Хьылъэзещэ автомобилы­шхохэр зэраушъэхэрэр шап­хъэхэм зэрашъхьадэкIырэм къыхэкIыкIэ гъогухэр зэрэзэхакъутэрэм иIофыгъо изэшIо­хын Адыгеим идепутатхэр ыкIи испециалистхэр фежьагъэх. АР-м и Къэралыгъо Совет — Хасэм и Тхьаматэ игуадзэу Цэй Эдуард пэщэныгъэ зы­щызэрихьэгъэ зэхэсыгъоу щы­Iагъэм а Iофыгъом щытегущыIагъэх.

АР-м и Къэралыгъо Совет — Хасэм ипресс-къулыкъу къызэритыгъэмкIэ, мы лъэхъаным кIуачIэ зиIэ федеральнэ хэбзэгъэуцугъэм ащ епхыгъэ зэхъо­кIыныгъэ фэшIыгъэнымкIэ Къэралыгъо Советым — Хасэм игъоу ылъэгъурэ Iофыгъохэр парламентым егъэхьазырых.

Ространснадзорым ишъолъыр къутамэ игъоу ылъытагъ товар-транспорт тхылъхэр водительхэм мы къулыкъум иIофышIэхэм къаратыхэзэ ашIынхэу, арэущтэу зымыхъукIэ тазырхэр атыралъхьанхэу. Къулыкъум илIыкIо къызэрэхигъэ­щыгъэмкIэ, автомобилыр зыу­шъэрэм а тхьапэр водителым къыримытэу, шапхъэхэм ашъхьа­дэкIэу хьылъэр зэрэрилъхьэрэмкIэ пшъэдэкIыжь рагъэхьынэу хъурэп. Мыщ ыкIи нэмыкI Iофыгъоу зэхэсыгъом къыщаIэтыгъэ­хэм афэгъэхьыгъэу УФ-м административнэ хэбзэукъоныгъэхэмкIэ и Кодекс зэхъокIыныгъэхэр фашIынхэр игъоу депутатхэм алъытэ.

УплъэкIунэу рагъэкIокIыгъэ­хэм мы еплъыкIэр къахэкIыгъ. ГъогурыкIоныр щынэгъончъэнымкIэ Къэралыгъо инспекцием и ГъэIорышIапIэу АР-м щыIэм къызэритыгъэмкIэ, мы илъэсым имэзи 6 хьылъэзещэ автомобильхэм яводительхэм алъэныкъокIэ гъогогъу 3914-рэ административнэ хэбзэукъоныгъэхэр зэрахьагъэу атхыгъ. Анахьыбэрэ къыхагъэщырэр машинэм техъо зэрэфамышIырэр ары.