперативнэ сурэтыр игъэкIотыгъэу Гупчэм чIэсхэу алъэгъун алъэкIы. Анахь машинэ бэдэдэ зэрыкIорэ гъогу Iахьхэми щалъыплъэнхэ амал яI.
Административнэ хэбзэукъоныгъэхэм афэгъэхьыгъэ унашъохэр ашIынхэр ыкIи транспорт амалхэр зиехэм пшъэдэкIыжь арагъэхьыныр Гупчэм иIофышIэхэм япшъэрылъ шъхьаIэхэм ащыщ.
Ащ епхыгъэу къулыкъушIэ пэпчъ ипшъэрылъхэм Светлана Дорошенкэм ынаIэ атыридзагъ.
УплъэкIунхэм якIэух зэфэпхьысыжьмэ, автоинспекцием и ГъэIорышIапIэ идежурнэ куп ыкIи административнэ хэбзэукъоныгъэхэр автомат шIыкIэм тетэу зыщатхырэ Гупчэм яIофшIэн зэрэзэхэщагъэр уигъэрэзэнэу общественникхэм алъытагъ. Шъолъырым гъогурыкIоныр щыщынэгъончъэнымкIэ агъэнэфэгъэ пшъэрылъхэр агъэцэкIэнхэмкIэ ищыкIэгъэ амалхэр икъоу зэраIэкIэлъыр хагъэунэфыкIыгъ.
Ащ нэмыкIэу, общественностым илIыкIохэмрэ автоинспекторхэмрэ язэдэгущыIэгъу къызэрэщыхагъэщыгъэмкIэ, тапэкIэ инспекцием зэхищэщт Iофтхьэбзэ зэфэшъхьафхэм Светлана Дорошенкэмрэ Николай Киселевымрэ къахэлажьэхэ зэрашIоигъор къаIуагъ.