Монографиеу «Пандемия COVID-19 как вызов власти и обществу: политико-социологический взгляд» зыфиIоу политическэ шIэныгъэхэмкIэ докторэу, профессорэу Жадэ Зуриет япащэу Адыгэ къэралыгъо университетым иIофышIэ куп къыгъэхьазырыгъэр шIэныгъэм ылъэныкъокIэ АР-м и Къэралыгъо шIухьафтын фэгъэшъошэгъэнэу къагъэлъэгъуагъ.

[caption id="attachment_136290" align="aligncenter" width="800"] Сурэтыр: АКъУ.[/caption]

Научнэ IофшIагъэр зы­фэгъэхьыгъэр пандемием илъэхъан обществэмрэ хабзэмрэ зэрэзэдэлэжьагъэхэм япхыгъэ зигъо Iо­фыгъохэр ары. Хабзэм­рэ обществэмрэ респуб­ликэм зэрэщызэдэлэжьэнхэ алъэкIыщт шIыкIэхэр авторхэм агъэунэфыгъэх, цIыфхэм хэбзэ Iэшъхьэтетхэм цыхьэу афашIырэм зыкъегъэIэтыгъэнымкIэ политикэ-социологическэ зэфэхьысыжьхэр ашIы­гъэх. 2020 — 2021-рэ илъэсхэм Адыгеимрэ Краснодар краимрэ ащызэхащэгъэгъэ социологическэ ушэтынхэр ащкIэ къызфагъэфедагъэх.

АКъУ-м зэхэубытэгъэ IофыгъохэмкIэ и НИИ эт­нокультурэ IофыгъохэмкIэ и Лабораторий ары ушэтынхэр зыщызэхащагъэ­хэр. Мы монографием дэлэжьагъэх политическэ шIэныгъэхэмкIэ докторэу Жадэ Зуриет (ар научнэ пащэу ыкIи пшъэдэкIыжь зыхьырэ редакторэу щыт), философие шIэныгъэхэмкIэ докторхэу Шъоджэ Аси­ет, Лаушэ Светлан, Надежда Ильиновар ыкIи социологие шIэныгъэхэмкIэ кандидатэу Елена Куква.

«Взаимодействие влас­ти и общества в условиях нового глобального риска: тенденции (дезинтеграции (на примере Республики Адыгея и Краснодарского края)», «Механизмы укрепления доверия к власти в регионах России в пост­пандемийный период: по­литико-социологический анализ» зыфиIорэ проект­хэу илъэси 3 Iоф зыдашIагъэхэм монографиер къа­кIэкIуагъ. КъэIогъэн фае фундаментальнэ ушэтынхэмкIэ Урысые фондымрэ социальнэ ушэтынхэмкIэ Экспертнэ институтымрэ а проектхэм къазэрадырагъэштагъэр.

Пандемием илъэхъан республикэ сообществэхэр нахь зэкъогъэуцогъэнхэмкIэ амалэу щыIагъэхэр къызэхафыхэзэ, анкетэхэр къызфагъэфедэхэзэ, шIэныгъэлэжь купым Адыгэ Республикэми, Краснодар краими социологие ушэтынхэр ежь-ежьырэу ащызэхащагъэх. Коронавирусым нахь зимыушъомбгъу­нымкIэ республикэ хэбзэ Iэшъхьэтетхэм теубыта­гъэрэ пытагъэрэ къызэ­рэзыхагъэфагъэм фэшI цIыф­хэм хэбзэ къулыкъу­хэм цыхьэу афашIырэм хэхъуагъ. Обществэм ха­бзэм цыхьэшхо зэрэфи­шIырэр щыIэныгъэм къыгъэлъэгъуагъ.

«Краснодар краим егъэ­пшагъэмэ, хабзэм цыхьэ зэрэфашIырэмкIэ индексхэр 14-кIэ Адыгэ Республикэм нахь щыдэкIоягъэх. Мы индексыр тиреспубликэ 100-м щы­шъхьэдэкIыгъ», — къы­Iуагъ ушэтыным инаучнэ пащэу, профессорэу Жадэ Зуриет.

Хэбзэ къулыкъухэм со­циальнэ купхэм зэдэлэ­жьэныгъэу адыряIэр гъэлъэшыгъэнымкIэ игъо алъэгъухэрэр шIэныгъэлэжьхэм яIофшIагъэ къыщызэхафыгъэх. ГущыIэм пае, пащэхэм ашъхьэкIэ пшъэдэкIыжь зэрахьырэр нахь зэхашIэнэу, къулыкъухэм яIофшIэн нэфэгъэ икъу хэлъэу, шъхьэихы­гъэу зэхащэнэу, унашъохэр аштэ зыхъукIэ цIыфхэм яшIошIхэр къыдалъытэнэу.

ЧIыпIэ хабзэм игъэIорышIэнкIэ зэфэхьысыжьэу ашIыгъэхэри, игъо афалъэ­гъугъэхэри цIыфхэмрэ ха­бзэмрэ цыхьэу зэфа­шIырэм зыкъегъэIэтыгъэным фэIорышIэщтых.

Монографиеу «Пандемия COVID-19 как вызов власти и обществу: по­литико-социологический взгляд» зыфиIорэм шIэны­гъэлэжьхэм осэшхо къыфашIыгъ ыкIи политическэ шIэныгъэхэмкIэ Урысые ассоциацием ишIэныгъэлэжьхэм яIофшIагъэхэм я Урысые зэнэкъокъоу 2022-рэ илъэсым щыIагъэм я II-рэ шъуашэ зиIэ дипломыр къыщыфагъэшъошагъ.

Адыгэ къэралыгъо университетым ипресс-къулыкъу