Бэдзэогъум и 17-м пчыхьэм сыхьатыр 6-м адэжь Урысыем ошIэ-дэмышIэ Iоф­хэмкIэ и Министерствэ икъулыкъушIэхэм лъыхъон-къэгъэнэжьын Iофтхьабзэхэр зэ­рахьэзэ, къалэу Краснодар щыщ хъулъфыгъэу илъэс 28-рэ зыныбжьэу псыхъоу Шъхьэгуащэ хапкIи псым ыхьыгъагъэм ихьадэ къагъотыжьыгъ.

Хъулъфыгъэр зыдэхъугъэр амышIэу зэрэ­кIодыгъэм къыхэкIэу Урысыем и Следственнэ комитет иследственнэ ГъэIорышIапIэу Адыгеим щыIэм Мыекъопэ районымкIэ иотдел уплъэкIунхэр зэхищагъэх. ЗэрагъэунэфыгъэмкIэ, мы хъулъфыгъэр гъусэхэр иIэу республикэм зекIо къэкIуагъ. Мэкъуогъум и 18-м псыхъоу Шъхьэгуащэ зыщигъэпскIынэу зыхапкIэм, псыхъо чъэрым хъулъфыгъэр рихьыжьагъ ыкIи ащ ыхьыгъ. Мы чIыпIэм щытыгъэ цIыфхэр ащ IэпыIэгъу фэхъунхэ алъэкIыгъэп.

Хъугъэ-шIагъэр зыщыхъугъэ чIыпIэм километрэ 20-кIэ укъызыIукIыкIэ поселкэу Каменномостскэм дэжь псыхъоу Шъхьэгуащэ хъулъфыгъэм ихьадэ къыхагъотэжьыгъ. Джырэ уахътэм хьадэр къызыщагъотыгъэ чIыпIэм следовательхэм Iоф щашIэ.