Почтэ 12 агъэцэкIэжьыщт
Илъэсыр имыкIызэ Урысыем и почтэ Адыгэ Республикэм имуниципальнэ образование зэфэшъхьафхэм арыт почтэ 12-р ыгъэцэкIэжьыщт.
Урысые Федерацием и Президентэу Владимир Путиным пшъэрылъ къызэрафишIыгъэм тетэу, партиеу «Единэ Россиер» IэпыIэгъу къафэхъузэ, къуаджэхэм адэт почтэхэр джырэ шапхъэхэм адиштэу зэтырагъэпсыхьэхэу зырагъэжьагъэр 2022-рэ илъэсыр ары.
ГъэрекIо почтэ 18 республикэм щагъэцэкIэжьыгъ ыкIи 2 щагъэпсыгъ. Мыгъэ Урысыем и Почтэ псэупIэхэу Тэхъутэмыкъуае, ПчыхьалIыкъуае, Пэнэжьыкъуае, Хьатикъуае, Штурбинэм, Тихоновым, Заревэм, Гончаркэ, Краснооктябрьскэм, Каменномостскэм, Курджипскэм ыкIи Дахъо адэт почтэ 12-р ыгъэцэкIэжьыщт. Мы уахътэм IофшIэнхэр ахэм ащэкIох. Ахэр зэрагъэкIэжьыщтхэм нэмыкIэу, псэупIэ цIыкIухэмрэ Iудзыгъэхэмрэ ателъытэгъэ фэIо-фэшIакIэхэри афызэхащэщтых. Сэкъатныгъэ зиIэхэмкIэ Iэрыфэгъунхэм пае ахэм пандусхэр ащагъэпсыщтых, IофышIэхэм укъызэряджэщт кнопкэхэр ахагъэуцощтых.
Мы проектым къоджэдэсхэмкIэ мэхьанэшхо зэриIэр АР-м и ЛIышъхьэ къыхигъэщыгъ. Къоджэдэсхэм джы фэIо-фэшIэ тедзэхэр почтэм къащыфагъэцэкIэщтых. ГущыIэм пае, Урысыем и Почтэ документхэм якопиехэр цIыфхэм къафытыридзэщтых, агъэкIэжьыгъэ почтэхэм ятемператури, ялъыдэкIуаий зынэсырэр цIыфхэм щашын алъэкIыщт.
Адыгэ Республикэм и ЛIышъхьэ пшъэрылъ зэрафишIыгъэм тетэу гъэцэкIэжьынхэм ялъэхъан пIалъэ горэкIэ почтэхэр зычIэтыщт унэхэм якъыхэгъэкIынкIэ район администрациехэр Урысыем и Почтэ джыдэдэм IэпыIэгъу фэхъух. Джырэ шапхъэхэм адиштэу агъэкIэжьыгъэ почтэхэм къапэIулъ чIыпIэхэри зэтегъэпсыхьэгъэнхэ зэрэфаем шъхьафэу КъумпIыл Мурат анаIэ тыраригъэдзагъ.
«Федеральнэ гупчэр IэпыIэгъу къытфэхъузэ къоджэдэсхэм ящыIэкIэ-псэукIэ зыкъегъэIэтыгъэнымкIэ тэ бэ зэшIотхырэр. Къэралыгъо, муниципальнэ фэIо-фашIэхэр ахэм нахьышIоу зэрафызэхэтщэщтым тыпылъ. Урысыем и Почтэ ипроектыкIэу Урысыем и Президентэу Владимир Путиныр кIэщакIо зыфэхъугъэри ары зытегъэпсыхьагъэр. Джырэ ша-пхъэхэм адиштэу почтэхэр зызэтырагъэпсыхьэхэкIэ, къуаджэхэм нахьышIоу ыкIи нахьыбэу фэIо-фашIэхэр ащагъэцакIэхэ хъущт», — къыIуагъ КъумпIыл Мурат.